ಒಂದೇ ಚಿತ್ರಮಂದಿರದಲ್ಲಿ 1 ಲಕ್ಷ ಟಿಕೆಟ್ ಮಾರಾಟ; ಮತ್ತೊಂದು ಅಮೋಘ ದಾಖಲೆ ಬರೆದ ಕಾಂತಾರ!

ಒಂದೇ ಚಿತ್ರಮಂದಿರದಲ್ಲಿ ಲಕ್ಷ ಟಿಕೆಟ್ ಸೇಲ್!

ಕಾಂತಾರ ಕನ್ನಡ ಅವತರಣಿಕೆ ಅಕ್ಟೋಬರ್ 23ರ ಭಾನುವಾರಕ್ಕೆ 24 ದಿನಗಳನ್ನು ಪೂರೈಸಿದೆ ಹಾಗೂ ಈ ದಿನದಂದು ಬೆಂಗಳೂರಿನ ಮಾಗಡಿ ರಸ್ತೆಯಲ್ಲಿರುವ ವೀರೇಶ್ ಸಿನಿಮಾಸ್ ಚಿತ್ರಮಂದಿರದಲ್ಲಿ ಕಾಂತಾರ ನೂತನ ದಾಖಲೆಯೊಂದನ್ನು ಬರೆದಿದೆ. ವೀರೇಶ್ ಚಿತ್ರಮಂದಿರದಲ್ಲಿ 24 ದಿನಗಳಲ್ಲಿ ಕಾಂತಾರ ಚಿತ್ರದ 100,900 ಟಿಕೆಟ್‌ಗಳು ಮಾರಾಟಗೊಂಡಿವೆ. ಇದು ವೀರೇಶ್ ಚಿತ್ರಮಂದಿರದ ಇತಿಹಾಸದಲ್ಲಿಯೇ ನಿರ್ಮಾಣಗೊಂಡ ನೂತನ ದಾಖಲೆಯಾಗಿದೆ.

ವೀರೇಶ್ ಹಾಗೂ ಊರ್ವಶಿ ಚಿತ್ರಮಂದಿರದಲ್ಲಿ ಕೋಟಿ ಗಳಿಕೆ

ಅಷ್ಟೇ ಅಲ್ಲದೆ ಬೆಂಗಳೂರಿನ ಪ್ರಮುಖ ಚಿತ್ರಮಂದಿರಗಳಾದ ವೀರೇಶ್ ಹಾಗೂ ಊರ್ವಶಿಯಲ್ಲಿ ಕಾಂತಾರ ಚಿತ್ರ 1 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿದೆ ಎಂಬ ವಿಚಾರವನ್ನು ಬಾಕ್ಸ್ ಆಫೀಸ್ ಪರಿಣಿತರು ತಿಳಿಸಿದ್ದಾರೆ. ಈ ಮೂಲಕ ಕೆಜಿಎಫ್ ಚಾಪ್ಟರ್ 2 ನಂತರ ಊರ್ವಶಿ ಚಿತ್ರಮಂದಿರದಲ್ಲಿ ಕೋಟಿ ಗಳಿಕೆ ಮಾಡಿದ ಚಿತ್ರ ಎಂಬ ಹೆಗ್ಗಳಿಕೆಗೆ ಕಾಂತಾರ ಪಾತ್ರವಾಗಿದೆ. ಅಷ್ಟೇ ಅಲ್ಲದೇ ನಗರದ ವೀರೇಶ್, ಊರ್ವಶಿ ಹಾಗೂ ವಿಕ್ಟರಿ ಚಿತ್ರಮಂದಿರಗಳಲ್ಲಿ ಕಾಂತಾರ ನಾಲ್ಕನೇ ವಾರವೂ ಯಶಸ್ವೀ ಪ್ರದರ್ಶನ ಕಂಡಿರುವುದು ಇತ್ತೀಚಿನ ದಿನಗಳಲ್ಲಿ ಅಪರೂಪದ ಸಂಗತಿಯಾಗಿದೆ.

ಕಾಂತಾರಕ್ಕೆ ಜೈ ಎಂದ ರಜನಿಕಾಂತ್

ಕಾಂತಾರ ಚಿತ್ರವನ್ನು ದಕ್ಷಿಣ ಭಾರತ ಚಿತ್ರರಂಗದ ಹಾಗೂ ಬಾಲಿವುಡ್ ಚಿತ್ರರಂಗದ ಹಲವಾರು ತಾರೆಯರು ವೀಕ್ಷಿಸಿ ಕೊಂಡಾಡಿದ್ದರು. ಅದರಂತೆ ಇದೀಗ ರಜನೀಕಾಂತ್ ಕೂಡ ಕಾಂತಾರ ಚಿತ್ರವನ್ನು ವೀಕ್ಷಿಸಿದ್ದು ಗೊತ್ತಿರುವುದಕ್ಕಿಂತ ಗೊತ್ತಿಲ್ಲದಿರುವುದೇ ಹೆಚ್ಚು ಎಂಬುದನ್ನು ಹೊಂಬಾಳೆ ಫಿಲ್ಮ್ಸ್ ನಿರ್ಮಾಣದ ಕಾಂತಾರ ಚಿತ್ರಕ್ಕಿಂತ ಬೇರೆ ಯಾರೂ ಸಹ ಸಿನಿಮಾ ಮೂಲಕ ಅಚ್ಚುಕಟ್ಟಾಗಿ ತೋರಿಸಲು ಸಾಧ್ಯವಿಲ್ಲ ಎಂದು ತಮ್ಮ ಟ್ವಿಟರ್ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ. ಅಷ್ಟೇ ಅಲ್ಲದೆ ರಿಷಬ್ ಶೆಟ್ಟಿ ಕುರಿತು ಮೆಚ್ಚುಗೆ ವ್ಯಕ್ತಪಡಿಸಿದ ರಜನಿಕಾಂತ್ ಕಾಂತಾರ ಚಿತ್ರ ಭಾರತೀಯ ಚಿತ್ರರಂಗದ ಮಾಸ್ಟರ್ ಪೀಸ್ ಎಂದಿದ್ದಾರೆ.