ಜೋಗಿ ಚಿತ್ರಕ್ಕೆ 16 ವರ್ಷದ ಸಂಭ್ರಮ: ಪ್ರೇಮ್-ಶಿವಣ್ಣ ಕಾಂಬಿನೇಷನ್‌ನಲ್ಲಿ ಬಂದ ಈ ಸಿನಿಮಾದ ದಾಖಲೆಗಳೇನು?

ಜೋಗಿ ಮಾಡಿದ ಕಲೆಕ್ಷನ್ ಎಷ್ಟು?

16 ವರ್ಷಗಳ ಹಿಂದೆ ಇದೇ ದಿನ (ಆಗಸ್ಟ್ 19) ತೆರೆಕಂಡಿದ್ದ ಜೋಗಿ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಬಹುದೊಡ್ಡ ಹಿಟ್ ಆಗಿತ್ತು. ಸ್ವತಃ ನಿರ್ದೇಶಕ ಪ್ರೇಮ್ ಹೇಳುವಂತೆ ಆಗಿನ ಸಮಯದಲ್ಲಿ 22 ಕೋಟಿ ರೂ.ಗೂ ಹೆಚ್ಚು ಕಲೆಕ್ಷನ್ ಮಾಡಿತ್ತು. ಅಂದ್ರೆ, ಇಂದಿನ ಸಮಯಕ್ಕೆ ಅದನ್ನು ಲೆಕ್ಕ ಹಾಕಿದರೆ ಸುಮಾರು 300 ಕೋಟಿ ರೂ. ಗೂ ಅಧಿಕವಾಗಿರಲಿದೆ. ಅಂದ್ಮೇಲೆ ಇಂದಿನ ಚಿತ್ರಗಳು ಮಾಡದ ದಾಖಲೆಯನ್ನು ಜೋಗಿ ಆಗಲೇ ಮಾಡಿ ಬಿಟ್ಟಿತ್ತು.

16 ಚಿತ್ರಮಂದಿರಗಳಲ್ಲಿ ಶತದಿನೋತ್ಸವ ಆಚರಣೆ

ಬೆಂಗಳೂರಿನ 16 ಚಿತ್ರಮಂದಿರಗಳಲ್ಲಿ ಜೋಗಿ ಸಿನಿಮಾ ಶತದಿನ ಆಚರಿಸಿಕೊಂಡಿತ್ತು. ಇದು ಕನ್ನಡ ಚಿತ್ರರಂಗದಲ್ಲಿ ಸಾರ್ವಕಾಲಿಕ ದಾಖಲೆಯಾಗಿದೆ. ಕಪಾಲಿ, ವೀರೇಶ್, ನವರಂಗ್, ಪಿವಿಆರ್ ಫೋರಮ್, ಐನಾಕ್ಸ್ ಗರುಡ, ಸಿದ್ದೇಶ್ವರ, ಲಕ್ಷ್ಮೀ ತಾವರೇಕೆರೆ, ಈಶ್ವರಿ, ವಿನಾಯಕ, ಆದರ್ಶ, ಕೃಷ್ಣ ,ಮೋಹನ್, ಗೋವರ್ಧನ್, ವಜ್ರೇಶ್ವರಿ, ಭಾರತಿ ಚಿತ್ರಮಂದಿರಗಳಲ್ಲಿ ಜೋಗಿ ಶತದಿನೋತ್ಸವ ಆಚರಣೆ ಮಾಡಿತ್ತು. ಜೋಗಿ ಸಿನಿಮಾ ಬಿಟ್ಟರೆ ಬೇರೆ ಯಾವ ಚಿತ್ರವೂ ಸಿಲಿಕಾನ್ ಸಿಟಿಯಲ್ಲಿ 16 ಕೇಂದ್ರದಲ್ಲಿ ಶತದಿನ ಪೂರೈಸಿಲ್ಲ.

ದಾಖಲೆ ಪ್ರದರ್ಶನ

ಜೋಗಿ 72 ಕೇಂದ್ರಗಳಲ್ಲಿ 25 ದಿನ ಪೂರೈಸಿ, 63 ಕೇಂದ್ರಗಳಲ್ಲಿ 50 ದಿನ ಪೂರೈಸಿ, 54 ಕೇಂದ್ರಗಳಲ್ಲಿ 75 ದಿನ ಪ್ರದರ್ಶನ ಕಂಡು, 45 ಕೇಂದ್ರಗಳಲ್ಲಿ (61ಕ್ಕೂ ಹೆಚ್ಚು ಚಿತ್ರಮಂದಿರ) 100 ದಿನ ಪೂರೈಸಿ ಸಾರ್ವಕಾಲಿಕ ದಾಖಲೆ ಬರೆದಿತ್ತು. ವೀರೇಶ್ ಚಿತ್ರಮಂದಿರದಲ್ಲಿ 50 ದಿನದವರೆಗೂ ಹೌಸ್‌ಪುಲ್ ಪ್ರದರ್ಶನ ಕಂಡಿತ್ತು ಎನ್ನುವುದು ವಿಶೇಷ.

ಆಡಿಯೋ ಕಂಪನಿಯ ಲಾಭ

ಜೋಗಿ ಚಿತ್ರಕ್ಕೆ ಖ್ಯಾತ ಸಂಗೀತ ನಿರ್ದೇಶಕ ಗುರು ಕಿರಣ್ ಸಂಗೀತ ನೀಡಿದ್ದರು. ಅಶ್ವಿನಿ ಆಡಿಯೋ ಕಂಪನಿ ಅವರು ಜೋಗಿ ಚಿತ್ರದ ಹಾಡುಗಳಿಂದ ಸುಮಾರು 4 ಕೋಟಿ ರೂ. ದುಡ್ಡು ಮಾಡಿದರು. ಬಹುಶಃ ಆಗಿನ ಸಮಯಕ್ಕೆ ಆಡಿಯೋ ಕಂಪನಿಯೊಂದು 4 ಕೋಟಿ ರೂ. ಗಳಿಸಿದ್ದು ಅಂದ್ರೆ ಅದು ಜೋಗಿ ಮೂಲಕ ಎಂದು ನಿರ್ದೇಶಕ ಪ್ರೇಮ್ ಹೇಳಿಕೊಂಡಿದ್ದರು.