ನಿಮ್ಮ ಪಾದಗಳಿಗೆ ನಮಸ್ಕಾರ ಮಾಡುವೆ, ಹೀಗೆ ಮಾಡಬೇಡಿ: ರಾಘವೇಂದ್ರ ರಾಜ್‌ಕುಮಾರ್ ಮನವಿ

ಅಪ್ಪು ಪತ್ನಿ ಬಹಳ ಬೇಸರ ಮಾಡಿಕೊಂಡಿದ್ದಾರೆ: ರಾಘವೇಂದ್ರ ರಾಜ್‌ಕುಮಾರ್

''ನಮ್ಮ ಕುಟುಂಬ, ಅದು ನಿಮ್ಮದೇ ಕುಟುಂಬ. ಇಷ್ಟು ಜನರ ಸಾವಿಗೆ ಪುನೀತ್ ರಾಜ್‌ಕುಮಾರ್ ಸಾವು ಕಾರಣಾಯ್ತು ಎಂಬ ಕೆಟ್ಟ ಹೆಸರು ನಿಮ್ಮ ಕುಟುಂಬಕ್ಕೆ ಬರಬೇಕಾ? ದಯವಿಟ್ಟು ಹೀಗೆ ಮಾಡಬೇಡಿ, ಈಗಾಗಲೇ ಇರುವ ನೋವನ್ನು ಮತ್ತೆ ಹೆಚ್ಚಿಸಬೇಡಿ. ಸಾವು ಯಾವುದಕ್ಕೂ ಉತ್ತರ ಅಲ್ಲ. ಅಪ್ಪು ಪತ್ನಿ ಬಹಳ ಬೇಸರ ಮಾಡಿಕೊಂಡಿದ್ದಾರೆ, ನನ್ನ ಪತಿ ಇಂಥಹುದ್ದಕ್ಕೆ ಕಾರಣ ಆಗಿಬಿಟ್ಟರಲ್ಲ ಎಂದು ಅವರು ಬೇಸರ ತೋಡಿಕೊಂಡಿದ್ದಾರೆ'' ಎಂದರು ರಾಘವೇಂದ್ರ ರಾಜ್‌ಕುಮಾರ್.

ನಿಮ್ಮ ಪಾದಗಳಿಗೆ ನಮಸ್ಕಾರ ಹೇಳುವೆ: ರಾಘಣ್ಣ

''ಅಪ್ಪಾಜಿಯವರು ಅಭಿಮಾನಿಗಳನ್ನು ದೇವರು ಎಂದು ಕರೆದಿದ್ದಾರೆ. ದೇವರೇ ಇಂಥಹಾ ಕೆಲಸ ಮಾಡಿದರೆ ಹೇಗೆ. ಅಭಿಮಾನಿಗಳು ದಯವಿಟ್ಟು ನಿಮ್ಮ-ನಿಮ್ಮ ತಂದೆ-ತಾಯಿಯರ ಬಗ್ಗೆ ಯೋಚನೆ ಮಾಡಿ. ಚಿಕ್ಕಮಕ್ಕಳಿಗೆ ಇದು ಮಾದರಿಯಾಗುವುದಿಲ್ಲ. ತಮ್ಮನ ಹೆಂಡತಿ, ಮಕ್ಕಳು ಈಗಾಗಲೇ ನೊಂದುಕೊಂಡಿದ್ದಾರೆ. ಹೀಗೆ ಮಾಡಿದರೆ ಅದು ಅವರಿಗೆ ಇನ್ನಷ್ಟು ನೋವು ನೀಡುತ್ತದೆ. ನಿಮ್ಮ ಪಾದಗಳಿಗೆ ನಮಸ್ಕಾರ ಮಾಡುವೆ ಹೀಗೆ ಮಾಡಬೇಡಿ'' ಎಂದರು.

''ಅವರ ಪ್ರೀತಿಯನ್ನು ನಮ್ಮ ಹೃದಯಕ್ಕೆ ಇಳಿಸಿಕೊಳ್ಳುವುದು ನಮ್ಮ ಜವಾಬ್ದಾರಿ''

ಎತ್ತಿನ ಬಂಡಿಗಳಲ್ಲಿ, ಕಾಲ್ನಡಿಗೆಯಲ್ಲಿ ಅಭಿಮಾನಿಗಳು ಬರುತ್ತಿದ್ದಾರೆ ಅವರನ್ನು ನೀವು ಭೇಟಿ ಮಾಡುತ್ತಿದ್ದೀರಿ ಎಂಬ ಬಗ್ಗೆ ಪತ್ರಕರ್ತರು ರಾಘಣ್ಣನ ಪ್ರತಿಕ್ರಿಯೆ ಬಯಸಿದಾಗ, ''ಅದು ನಮ್ಮ ಜವಾಬ್ದಾರಿ, ಅಭಿಮಾನಿಗಳನ್ನು ಗೌರವಿಸಿ, ಅವರನ್ನು ಮಾತನಾಡಿಸಬೇಕು, ತಬ್ಬಿಕೊಳ್ಳಬೇಕು ನಮ್ಮ ಪ್ರೀತಿಯನ್ನು ವ್ಯಕ್ತಪಡಿಸಬೇಕು, ಅವರ ಪ್ರೀತಿಗೆ ನಾವು ನಮಸ್ಕಾರ ಹೇಳಬೇಕು, ಅವರ ಪ್ರೀತಿಯನ್ನು ನಮ್ಮ ಹೃದಯದೊಳಕ್ಕೆ ಸೇರಿಸಿಕೊಳ್ಳಬೇಕು, ಆ ಕಾರ್ಯವನ್ನು ನಾವು ಮಾಡುತ್ತಿದ್ದೇವೆ'' ಎಂದು ಅಭಿಮಾನಿಗಳ ಮೇಲೆ ದೊಡ್ಮನೆಗೆ ಇರುವ ಗೌರವವನ್ನು ಮಾತುಗಳಲ್ಲಿ ವ್ಯಕ್ತಪಡಿಸಿದರು ರಾಘಣ್ಣ.

ಅಪ್ಪುವನ್ನು ನೋಡಲು ಜನ ಬರುತ್ತಲೇ ಇದ್ದಾರೆ: ರಾಘವೇಂದ್ರ ರಾಜ್‌ಕುಮಾರ್

''ಅಪ್ಪು ಅವರ ಸ್ಥಳಕ್ಕೆ (ಸಮಾಧಿ) ಜನ ಬರುತ್ತಲೇ ಇದ್ದಾರೆ. ಸಿನಿಮಾ ನೋಡಲು ಬರುವಂತೆ ಅಲ್ಲ, ತಂದೆ-ತಾಯಿ, ಮಕ್ಕಳು, ಮೊಮ್ಮಕ್ಕಳು, ವಯಸ್ಸಾದವರು ಹೀಗೆ ಕುಟುಂಬಗಳೇ ಬಂದು ದರ್ಶನ ಮಾಡುತ್ತಿದ್ದಾರೆ'' ಎಂದ ರಾಘಣ್ಣ, ''ಸುದ್ದಿವಾಹಿನಿಯರೂ ದಯವಿಟ್ಟು ಹೇಳಿ ಅಭಿಮಾನಿಗಳು ಹೀಗೆ ಮಾಡಬಾರದೆಂದು, ಸುಮಾರು 12 ಜನ ಸಾವಿಗೀಡಾಗಿದ್ದಾರೆ ಎಂದು ಸುದ್ದಿ ಬರುತ್ತಿದೆ. ಹೀಗೆ ಆಗಬಾರದು ನೀವು ಎಚ್ಚರ ಹೇಳಿ'' ಎಂದು ಮಾಧ್ಯಮದವರಲ್ಲಿ ಮನವಿ ಮಾಡಿದರು ರಾಘಣ್ಣ.