ಮದುವೆ ದಿನಾಂಕ ಘೋಷಿಸಿದ್ರಾ ಧನಂಜಯ್? ಮೋಹಕ ತಾರೆ ರಮ್ಯಾಗೂ ಇದೇ ಅನುಮಾನ!

ಧನು ಪ್ರಶ್ನೆಗೆ ಉತ್ತರ ಏನು?

ಸದ್ಯ ಧನು ಸ್ನೇಹಿತರು ಹಾಗೂ ಅಭಿಮಾನಿಗಳು 12 - 1 = 23 ಲೆಕ್ಕ ಬಿಡಿಸುವ ಪ್ರಯತ್ನ ಮಾಡುತ್ತಿದ್ದಾರೆ. ಊ ಹ್ಞೂಂ ಯಾರಿಗೂ ಸರಿಯಾದ ಉತ್ತರ ಸಿಗುತ್ತಿಲ್ಲ. ಕೆಲವರು ಇದು ಡಾಲಿ ಮುಂದಿನ ಸಿನಿಮಾ ಟೈಟಲ್ ಎನ್ನುತ್ತಿದ್ದಾರೆ. ಮುಂದಿನ ವರ್ಷ ಡಿಸೆಂಬರ್ 1ಕ್ಕೆ 'ಟಗರು ಪಲ್ಯ' ರಿಲೀಸ್? ಜನವರಿ 12ಕ್ಕೆ 'ಬಡವ ರಾಸ್ಕಲ್' ಸೀಕ್ವೆಲ್ ಮುಹೂರ್ತ? ಡಿಸೆಂಬರ್ 1ಕ್ಕೆ ಉತ್ತರಕಾಂಡ ರಿಲೀಸ್? 12 - 1 = 23 ಲೆಕ್ಕಕ್ಕೆ ಉತ್ತರ ಸೊನ್ನೆ, ಹಾಗಾಗಿ ಅವರ ಮುಂದಿನ ಸಿನಿಮಾ ಹೆಸರು ಸೊನ್ನೆ, ಅಥವಾ ಶೂನ್ಯ. ಇಲ್ಲ ಧನು ಮುಂದಿನ ಚಿತ್ರಕ್ಕೆ ನಿರ್ದೇಶಕ ಶೂನ್ಯ ಆಕ್ಷನ್ ಕಟ್ ಹೇಳ್ತಾರೆ? ಹೀಗೆ ಒಬ್ಬೊಬ್ಬರು ಒಂದೊಂದು ಕಾಮೆಂಟ್ ಮಾಡುತ್ತಿದ್ದಾರೆ.

ಧನು ಮದುವೆ ಡೇಟ್ ಎಂದ ರಮ್ಯಾ

ಮೋಹಕ ತಾರೆ ನಟಿ ರಮ್ಯಾ ಕೂಡ ಧನಂಜಯ ಅವರ ಈ ನಿಗೂಢವಾದ ಪೋಸ್ಟ್‌ಗೆ ಕಾಮೆಂಟ್ ಮಾಡಿದ್ದಾರೆ. 12 - 1 = 23 ನಿಮ್ಮ ಮದುವೆ ದಿನಾಂಕ ಎಂದು ಕಾಮೆಂಟ್ ಮಾಡಿದ್ದಾರೆ. ರಮ್ಯಾ ಅವರ ಕಾಮೆಂಟ್‌ಗೂ ಸಿಕ್ಕಾಪಟ್ಟೆ ಕಾಮೆಂಟ್‌ಗಳು ಸಿಗುತ್ತಿದೆ. ಧನಂಜಯ ಮಾತ್ರ ಯಾವುದಕ್ಕೂ ಉತ್ತರಿಸದೇ ಮೌನಕ್ಕೆ ಜಾರಿದ್ದಾರೆ. ಒಟ್ನಲ್ಲಿ ತಮ್ಮ ಮುಂದಿನ ಪ್ರಾಜೆಕ್ಟ್ ಬಗ್ಗೆ ಈ ವಿಡಿಯೋ ಮೂಲಕ ಗಮನ ಸೆಳೆಯುವಲ್ಲಿ ಡಾಲಿ ಸಕ್ಸಸ್ ಕಂಡಿದ್ದಾರೆ.

ಧನಂಜಯ್ ಮದುವೆ ಯಾವಾಗ?

ಇತ್ತೀಚೆಗಷ್ಟೆ ನಟ ವಸಿಷ್ಠ ಸಿಂಹ ಹಾಗೂ ನಟಿ ಹರಿಪ್ರಿಯಾ ಮದುವೆ ನಿಶ್ಚಿತಾರ್ಥ ನೆರವೇರಿತ್ತು. ಆ ಸಮಯದಲ್ಲಿ ಧನು ಆತ್ಮೀಯ ಗೆಳೆಯನಿಗೆ ಟ್ವೀಟ್ ಮಾಡಿ ಶುಬ ಹಾರೈಸಿದ್ದರು. ಆದರೆ ಅಭಿಮಾನಿಗಳು ನಿಮ್ಮ ಮದುವೆ ಯಾವಾಗ ಸರ್ ಎಂದು ಕೇಳಿದ್ದರು. ಹಲವು ದಿನಗಳಿಂದ ಧನುಗೆ ಈ ಪ್ರಶ್ನೆ ಎದುರಾಗುತ್ತಲೇ ಇದೆ. ಆದರೆ ಎಲ್ಲದಕ್ಕೂ ಜಾಣ್ಮೆಯ ಉತ್ತರ ಕೊಟ್ಟು ಜಾರಿಕೊಳ್ಳುತ್ತಿದ್ದಾರೆ.

ಶೀಘ್ರದಲ್ಲೇ 'ಪುಷ್ಪ' ಶೂಟಿಂಗ್‌ನಲ್ಲಿ ಭಾಗಿ

ಇತ್ತೀಚೆಗೆ ಧನಂಜಯ ನಟನೆಯ 'ತೋತಾಪುರಿ', 'ಮಾನ್ಸೂನ್ ರಾಗ' ಹಾಗೂ 'ಹೆಡ್‌ಬುಷ್' ಸಿನಿಮಾಗಳು ಬಿಡುಗಡೆಯಾಗಿತ್ತು. 'ಜಮಾಲಿಗುಡ್ಡ' ರಿಲೀಸ್‌ಗೆ ರೆಡಿಯಾಗಿದೆ. ತಮಿಳಿನ ಒಂದು ಚಿತ್ರದಲ್ಲಿ ನಟಿಸಿ ಬಂದಿದ್ದಾರೆ. 'ಹೊಯ್ಸಳ' ಹಾಗೂ 'ಉತ್ತರಕಾಂಡ' ಸಿನಿಮಾಗಳ ಚಿತ್ರೀಕರಣ ನಡೀತಿದೆ. ಈಗಾಗಲೇ 'ಪುಷ್ಪ'- 2 ಚಿತ್ರೀಕರಣ ಶುರುವಾಗಿದ್ದು, ಶೀಘ್ರದಲ್ಲೇ ಜಾಲಿ ರೆಡ್ಡಿಯಾಗಿ ಸೆಟ್‌ಗೆ ಎಂಟ್ರಿ ಕೊಡಲಿದ್ದಾರೆ.