ಹುಟ್ಟುಹಬ್ಬದ ಹೊಸ್ತಿಲಲ್ಲಿ ಬಿಡುಗಡೆ ಆಗಲಿದೆ 'ಡಾ.ಶಿವರಾಜ್ ಕುಮಾರ್ ಯಶೋಗಾಥೆ'

ಹ್ಯಾಟ್ರಿಕ್ ಹೀರೋ... ಸೆಂಚುರಿ ಸ್ಟಾರ್... ಕರುನಾಡ ಚಕ್ರವರ್ತಿ... ಅಣ್ಣಾವ್ರ ಮಗ... ಡಾ.ಶಿವರಾಜ್ ಕುಮಾರ್ ರವರ ಜೀವನ ಚರಿತ್ರೆ ಸಾರುವ ಪುಸ್ತಕವನ್ನು ಪತ್ರಕರ್ತ ಮತ್ತು ಛಾಯಾಗ್ರಾಹಕರಾದ ಜನಾರ್ಧನ ರಾವ್ ಸಾಳಂಕೆ ಬರೆದಿದ್ದಾರೆ. ಪುಸ್ತಕದ ಹೆಸರು 'ಕರುನಾಡ ಚಕ್ರವರ್ತಿ ಡಾ.ಶಿವರಾಜ್ ಕುಮಾರ್ ಯಶೋಗಾಥೆ'.

ಶಿವಣ್ಣನ ಬಾಲ್ಯದ ದಿನಗಳು, ಪ್ರಾಥಮಿಕ ಶಾಲೆ, ಪ್ರೌಢ ಶಿಕ್ಷಣ, ಕಾಲೇಜು, ಚಿತ್ರರಂಗ ಪ್ರವೇಶ, ಚಿತ್ರ ಜೀವನ, ದಾಖಲೆಗಳು ಇತ್ಯಾದಿಗಳ ಬಗ್ಗೆ 'ಕರುನಾಡ ಚಕ್ರವರ್ತಿ ಡಾ.ಶಿವರಾಜ್ ಕುಮಾರ್ ಯಶೋಗಾಥೆ' ಪುಸ್ತಕದಲ್ಲಿ ಉಲ್ಲೇಖವಿದೆ.

ಪುಸ್ತಕದಲ್ಲಿ ಶಿವಣ್ಣ ಅವರ ಅಪರೂಪದ ಫೋಟೋಗಳನ್ನೂ ನೀವು ಕಾಣಬಹುದು. ಬಹುಶಃ ಇದು ಶಿವಣ್ಣನ ಬಗ್ಗೆ ಹೊರಬರುತ್ತಿರುವ ಪೂರ್ಣಪ್ರಮಾಣದ ಮೊದಲ ಪುಸ್ತಕ.

ಪ್ರಕಾಶಕರಾದ ಸುರೇಶ್ ಅವರು ಅನ್ನಪೂರ್ಣ ಪಬ್ಲಿಷಿಂಗ್ ಹೌಸ್ ಮುಖಾಂತರ ಈ ಪುಸ್ತಕವನ್ನು ಹೊರತರುತ್ತಿದ್ದಾರೆ. ಪುಸ್ತಕದಲ್ಲಿ ಸುಮಾರು 300 ಪುಟಗಳು ಇದ್ದು, 32 ಪುಟಗಳು ಬಣ್ಣದ ಫೋಟೋಗಳಿಗಾಗಿಯೇ ಮೀಸಲಿಡಲಾಗಿದೆ. ಶಿವಣ್ಣನ ಹುಟ್ಟುಹಬ್ಬದ ಹೊಸ್ತಿಲಲ್ಲಿ ಈ ಪುಸ್ತಕ ಬಿಡುಗಡೆ ಆಗಲಿದೆ.

ಶಿವಣ್ಣನ ಅಭಿಮಾನಿಗಳು ಈ ಪುಸ್ತಕಕ್ಕಾಗಿ ಎದುರು ನೋಡುತ್ತಿದ್ದಾರೆ.