ಗಾಂಧಿನಗರದಲ್ಲಿ ದಾಖಲೆ ನಿರ್ಮಿಸಿದ ಶಿವಣ್ಣನ ಕಟೌಟ್

ಇದೇ ವಾರ ತೆರೆಗೆ ಬರುವುದಕ್ಕೆ ರೆಡಿಯಾಗಿರುವ 'ಬಂಗಾರ ಸನ್ ಆಫ್ ಬಂಗಾರದ ಮನುಷ್ಯ' ಸಿನಿಮಾ ರಿಲೀಸ್ ಗೂ ಮೊದಲೇ ದಾಖಲೆಯೊಂದನ್ನ ಬರೆದಿದೆ. ಆದರೆ ಈ ಚಿತ್ರ ದಾಖಲೆ ಮಾಡಿರುವುದು ಹಣದ ಮೂಲಕ ಅಲ್ಲ, ಅಭಿಮಾನದ ಮೂಲಕ.!

'ಬಂಗಾರ ಸನ್ ಆಫ್ ಬಂಗಾರದ ಮನುಷ್ಯ' ಚಿತ್ರದ ರಿಲೀಸ್ ಪ್ರಯುಕ್ತ ದೊಡ್ಮನೆ ಭಕ್ತರು ಬರೋಬ್ಬರಿ 35 ಅಡಿ ಎತ್ತರದ ಕಟೌಟ್ ನಿಲ್ಲಿಸಿ ದಾಖಲೆ ಮಾಡಿದ್ದಾರೆ. ಕೆ.ಜಿ ರಸ್ತೆಯಲ್ಲಿ ಈ ರೀತಿಯ ಬೃಹತ್ ಕಟೌಟ್ ರಾರಾಜಿಸುತ್ತಿರುವುದು ಇದೇ ಮೊದಲ ಬಾರಿಗೆ.

ಫಿಲ್ಮ್ ಚೇಂಬರ್ ಅಧ್ಯಕ್ಷ ಸಾ.ರಾ.ಗೋವಿಂದು ಈ ಕಟೌಟ್ ನ ಉದ್ಘಾಟಿಸಿದರು. ಶಿವರಾಜ್ ಕುಮಾರ್ ಜೊತೆಗೆ 'ಬಂಗಾರದ ಮನುಷ್ಯ' ಚಿತ್ರದ ರಾಜಣ್ಣ ಅವರ ಚಿತ್ರ ಕೂಡ ಕಟೌಟ್ ನಲ್ಲಿ ಕಂಗೊಳಿಸುತ್ತಿದೆ.

ಅಂದಹಾಗೆ, ಅಖಿಲ ಕರ್ನಾಟಕ ಡಾ|| ಶಿವರಾಜ್ ಕುಮಾರ್ ಸೇನಾ ಸಮಿತಿ‌, ಗಂಡುಗಲಿ ಡಾ|| ಶಿವರಾಜ್ ಕುಮಾರ್ ಅಭಿಮಾನಿಗಳ ಸಂಘ ಮತ್ತು ಅಖಿಲ ಕರ್ನಾಟಕ ಪುನೀತ್ ರಾಜ್ ಕುಮಾರ್ ಸಮಾಜ ಸೇವಾ ಸಂಘಗಳ ವತಿಯಿಂದ ಈ ಕಾರ್ಯಕ್ರಮವನ್ನು ಹಮ್ಮಿಕೊಂಡಿದ್ದರು.