ಡ್ರಗ್ ಪೆಡ್ಲರ್ ಆಗಲಿದ್ದಾರೆ ಡಿಂಪಲ್ ಕ್ವೀನ್ ರಚಿತಾ ರಾಮ್

ಕೊಲಮಾವು ಕೋಕಿಲ ಸಿನಿಮಾ ರೀಮೇಕ್

ತಮಿಳಿನ ಸೂಪರ್ ಹಿಟ್ ಸಿನಿಮಾ 'ಕೊಲಮಾವು ಕೋಕಿಲ' ಸಿನಿಮಾವನ್ನು ಕನ್ನಡಕ್ಕೆ ರೀಮೇಕ್ ಮಾಡಲಾಗುತ್ತಿದೆ. ನಯನತಾರಾ ಮುಖ್ಯಭೂಮಿಕೆಯಲ್ಲಿದ್ದ ಈ ಸಿನಿಮಾದಲ್ಲಿ ಯೋಗಿ ಬಾಬು ಸಹ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಸಿನಿಮಾ ಸೂಪರ್ ಹಿಟ್ ಆಗಿತ್ತಲ್ಲದೆ, ವಿಮರ್ಶಕರ ಮೆಚ್ಚುಗೆಗೂ ಪಾತ್ರವಾಗಿತ್ತು.

ರಚಿತಾ ರಾಮ್ ನಾಯಕಿಯಾಗಿ ಆಯ್ಕೆ

'ಕನ್ನಡ್ ಗೊತ್ತಿಲ್ಲ' ಸಿನಿಮಾ ನಿರ್ದೇಶಿಸಿದ್ದ ಮಯೂರ್ ರಾಘವೇಂದ್ರ 'ಕೊಲಮಾವು ಕೋಕಿಲ' ಸಿನಿಮಾದ ಕನ್ನಡ ರೀಮೇಕ್ ಅನ್ನು ನಿರ್ದೇಶಿಸುತ್ತಿದ್ದು, ಪ್ರಸ್ತುತ ನಾಯಕಿ ಪಾತ್ರಕ್ಕೆ ರಚಿತಾ ರಾಮ್ ಅವರನ್ನು ಒಪ್ಪಿಸಿದ್ದಾರೆ. ಇನ್ನುಳಿದ ಪಾತ್ರಗಳಿಗೆ ಆಯ್ಕೆ ನಡಯುತ್ತಿದೆ.

ಯೋಗಿ ಬಾಬು ಪಾತ್ರಕ್ಕೆ ಯಾರು?

ತಮಿಳಿನ ಮೂಲ ಸಿನಿಮಾದಲ್ಲಿ ಯೋಗಿ ಬಾಬು ನಟಿಸಿದ್ದ ಅತ್ಯಂತ ಪ್ರಮುಖ ಪಾತ್ರವನ್ನು ಕನ್ನಡದಲ್ಲಿ ಯಾರ ಕೈಲಿ ಮಾಡಿಸಬೇಕು ಎಂಬ ಅನುಮಾನ ನಿರ್ದೇಶಕರನ್ನು ಕಾಡುತ್ತಿದೆಯಂತೆ. ಆ ಪಾತ್ರಕ್ಕೆ ನಟರ ಹುಡುಕಾಟ ನಡೆಯುತ್ತಿದೆ, ಯಾರೂ ಸಿಗದಿದ್ದಲ್ಲಿ ತಮಿಳಿನ ಯೋಗಿ ಬಾಬು ಅವರನ್ನೇ ಕರೆತರಲಾಗುವುದು ಎಂದಿದ್ದಾರೆ ಮಯೂರ್ ರಾಘವೇಂದ್ರ.

ಪಂಕಜ ಕಸ್ತೂರಿ ಹೆಸರಿಡುವ ಯೋಚನೆ

ಸಿನಿಮಾಕ್ಕೆ 'ಪಂಕಜ ಕಸ್ತೂರಿ' ಎಂಬ ಹೆಸರಿಡುವ ಆಲೋಚನೆ ನಿರ್ದೇಶಕರಿಗೆ ಇದೆ. ಆದರೆ ಅಧಿಕೃತವಾಗಿ ಹೆಸರು ಅಂತಿಮಗೊಳಿಸಿಲ್ಲ. ಸಿನಿಮಾದ ಚಿತ್ರೀಕರಣ ಇನ್ನೆರಡು ತಿಂಗಳಲ್ಲಿ ಪ್ರಾರಂಭವಾಗಲಿದೆಯಂತೆ.