ಯೋಧರಿಗಾಗಿ ಬರೋಬ್ಬರಿ 175 ಎಕರೆ ಭೂಮಿ ನೀಡುವುದಾಗಿ ಹೇಳಿದ ನಟ ಸುಮನ್

ಯೋಧರಿಗಾಗಿ 175 ಎಕರೆ ಜಾಗ

ಭಾರತೀಯ ಯೋಧರಿಗಾಗಿ ಸುಮನ್ ತಮ್ಮ 175 ಎಕರೆ ಜಾಗವನ್ನು ನೀಡುವುದಾಗಿ ಹೇಳಿದ್ದಾರೆ. ಸೈನಿಕರ ಬಗ್ಗೆ ಬಹಳ ಪ್ರೀತಿ ಹೊಂದಿರುವ ಅವರು ಈ ಕೆಲಸದ ಮೂಲಕ ಸೇನೆಗೆ ಗೌರವ ನೀಡುತ್ತಿದ್ದಾರೆ. ''40 ವರ್ಷ ಚಿತ್ರರಂಗದಲ್ಲಿ ಇದ್ದು, 400 ಸಿನಿಮಾಗಳನ್ನು ಮಾಡಿದ್ದೇನೆ ಅದನ್ನು ಬಿಟ್ಟು ದೇಶಕ್ಕಾಗಿ ಏನಾದರೂ ಮಾಡಬೇಕು ಅಂತ ಈ ಕೆಲಸ ಮಾಡಿದ್ದೇನೆ'' ಎಂದರು ಸುಮನ್

ಕಾರ್ಗಿಲ್ ಯೋಧರಿಗಾಗಿ ಭೂಮಿ

ಈ ಹಿಂದೆಯೇ ಸುಮನ್ ಕಾರ್ಗಿಲ್ ಯುದ್ಧದಲ್ಲಿ ಹೋರಾಡಿದ ಯೋಧರಿಗಾಗಿ ಭೂಮಿ ನೀಡುವ ಯೋಜನೆ ಹೊಂದಿದ್ದರಂತೆ. ಆದರೆ, ಕೆಲ ಸಮಸ್ಯೆಗಳಿಂದ ಆಗ ಅದು ಆಗಲಿಲ್ಲ. ಈಗ ಆ ಜಾಗಕ್ಕೆ ಸಂಬಂಧಪಟ್ಟ ಹಾಗೆ ಯಾವುದೇ ಸಮಸ್ಯೆ ಇಲ್ಲ. ಈ ಕಾರಣ ಶೀಘ್ರದಲ್ಲಿಯೇ ಯೋಧರಿಗಾಗಿ ಭೂಮಿ ನೀಡಲಿದ್ದಾರೆ.

ಸ್ಟೂಡಿಯೋ ಮಾಡುವ ಆಸೆ ಇತ್ತು

ಸುಮನ್ ಅವರ ಒಡೆತನದ 175 ಎಕರೆ ಜಾಗ ಹೈದರಾಬಾದ್ ನಿಂದ 30 ಕಿಲೋ ಮೀಟರ್ ದೂರದಲ್ಲಿದೆ. ಈ ಜಾಗದಲ್ಲಿ ಸುಮನ್ ಸ್ಟೂಡಿಯೊ ಮಾಡುವ ಆಸೆ ಹೊಂದಿದ್ದರು. ಆದರೆ, ಯೋಧರಿಗಾಗಿ ತಮ್ಮ ಭೂಮಿ ನೀಡಿ ಸಾರ್ಥಕತೆ ಮೆರೆದಿದ್ದಾರೆ. ಸುಮನ್ ನಡೆಗೆ ಅವರ ಕುಟುಂಬ ಕೂಡ ಬೆಂಬಲ ಸೂಚಿಸಿದೆ.

ಅವರು ರಿಯಲ್ ಹೀರೋಗಳು

ಅಂದಹಾಗೆ, ಚಿತ್ರದ ಸುದ್ದಿಗೋಷ್ಠಿ ವೇಳೆ ಸೈನಿಕರ ಬಗ್ಗೆ ಮಾತನಾಡಿರುವ ಸುಮನ್ ''ಭಾರತದ ಸೈನಿಕರು ಬಹಳ ಕಷ್ಟ ಪಡುತ್ತಾರೆ. ಯಾವಾಗ ಬೇಕಾದರೂ ಸಾಯುತ್ತೇನೆ ಅಂತ ತಿಳಿದಿದ್ದರೂ ಆ ಕೆಲಸಕ್ಕೆ ಅವರು ಸೇರುತ್ತಾರೆ. ಸೈನಿಕರ ಕುಟುಂಬದ ಧೈರ್ಯ ಕೂಡ ದೊಡ್ಡದು.'' ಎಂದು ಯೋಧರ ತ್ಯಾಗವನ್ನು ಸುಮನ್ ಮೆಚ್ಚಿದ್ದಾರೆ.