ಮಂಡ್ಯ ಎಲೆಕ್ಷನ್ ಸೋತ ನಿಖಿಲ್ ಮುಂದಿನ ಸಿನಿಮಾ ಇದೇ ಆಗಬಹುದು.!

ರಾಜಕೀಯನಾ ಸಿನಿಮಾನಾ?

ಜಾಗ್ವಾರ್, ಸೀತಾರಾಮ ಕಲ್ಯಾಣ ಹಾಗೂ ಕುರುಕ್ಷೇತ್ರ ಸಿನಿಮಾದಲ್ಲಿ ನಟಿಸಿದ ನಂತರ ರಾಜಕೀಯಕ್ಕೆ ಪ್ರವೇಶ ಮಾಡಿದ್ದ ನಿಖಿಲ್, ಮೊದಲ ಹೆಜ್ಜೆಯಲ್ಲೇ ಸೋಲು ಕಂಡಿದ್ದಾರೆ. ಮುಂದಿನ ನಡೆ ರಾಜಕೀಯನಾ ಅಥವಾ ಸಿನಿಮಾನಾ ಎಂಬುದು ಸ್ವತಃ ಅವರಿಗೆ ಗೊಂದಲವಾಗಿರಬಹುದು. ಮುಂದಿನ ಚುನಾವಣೆ ಬರುವವರೆಗೂ ನಿಖಿಲ್ ಏನು ಮಾಡಲಿದ್ದಾರೆ ಎಂಬುದು ಸದ್ಯದ ಪ್ರಶ್ನೆ?

ಲೈಕಾ ಪ್ರೊಡಕ್ಷನ್ ಸಿನಿಮಾ.!

ಸೀತಾರಾಮ ಕಲ್ಯಾಣ ಸುದ್ದಿಗೋಷ್ಠಿಯಲ್ಲಿ ಸ್ವತಘ ನಿಖಿಲ್ ಕುಮಾರ್ ಮತ್ತು ಅವರ ಆಪ್ತರು ಹೇಳಿದಂತೆ ಲೈಕಾ ಪ್ರೊಡಕ್ಷನ್ ಜೊತೆ ಮುಂದಿನ ಸಿನಿಮಾ ಮಾತುಕತೆ ನಡೆಯುತ್ತಿದೆ. ಅಂತಿಮವಾದ ತಕ್ಷಣ ಸಿನಿಮಾ ಆರಂಭಿಸುತ್ತೇವೆ ಎಂದಿದ್ದರು. ಆದ್ರೆ, ಸಡನ್ ಆಗಿ ಮಂಡ್ಯ ಚುನಾವಣೆಯಲ್ಲಿ ಭಾಗಿಯಾದ ನಿಖಿಲ್ ಈಗ ಮತ್ತೆ ಲೈಕಾ ಪ್ರೊಡಕ್ಷನ್ ಜೊತೆ ಕೈಜೋಡಿಸಬಹುದು.!

ದೊಡ್ಡ ಬ್ಯಾನರ್ ಇದು

ಲೈಕಾ ಪ್ರೊಡಕ್ಷನ್ ಅಂದ್ರೆ ಸಾಮಾನ್ಯ ಸಂಸ್ಥೆಯಲ್ಲಿ. ಭಾರತೀಯ ಚಿತ್ರರಂಗದಲ್ಲಿ ಬಹುದೊಡ್ಡ ನಿರ್ಮಾಣ ಸಂಸ್ಥೆ. ಇತ್ತೀಚಿಗಷ್ಟೆ ಸೂಪರ್ ಸ್ಟಾರ್ ರಜನಿಕಾಂತ್ ಅಭಿನಯಿಸಿದ್ದ 2.0 ಚಿತ್ರ ನಿರ್ಮಿಸಿದ್ದು ಇದೇ ಸಂಸ್ಥೆ. ಇಂತಹ ಬ್ಯಾನರ್ ನಿಖಿಲ್ ಗೆ ಆಫರ್ ಮಾಡಿತ್ತು. ಈಗ ಆ ಮಾತುಕತೆ ಜೀವಂತವಾಗಿದ್ಯಾ ಅಥವಾ ಜೀವ ಕಳೆದುಕೊಂಡಿದ್ಯಾ ಗೊತ್ತಿಲ್ಲ.

ಜಯಣ್ಣ ಜೊತೆ ಸಿನಿಮಾ

ಲೈಕಾ ಪ್ರೊಡಕ್ಷನ್ ಸಂಸ್ಥೆಯ ಜೊತೆ ಜೊತೆಗೆ ಕನ್ನಡದ ಸ್ಟಾರ್ ನಿರ್ಮಾಪಕ ಜಯಣ್ಣ ಕಂಬೈನ್ಸ್ ಕೂಡ ನಿಖಿಲ್ ಜೊತೆ ಸಿನಿಮಾ ಮಾಡಲು ಮುಂದಾಗಿದ್ದರು ಎಂದು ಅದೇ ಸುದ್ದಿಗೋಷ್ಠಿಯಲ್ಲಿ ಹೇಳಿದ್ದರು. ಈಗಲೂ ಜಯಣ್ಣ ಬ್ಯಾನರ್ ಆ ಚಿತ್ರದ ಬಗ್ಗೆ ಮಾತುಕತೆ ಮುಂದುವರಿಸಲಿದ್ಯಾ ಎಂಬುದು ಸದ್ಯದ ಕುತೂಹಲವಾಗಿದೆ.

ಕುರುಕ್ಷೇತ್ರದ ಕಥೆ ಏನು?

ಕುರುಕ್ಷೇತ್ರ ಸಿನಿಮಾದಲ್ಲಿ ನಿಖಿಲ್ ಅಭಿಮನ್ಯು ಪಾತ್ರ ಮಾಡಿದ್ದಾರೆ. ಇದೇ ಚಿತ್ರದಲ್ಲಿ ದರ್ಶನ್ ದುರ್ಯೋಧನನ ಪಾತ್ರ ನಿರ್ವಿಸಿದ್ದಾರೆ. ಕುರುಕ್ಷೇತ್ರ ನಿರ್ಮಾಪಕ ಮುನಿರತ್ನ ಅವರು ನಿಖಿಲ್ ಗೆಲುವಿನ ಬಗ್ಗೆ ಕನಸು ಕಂಡಿದ್ದರು. ಈಗ ಆ ಕನಸು ಭಗ್ನವಾಗಿದೆ. ಕುರುಕ್ಷೇತ್ರ ಪ್ರಚಾರದಲ್ಲಿ ನಿಖಿಲ್ ಭಾಗವಹಿಸುತ್ತಾರಾ ಅಥವಾ ದರ್ಶನ್ ಇದ್ದಾರೆ ಎಂಬ ಕಾರಣಕ್ಕೂ ಈ ಸಿನಿಮಾದಿಂದ ದೂರ ಉಳಿಯಲಿದ್ದಾರಾ?