ನಟಿಯ ಅಪಹರಣ ಪ್ರಕರಣ: ಮಲಯಾಳಂ ಇಂಡಸ್ಟ್ರಿ ಮತ್ತೆ ಅಲ್ಲೋಲ-ಕಲ್ಲೋಲ

'ಅಮ್ಮ'ಗೆ ಸೇರ್ಪಡೆಯಾದ ದಿಲೀಪ್

ನಟಿಯನ್ನ ಅಪಹರಣ ಮಾಡಿ, ದೌರ್ಜನ್ಯವೆಸೆಗಿರುವ ಆರೋಪದಲ್ಲಿ ಜೈಲು ಸೇರಿದ್ದ ನಟ ದಿಲೀಪ್ ಜಾಮೀನು ಪಡೆದು ಬಿಡುಗಡೆಯಾಗಿದ್ದರು. ಇದೀಗ, 'ಮಲಯಾಳಂ ಕಲಾವಿದರ ಸಂಘ'ಕ್ಕೆ ದಿಲೀಪ್ ಅವರನ್ನ ಮತ್ತೆ ಸೇರಿಸಿಕೊಳ್ಳಲಾಗಿದೆ. ಈ ಬಗ್ಗೆ ಅಸಮಾಧಾನಗೊಂಡಿರುವ ನಟಿಯರು ಸಂಘದಿಂದ ಹೊರ ನಡೆದಿದ್ದಾರೆ.

ನ್ಯಾಯ ಎಲ್ಲಿದೆ.?

ನಟಿಯ ಮೇಲೆ ಹಲ್ಲೆ ಮಾಡಿ, ಅಪಹರಣ ಮಾಡಿರುವ ಆರೋಪ ಹೊತ್ತಿರುವ ನಟನನ್ನ ಮತ್ತೆ ಕಲಾವಿದರ ಸಂಘಕ್ಕೆ ಕರೆದುಕೊಂಡು ಬಂದಿರುವುದು ದುರಂತ. ಈ ಪ್ರಕರಣದಲ್ಲಿ ಸಂಘಟನೆ ನಟಿಯ ಪರವಾಗಿ ನ್ಯಾಯ ಕೊಡಿಸಬೇಕಾಗಿತ್ತು. ಆದ್ರೆ, ಆರೋಪ ಹೊಂದಿರುವವರನ್ನೇ ರಕ್ಷಿಸುತ್ತಿದೆ. ಇದನ್ನ ಖಂಡಿಸುತ್ತೇವೆ ಎಂದು ಖ್ಯಾತ ನಟಿಯರು ಆಕ್ರೋಶ ಹೊರಹಾಕಿದ್ದಾರೆ.

'ಅಮ್ಮ'ದಿಂದ ಹೊರಬಂದ ನಾಲ್ಕು ನಟಿಯರು

ದಿಲೀಪ್ ಅವರನ್ನ 'ಅಮ್ಮ' ಸಂಘಕ್ಕೆ ಸೇರಿಸಿಕೊಂಡಿರುವ ಹಿನ್ನಲೆ, ನಟಿಯರಾದ ರಿಮಾ ಕಾಳಿಂಗಲ್, ರೆಮ್ಯಾ ನಂಬೀಸನ್, ಗೀತು ಮೋಹನ್ ದಾಸ್ ಹಾಗೂ ದೌರ್ಜನ್ಯಕ್ಕೆ ಒಳಗಾಗಿದ್ದ ನಟಿಯೂ ಸಂಘದ ತಮ್ಮ ಸ್ಥಾನ ತೊರೆದಿದ್ದಾರೆ. ಆದರೆ ಪ್ರಕರಣದಲ್ಲಿ ನಟಿಗೆ ನ್ಯಾಯ ಒದಗಿಸಿಕೊಡುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ದಿಲೀಪ್ ಮಾಜಿ ಪತ್ನಿ ಮಂಜು ವಾರಿಯರ್ ಇನ್ನೂ ಕೂಡ ತಮ್ಮ ಸ್ಥಾನದಲ್ಲಿ ಮುಂದುವರಿದಿದ್ದಾರೆ.

ಮೋಹನ್ ಲಾಲ್ ಹೊಸ ಅಧ್ಯಕ್ಷ

ಇತ್ತೀಚಿಗಷ್ಟೆ ನಟ ಮೋಹನ್ ಲಾಲ್ ಮಲಯಾಳಂ ಕಲಾವಿದರ ಸಂಘದ ನೂತನ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ. ಇದರ ಬೆನ್ನಲ್ಲೆ ದಿಲೀಪ್ ಅವರ ಸಂಘಕ್ಕೆ ಸೇರಿಸಿಕೊಂಡಿರುವುದು ಸಾಮಾನ್ಯವಾಗಿ ನಟಿಯರ ಆಕ್ರೋಶಕ್ಕೆ ಕಾರಣವಾಗಿದೆ.