'ಟಗರು 2' ಸಿನಿಮಾದಲ್ಲಿ ನಡೆಯಲಿದೆ ಎರಡು ಟಗರುಗಳ ಸಮಾಗಮ

'ಟಗರು 2' ಚಿತ್ರದಲ್ಲಿ ಪುನೀತ್

'ಟಗರು 2' ಸಿನಿಮಾ ಬರುವುದು ಪಕ್ಕಾ ಆಗಿದೆ. ದೊಡ್ಡ ಅಚ್ಚರಿ ಅಂದರೆ, ಈ ಸಿನಿಮಾದಲ್ಲಿ ಶಿವರಾಜ್ ಕುಮಾರ್ ಜೊತೆಗೆ ಪುನೀತ್ ರಾಜ್ ಕುಮಾರ್ ಸಹ ಅಭಿನಯಿಸಲಿದ್ದಾರಂತೆ. ಈ ಮೂಲಕ ದೊಡ್ಮನೆಯ ಸಹೋದರರನ್ನು ತೆರೆ ಮೇಲೆ ಒಂದು ಮಾಡುವ ದೊಡ್ಡ ಸಾಹಸಕ್ಕೆ ಸೂರಿ ಕೈ ಹಾಕಿದ್ದಾರೆ. ಇದು ನಿಜ ಆದರೆ ಮೊದಲ ಬಾರಿಗೆ ಶಿವಣ್ಣ - ಪುನೀತ್ ಒಂದೇ ಸಿನಿಮಾದಲ್ಲಿ ನಟಿಸುತ್ತಾರೆ.

ಎರಡು ಟಗರುಗಳ ಸಮಾಗಮ

'ಟಗರು 2' ಎಂಬುದು 'ಟಗರು' ಮುಂದುವರೆದ ಭಾಗ ಅಲ್ಲವಂತೆ. '2' ಎನ್ನುವುವಕ್ಕೆ ತಕ್ಕ ಹಾಗೆ ಎರಡು ಟಗರುಗಳ ಸಮಾಗಮ ಇಲ್ಲಿ ಆಗಲಿದೆಯಂತೆ. ಶಿವಣ್ಣ ಒಂದು ಟಗರು ಆಗಿದ್ದರೆ, ಅದರ ಜೊತೆಗೆ ನಿಲ್ಲುವ ಮತ್ತೊಂದು ಟಗರಾಗಿ ಅಪ್ಪು ಕಾಣಿಸಿಕೊಳ್ಳಲಿದ್ದಾರಂತೆ, ಇಬ್ಬರು ನಟರ ಅಭಿಮಾನಿಗಳನ್ನು ತಲೆಯಲ್ಲಿ ಇಟ್ಟುಕೊಂಡು ಕಥೆ ಮಾಡಿರುವ ಸೂರಿ. ಈ ಬಗ್ಗೆ ಸದ್ಯ ಪುನೀತ್ ಜೊತೆಗೆ ಮಾತುಕತೆ ನಡೆಸುತ್ತಿದ್ದಾರಂತೆ.

ರವಿವರ್ಮ ಚಿತ್ರದಲ್ಲಿ ನಟಿಸಬೇಕಿತ್ತು

ಈ ಹಿಂದೆ ರವಿವರ್ಮಾ ನಿರ್ದೇಶನದ ಸಿನಿಮಾದಲ್ಲಿ ಶಿವಣ್ಣ ಹಾಗೂ ಪುನೀತ್ ರಾಜ್ ಕುಮಾರ್ ಒಟ್ಟಿಗೆ ನಟಿಸುತ್ತಾರೆ ಎಂಬ ಸುದ್ದಿ ಇತ್ತು. ಆದರೆ ಸದ್ಯ ರವಿವರ್ಮ ಶಿವಣ್ಣನಿಗೆ ಮಾತ್ರ 'ರುಸ್ತುಂ' ಸಿನಿಮಾ ಮಾಡುತ್ತಿದ್ದಾರೆ.

ಅಪ್ಪುಗೆ 3 ಸಿನಿಮಾ, ಶಿವಣ್ಣನಿಗೆ 2 ಸಿನಿಮಾ ಮಾಡಿರುವ ಸೂರಿ

ಸೂರಿ ಈಗಾಗಲೇ ಪುನೀತ್ ಹಾಗೂ ಶಿವಣ್ಣ ಇಬ್ಬರ ಜೊತೆಗೆ ಕೆಲಸ ಮಾಡಿದ್ದಾರೆ. ಪುನೀತ್ ರಾಜ್ ಕುಮಾರ್ ಅವರ 'ಜಾಕಿ', 'ಅಣ್ಣಾಬಾಂಡ್', 'ದೊಡ್ಮನೆ ಹುಡ್ಗ' ಮತ್ತು ಶಿವರಾಜ್ ಕುಮಾರ್ ಅವರ 'ಕಡ್ಡಿಪುಡಿ', 'ಟಗರು' ಸಿನಿಮಾಗಳಿಗೆ ಸೂರಿ ಆಕ್ಷನ್ ಕಟ್ ಹೇಳಿದ್ದಾರೆ.