'ಕಲಿ' ಸಿನಿಮಾ ಬರುತ್ತಾ ಇಲ್ವಾ? : ನಿರ್ಮಾಪಕರ ಕಡೆಯಿಂದ ಬಂದ ಸ್ಪಷ್ಟನೆ

Recommended Video

ಅಂದುಕೊಂಡಂತೆ ಆಗಿದ್ದರೆ 'ದಿ ವಿಲನ್' ಸಿನಿಮಾದ ರೀತಿ 'ಕಲಿ' ಸಿನಿಮಾ ಸದ್ದು ಮಾಡಬೇಕಿತ್ತು. ಆದರೆ, ಈ ಸಿನಿಮಾ ಶುರು ಆಗುವುದಕ್ಕೆ ಮೊದಲೇ ನಿಂತು ಹೋಯ್ತು. ಅದ್ದೂರಿಯಾಗಿ ಮುಹೂರ್ತ ಆದ ಈ ಚಿತ್ರದ ಚಿತ್ರೀಕರಣವೆ ಶುರು ಆಗಲಿಲ್ಲ.

ಪ್ರೇಮ್ ಕೂಡ 'ಕಲಿ' ಚಿತ್ರವನ್ನು ಕೈ ಬಿಟ್ಟು 'ದಿ ವಿಲನ್' ಸಿನಿಮಾವನ್ನು ಶುರು ಮಾಡಿದರು. ಆ ಸಿನಿಮಾದ ನಟರಾದ ಶಿವರಾಜ್ ಕುಮಾರ್ ಹಾಗೂ ಸುದೀಪ್ ಅವರೆ 'ದಿ ವಿಲನ್' ನಲ್ಲಿ ನಟಿಸಿದರು. ಹಾಗಾದರೆ, 'ಕಲಿ' ಸಿನಿಮಾ ನಿಂತು ಹೋಯ್ತಾ ಎನ್ನುವ ಪ್ರಶ್ನೆ ಎಲ್ಲರಿಗೂ ಮೂಡಿತ್ತು. ಈ ಬಗ್ಗೆ ಇದೀಗ ಚಿತ್ರ ನಿರ್ಮಾಪಕ ಸಿ.ಆರ್.ಮನೋಹರ್ ಮಾತನಾಡಿದ್ದಾರೆ.

''ಕಲಿ' ನನ್ನ ಕನಸಿನ ಪ್ರಾಜೆಕ್ಟ್. ಆ ಸಿನಿಮಾವನ್ನು ಇಂದಲ್ಲ ನಾಳೆ ನಿರ್ಮಾಣ ಮಾಡುತ್ತೇನೆ. 'ಬಾಹುಬಲಿ' ರೇಂಜ್ ನಲ್ಲಿ ಆ ಸಿನಿಮಾ ಮಾಡುವ ಚಿಂತನೆ ಇದೆ. 'ಕಲಿ' ಒಂದು ಹಿಸ್ಟಾರಿಕಲ್ ಸಿನಿಮಾ. ನಾಲ್ಕು ಭಾಷೆಗಳಲ್ಲಿ ತಯಾರಾಗಲಿದೆ. ಪ್ರೇಮ್ ಅವರ ಪ್ರತಿ ಸಿನಿಮಾದಲ್ಲಿಯೂ ತಾಯಿಯ ಸೆಂಟಿಮೆಂಟ್ ಇರುತ್ತದೆ. ಅದೇ ರೀತಿ 'ಕಲಿ' ಚಿತ್ರದಲ್ಲಿ ಕೂಡ ತಾಯಿಯ ಮಮತೆ ಇರಲಿದೆ'' ಎಂದು ಹೇಳಿದ್ದಾರೆ.

'ಕಲಿ' ಚಿತ್ರ ಬಿಟ್ಟು 'ದಿ ವಿಲನ್' ಸಿನಿಮಾಗೆ ಬಂಡವಾಳ ಹಾಕಿದ್ದ ನಿರ್ಮಾಪಕ ಸಿ ಆರ್ ಮನೋಹರ್ 'ಕಲಿ' ಚಿತ್ರದ ಬಗ್ಗೆ ಸ್ಪಷ್ಟನೆ ನೀಡಿದ್ದಾರೆ. ಮುಂದೆ ಆ ಸಿನಿಮಾ ಮಾಡುತ್ತೇನೆ ಎಂದು ಸಿ ಆರ್ ಮನೋಹರ್ ತಿಳಿಸಿದ್ದಾರೆ.

ಅಂದಹಾಗೆ, ಇತ್ತೀಚಿಗಷ್ಟೆ 'ದಿ ವಿಲನ್' ಸಿನಿಮಾದ ಆಡಿಯೋ ಬಿಡುಗಡೆ ಕಾರ್ಯಕ್ರಮ ನಡೆದಿದ್ದು, ಈ ವೇಳೆ 'ಕಲಿ' ಸಿನಿಮಾದ ಬಗ್ಗೆ ಆರ್ ಮನೋಹರ್ ಮಾತನಾಡಿದ್ದಾರೆ.