ಬಾರೇ ಬಾರೇ ರಾಜಕುಮಾರಿ ಸಾಂಗ್​ ಹಿಟ್​ ಬೆನ್ನಲ್ಲೇ ತೆರೆ ಮೇಲೆ ಧುಮ್ಮಿಕ್ಕಲು ಸಿದ್ಧ '​ರಾಜ ರಾಣಿ ರೋರರ್ ರಾಕೆಟ್'

ಚಿತ್ರರಂಗದಲ್ಲಿ ದಿನ ದಿನವೂ ಹೊಸ ಪ್ರಯೋಗ ನಡೆಯುತ್ತಿರುತ್ತದೆ. ಜೊತೆಗೆ ಶೃದ್ಧೆಯಿಂದ ಈ ಕ್ಷೇತ್ರದಲ್ಲಿ ತೊಡಗಿಸಿಕೊಂಡ ವ್ಯಕ್ತಿ ಕೂಡ ಬೆಳೆಯುತ್ತಾನೆ. ಅದಕ್ಕೆ ಸಾಕ್ಷಿ ಎಂಬಂತೆ ಚುಟು ಚುಟ ಹಾಡಿನ ಮೂಲಕ ಖ್ಯಾತಿ ಪಡೆದ ನೃತ್ಯ ನಿರ್ದೇಶಕ ಭೂಷಣ್​ ಹೀರೋ ಆಗಿ ಬಡ್ತಿ ಪಡೆದಿದ್ದಾರೆ. ನೃತ್ಯ ನಿರ್ದೇಶಕನಾಗಿ ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟ ಭೂಷಣ್​ ಇಂದು ನಾಯಕ ನಟನಾಗಿ ತೆರೆ ಮೇಲೆ ಮಿಂಚಲು ಸಜ್ಜಾಗಿದ್ದಾರೆ.

ಪುನೀತ್​ ರಾಜ್​ ಕುಮಾರ್​ ಅಭಿನಯದ ನಟಸಾರ್ವಭೌಮ, ರಿಷಬ್​ ಶೆಟ್ಟಿ ಅಭಿನಯದ ಬೆಲ್​ ಬಾಟಮ್​, ಶರಣ್​ ಅಭಿನಯದ ರ್ಯಾಂಬೊ-2 ಸೇರಿದಂತೆ ಸುಮಾರು 50ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನೃತ್ಯ ನಿರ್ದೇಶಕನಾಗಿ ಕೆಲಸ ಮಾಡಿದ್ದ ಭೂಷಣ್​ ಚುಟು..ಚುಟು..ಅಂತೈತಿ ಹಾಡಿನ ಮೂಲಕ ಖ್ಯಾತಿ ಪಡೆದಿದ್ದರು. ಸಾಲು ಸಾಲು ಹಿಟ್ ​ ಸಿನಿಮಾಗಳ ನಾಯಕರಿಗೆ ಹೆಜ್ಜೆ ಹಾಕಿಸಿದ್ದ ಭೂಷಣ್,​ ರಾಜ ರಾಣಿ ರೋರರ್ ರಾಕೆಟ್ ಚಿತ್ರದ ಮೂಲಕ​ ನಾಯಕ ನಟನಾಗಿ ಆಗಿ ಬೆಳ್ಳಿ ತೆರೆಗೆ ಎಂಟ್ರಿ ಕೊಡುತ್ತಿದ್ದಾರೆ.

ಕೆಂಪೇಗೌಡ ಮಾಗಡಿ ನಿರ್ದೇಶನದ ರಾಜ ರಾಣಿ ರೋರರ್ ರಾಕೆಟ್ ಚಿತ್ರದ ಕೆಲಸಗಳು ಪೂರ್ಣಗೊಂಡಿದ್ದು, ಚಿತ್ರ ತೆರೆ ಕಾಣಲು ಸಜ್ಜಾಗಿದೆ. ಇದೇ ಸಪ್ಟೆಂಬರ್​ 23ರಂದು ಚಿತ್ರ ಬಿಡುಗಡೆ ಮಾಡಲು ಚಿತ್ರತಂಡ ನಿರ್ಧರಿಸಿದೆ. ಹೊಸ ನಾಯಕನ ಪರಿಚಯದ ಜೊತೆಗೆ ಹೊಸ ಪ್ರಯೋಗ ಮಾಡಲು ಹೊರಟಿರುವ ರಾಜ ರಾಣಿ ರೋರರ್ ರಾಕೆಟ್ ಚಿತ್ರತಂಡಕ್ಕೆ ಲಕ್ಕಿ ಮ್ಯಾನ್​ ನಿರ್ದೇಶಕ ನಾಗೇಂದ್ರ ಪ್ರಸಾದ್​ ಸಾಥ್ ​ ನೀಡಿದ್ದಾರೆ. ಚಿತ್ರತಂಡವನ್ನು ಭೇಟಿಯಾಗಿರುವ ನಾಗೇಂದ್ರ ಪ್ರಸಾದ್,​ ಚಿತ್ರತಂಡಕ್ಕೆ ಶುಭಾಶಯ ಕೋರಿದ್ದಾರೆ.

ಇನ್ನು ರಾಜ ರಾಣಿ ರೋರರ್ ರಾಕೆಟ್ ಚಿತ್ರದ ಬಾರೇ..ಬಾರೇ..ರಾಜಕುಮಾರಿ ಹಾಡು ಸಖತ್​ ಹಿಟ್​ ಆಗಿದ್ದು, ಸಂಜಿತ್​ ಹೆಗ್ಡೆ ಧ್ವನಿಗೆ ಕೇಳುಗರು ಮನಸೋತಿದ್ದಾರೆ. ಯೂಟ್ಯೂಬ್​ನಲ್ಲಿ ಈಗಾಗಲೇ 1 ಮಿಲಿಯನ್​ಗೂ ಅಧಿಕ ವ್ಯೂವ್​ ಕಂಡಿರುವ ಬಾರೇ..ಬಾರೇ..ರಾಜಕುಮಾರಿ ಹಾಡು ಇನ್ಸ್ಟಾಗ್ರಾಮ್​ ರೀಲ್ಸ್​ನಲ್ಲೂ ವೈರಲ್ ​ ಆಗಿದೆ. ಹಾಡಿನಲ್ಲಿ ನಟ ಭೂಷಣ್​ ಹಾಕಿರುವ ಸ್ಟೆಪ್ಸ್​ ಕೂಡ ವೈರಲ್​ ಆಗಿದ್ದು, ಸೋಶಿಯಲ್​ ಮೀಡಿಯಾದಲ್ಲಿ ಎಳೆಯರಿಂದ ಹಿರಿಯರವರೆಗೂ ಈ ಹಾಡಿಗೆ ಹೆಜ್ಜೆಗೆ ಹಾಕಿದ್ದಾರೆ.

ರಾಜ ರಾಣಿ ರೋರರ್ ರಾಕೆಟ್ ಎನ್ನುವುದು ನಾಲ್ಕು ಪ್ರಮುಖ ಪಾತ್ರಗಳ ಹೆಸರಾಗಿದ್ದು, ಭೂಷಣ್​, ಮಾನ್ಯ, ಸಂತೋಷ್​, ಮನೋಜ್​ ಕುಮಾರ್​, ಎಂ.ಡಿ ಕೌಶಿಕ್​ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇನ್ನು ಹಿರಿಯ ನೃತ್ಯ ನಿರ್ದೇಶಕ ಮೂಗೂರು ಸುಂದರ್ ಚಿತ್ರದಲ್ಲಿ​ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇನ್ನು ಕೆಂಪೇಗೌಡ ಮಾಗಡಿ ಅವರ ನಿರ್ದೇಶನದಲ್ಲಿ ಮೂಡಿಬಂದಿರುವ ರಾಜ ರಾಣಿ ರೋರರ್ ರಾಕೆಟ್ ಚಿತ್ರಕ್ಕೆ ಲೇಖನ ಕ್ರಿಯೇಷನ್ಸ್ ಲಾಂಛನದಲ್ಲಿ ನಾಗರಾಜ್ ಪಿ ಅಜ್ಜಂಪುರ ಬಂಡವಾಳ ಹೂಡಿದ್ದಾರೆ.