ಸೈಮಾ 2022: ಪ್ರಶಸ್ತಿ ಗೆದ್ದ ನಂತರ 'ಅಪ್ಪು ಅಣ್ಣಾ' ಎಂದು ಕಣ್ಣೀರಿಟ್ಟ ತೆಲುಗು ಸಂಗೀತ ನಿರ್ದೇಶಕ ಥಮನ್

ಅಪ್ಪು ಚಿತ್ರದ ಮೂಲಕವೇ ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟಿದ್ದ ಥಮನ್

ತೆಲುಗಿನಲ್ಲಿ ಸಾಲು ಸಾಲು ಹಿಟ್ ಗೀತೆಗಳನ್ನು ನೀಡಿ ಟಾಪ್ ಮ್ಯೂಸಿಕ್ ಡೈರೆಕ್ಟರ್ ಎನಿಸಿಕೊಂಡಿದ್ದ ಥಮನ್ ಕನ್ನಡ ಚಲನ ಚಿತ್ರರಂಗಕ್ಕೆ ಕಾಲಿಟ್ಟದ್ದು ಪುನೀತ್ ರಾಜ್ ಕುಮಾರ್ ಅಭಿನಯದ ಪವರ್ ಚಿತ್ರದ ಮೂಲಕ. ಮಹೇಶ್ ಬಾಬು ಅಭಿನಯದ ದೂಕುಡು ಸಿನಿಮಾದ ರಿಮೇಕ್ ಆಗಿದ್ದ ಈ ಚಿತ್ರಕ್ಕೆ ದೂಕುಡು ಸಿನಿಮಾಗೆ ಸಂಗೀತ ನಿರ್ದೇಶಕನಾಗಿ ಕೆಲಸ ಮಾಡಿದ್ದ ಥಮನ್ ಅವರನ್ನೇ ಸಂಗೀತ ನಿರ್ದೇಶಕನನ್ನಾಗಿ ಆಯ್ಕೆ ಮಾಡಲಾಗಿತ್ತು. ಹೀಗೆ ಅಂದಿನಿಂದಲೂ ಅಪ್ಪು ಜೊತೆ ಒಡನಾಟ ಹೊಂದಿದ್ದ ಎಸ್ ಎಸ್ ಥಮನ್ ಅವರಿಗೆ ಪುನೀತ್ ರಾಜ್ ಕುಮಾರ್ ಅವರೆಂದರೆ ತುಂಬಾ ಪ್ರೀತಿ.

ಅಪ್ಪು ಜೊತೆ ಮತ್ತೆರಡು ಚಿತ್ರಗಳಲ್ಲಿ ಕೆಲಸ

ಪವರ್ ಚಿತ್ರದ ನಂತರ ಎಸ್ ಎಸ್ ಥಮನ್ ಪುನೀತ್ ರಾಜ್ ಕುಮಾರ್ ಅಭಿನಯದ ಮತ್ತೊಂದು ಚಿತ್ರವಾದ ಚಕ್ರವ್ಯೂಹಕ್ಕೂ ಸಹ ಸಂಗೀತ ನಿರ್ದೇಶಕನಾಗಿ ಕೆಲಸ ಮಾಡಿದ್ದರು. ಹಾಗೂ ಕಳೆದ ವರ್ಷವಷ್ಟೆ ಬಿಡುಗಡೆಯಾದ ಪುನೀತ್ ರಾಜ್ ಕುಮಾರ್ ಅಭಿನಯದ ಹಾಗೂ ಸಂತೋಷ್ ಆನಂದ್ ರಾಮ್ ನಿರ್ದೇಶನದ ಯುವರತ್ನ ಚಿತ್ರಕ್ಕೂ ಸಹ ಎಸ್ ಎಸ್ ಥಮನ್ ಸಂಗೀತವಿತ್ತು.

ಗಣೇಶ್ ಮತ್ತು ನಿಖಿಲ್ ಕುಮಾರಸ್ವಾಮಿ ಚಿತ್ರಕ್ಕೂ ಎಸ್ ಥಮನ್ ಮ್ಯೂಸಿಕ್

ಇನ್ನು ಪುನೀತ್ ರಾಜ್ ಕುಮಾರ್ ಸಿನಿಮಾಗಳನ್ನು ಹೊರತುಪಡಿಸಿ ಎಸ್ ಎಸ್ ಥಮನ್ ನಿಖಿಲ್ ಕುಮಾರಸ್ವಾಮಿ ಅಭಿನಯದ ಚೊಚ್ಚಲ ಚಿತ್ರ ಜಾಗ್ವಾರ್ ಹಾಗೂ ಗಣೇಶ್ ಮತ್ತು ರಾಧಿಕಾ ಪಂಡಿತ್ ಅಭಿನಯಿಸಿದ್ದ ಸೂಪರ್ ಹಿಟ್ ಜೂಮ್ ಚಿತ್ರಕ್ಕೂ ಸಹ ಸಂಗೀತ ನಿರ್ದೇಶಕನಾಗಿ ಕೆಲಸ ಮಾಡಿದ್ದರು.

ಪಾಠಶಾಲಾ ಸಖತ್ ವೈರಲ್

ಇನ್ನು ಪವರ್ ಚಿತ್ರದ ಎಲ್ಲಾ ಹಾಡುಗಳನ್ನು ಸಕತ್ತಾಗಿ ಕಂಪೋಸ್ ಮಾಡಿ ತ್ರಿಪಲ್ ಡೈಮಂಡ್ ಡಿಸ್ಕ್ ಬರುವಂತೆ ಕೆಲಸ ನಿರ್ವಹಿಸಿದ್ದ ಸಂಗೀತ ನಿರ್ದೇಶಕ ಥಮನ್ ಯುವರತ್ನ ಚಿತ್ರದಲ್ಲಿನ ಪಾಠಶಾಲಾ ಹಾಡಿಗಾಗಿ ಪುನೀತ್ ರಾಜ್ ಕುಮಾರ್ ಅವರ ಅಭಿಮಾನಿಗಳಿಂದ ಅಪಾರವಾದ ಗೌರವವನ್ನು ಸಂಪಾದಿಸಿದ್ದಾರೆ. ಅದರಲ್ಲಿಯೂ ಅಪ್ಪು ಮರಣದ ನಂತರ ಇದೇ ಟ್ಯೂನಿನಲ್ಲಿ ಬಂದ 'ನೀ ಪುನೀತ' ಹಾಡು ಅಪ್ಪು ಅಭಿಮಾನಿಗಳ ಮನದಲ್ಲಿ ಶಾಶ್ವತವಾಗಿ ಉಳಿದುಕೊಂಡಿದೆ.