'ಸಾಕ್ ಬಿಡೊ ಮೊನ್ನೆ ತಮಿಳು ಚಿತ್ರ ಹಂಚಿ ಇಂದು ಕನ್ನಡ ಅಂತಿದ್ದೀಯ' ಎಂದ ನೆಟ್ಟಿಗನಿಗೆ ಕಾರ್ತಿಕ್ ಗೌಡ ಹೇಳಿದ್ದೇನು?

ಕಾಂತಾರ ಫೈನಲ್ ಕಾಪಿ ನೋಡಿ ಹರ್ಷ ವ್ಯಕ್ತಪಡಿಸದಿದ್ದ ಕಾರ್ತಿಕ್ ಗೌಡ

ನಿನ್ನೆಯಷ್ಟೇ ಕಾಂತಾರ ಸಿನಿಮಾ ವೀಕ್ಷಿಸಿದ್ದ ಕಾರ್ತಿಕ್ ಗೌಡ ಕಾಂತಾರ ಈ ಮಣ್ಣಿನ ಹೆಮ್ಮೆಯ ಕತೆ, ಇದು ಪ್ರತಿಯೊಬ್ಬ ಕನ್ನಡಿಗನಿಗೂ ಹೆಮ್ಮೆ ಎಂದು ಟ್ವೀಟ್ ಮಾಡಿ ಬರೆದುಕೊಂಡಿದ್ದರು. ಈ ಟ್ವೀಟ್ ಕಂಡ ಸಿನಿ ಪ್ರೇಕ್ಷಕರು ಹೊಂಬಾಳೆ ಫಿಲ್ಮ್ಸ್ ಕಡೆಯಿಂದ ಮತ್ತೊಂದು ಬ್ಲಾಕ್‌ಬಸ್ಟರ್ ಬರುವುದು ಖಚಿತ ಎಂದು ಪ್ರತಿಕ್ರಿಯಿಸಿದ್ದರು.

ಸಾಕು ಬಿಡು ಮೊನ್ನೆ ತಾನೇ ತಮಿಳು ಮೂವಿ ಹಂಚಿದ್ದೆ ಎಂದ ನೆಟ್ಟಿಗ

ಇನ್ನು ಕಾರ್ತಿಕ್ ಗೌಡ ಮಾಡಿದ ಟ್ವೀಟ್‌ಗೆ ಸೆಲೆಬ್ರಿಟಿಗಳೂ ಸೇರಿದಂತೆ ಹಲವರು ಮೆಚ್ಚುಗೆ ವ್ಯಕ್ತಪಡಿಸಿದ್ದರೆ ಓರ್ವ ನೆಟ್ಟಿಗ ಮಾತ್ರ ಕಾರ್ತಿಕ್ ಗೌಡ ಸಿಲಂಬರಸನ್ ನಟನೆಯ ತಮಿಳು ಚಿತ್ರವನ್ನು ಕರ್ನಾಟಕದಲ್ಲಿ ಹಂಚಿಕೆ ಮಾಡಿದ್ದರ ಕುರಿತು ರಿಪ್ಲೇ ಮಾಡುವ ಮೂಲಕ ಅಸಾಮಾಧಾನ ವ್ಯಕ್ತಪಡಿಸಿದ್ದಾರೆ. ಮತ್ತೊಂದು ಮೂವಿ, ಕನ್ನಡಿಗರನ್ನು ಭಾವನಾತ್ಮಕವಾಗಿ ಗೆಲ್ಲಲು ಮತ್ತೊಂದು ಹೆಮ್ಮೆ ಟ್ಯಾಗ್ ಎಂದು ಬರೆದುಕೊಂಡಿರುವ ಈ ನೆಟ್ಟಿಗ ಸಾಕು ಬಿಡೋ ಮೊನ್ನೆ ತಾನೇ ತಮಿಳು ಮೂವಿ ವಿತರಿಸಿ ಇವತ್ತು ಕನ್ನಡ ಹೆಮ್ಮೆ ಎನ್ನಬೇಡ, ಈ ಚಿತ್ರ ನೋಡಲು ರಿಷಭ್ ಶೆಟ್ಟಿ ಕಾರಣ ಹೊರತು ಬೇರೆ ಯಾವುದೇ ಹೆಮ್ಮೆ ಟ್ಯಾಗ್ ಅಲ್ಲ ಎಂದಿದ್ದಾರೆ.

ಕಾರ್ತಿಕ್ ಗೌಡ ತರಾಟೆ

ಇನ್ನು ಈ ರೀತಿಯ ಟ್ವೀಟ್ ಮಾಡಿದ ನೆಟ್ಟಿಗನೋರ್ವನಿಗೆ ರಿಪ್ಲೈ ಮಾಡಿದ ಕಾರ್ತಿಕ್ ಗೌಡ ಆ ನೆಟ್ಟಿಗನ ಕಾಲನ್ನು ಎಳೆದಿದ್ದಾರೆ. ಆ ನೆಟ್ಟಿಗ ತನ್ನ ಟ್ವೀಟ್‌ನಲ್ಲಿ ಹೆಮ್ಮೆ ಎಂದು ಬಳಸುವ ಬದಲಾಗಿ ಎಮ್ಮೆ ಎಂದು ಬಳಸಿದ್ದನ್ನು ಸರಿಪಡಿಸಿದ ಕಾರ್ತಿಕ್ ಗೌಡ ಅದು ಎಮ್ಮೆ ಅಲ್ಲ ಹೆಮ್ಮೆ ಎಂದು ಬರೆದುಕೊಂಡಿದ್ದಾರೆ. ಈ ಮೂಲಕ ಕಾರ್ತಿಕ್ ಗೌಡ ತನ್ನ ವಿರುದ್ಧವಾಗಿ ಟ್ವೀಟ್ ಮಾಡುವವರ ಮಾತುಗಳನ್ನು ಪರಿಗಣಿಸುವುದಿಲ್ಲ ಎಂಬುದನ್ನು ಪರೋಕ್ಷವಾಗಿ ತಿಳಿಸಿದ್ದಾರೆ.

ದೊಡ್ಡ ಮಟ್ಟದಲ್ಲಿ ಕಾಂತಾರ ರಿಲೀಸ್

ಇನ್ನು ಕಾಂತಾರ ಸಿನಿಮಾವನ್ನು ಇತೆರೆ ಭಾಷೆಗಳಿಗೆ ಡಬ್ ಮಾಡದೇ ಕನ್ನಡದಲ್ಲಿಯೇ ವಿಶ್ವದಾದ್ಯಂತ ಬಿಡುಗಡೆ ಮಾಡುವತ್ತ ಹೆಜ್ಜೆ ಇಟ್ಟಿವೆ ಹೊಂಬಾಳೆ ಫಿಲ್ಮ್ಸ್ ಹಾಗೂ ಕೆಆರ್‌ಜಿ ಸಿನಿಮಾಸ್. ಹೋಮ್ ಸ್ಕ್ರೀನ್ ಎಂಟರ್‌ಟೈನ್‌ಮೆಂಟ್ ಸಂಸ್ಥೆ 'ಕಾಂತಾರ' ಚಿತ್ರದ ಓವರ್‌ಸೀಸ್ ರೈಟ್ಸ್ ಕೊಂಡುಕೊಂಡಿದೆ. ಯುಎಸ್‌ನಲ್ಲಿ ಬಹಳ ದೊಡ್ಡಮಟ್ಟದಲ್ಲಿ ಸಿನಿಮಾ ರಿಲೀಸ್ ಪ್ಲ್ಯಾನ್ ನಡೀತಿದೆ. ಒಂದು ದಿನ ಮೊದಲೇ ಅಂದರೆ ಸೆಪ್ಟೆಂಬರ್ 29ಕ್ಕೆ ಕೆಲವೆಡೆ ಪ್ರೀಮಿಯರ್‌ ಶೋಗಳು ಶುರುವಾಗಲಿದೆ.