44 ವರ್ಷಗಳ ಹಿಂದೆಯೇ ಶುರುವಾಗಿತ್ತು ಶ್ರೀದೇವಿಯ ಕನ್ನಡ ಪ್ರೇಮ.!

ಡಾ ರಾಜ್ ಸಿನಿಮಾದಲ್ಲಿ ಶ್ರೀದೇವಿ

ಡಾ.ರಾಜ್‌ ಕುಮಾರ್‌, ಲೀಲಾವತಿ ಅಭಿನಯದಲ್ಲಿ ಬಿಡುಗಡೆಯಾಗಿದ್ದ 'ಭಕ್ತ ಕುಂಬಾರ' (1974) ಚಿತ್ರದಲ್ಲಿ ಶ್ರೀದೇವಿ ಚೊಚ್ಚಲ ಭಾರಿಗೆ ಕನ್ನಡದಲ್ಲಿ ಬಾಲಕಲಾವಿದೆಯಾಗಿ ಅಭಿನಯಿಸಿದ್ದರು. ಆಗ ಅವರ ವಯಸ್ಸು ಕೇವಲ 11 ವರ್ಷ. ನಿರ್ವಹಿಸಿದ ಸಣ್ಣ ಪಾತ್ರದಲ್ಲಿ ಮನೋಘ್ನ ಅಭಿನಯದ ಮೂಲಕ ಮನಸ್ಸಿನಲ್ಲಿ ಉಳಿದು ಬಿಟ್ಟರು.

ಭವಿಷ್ಯ ನುಡಿದಿದ್ದ ಲೀಲಾವತಿ

ಅಂದು ಶ್ರೀದೇವಿಯ ಅಭಿನಯ ಮತ್ತು ಸೌಂದರ್ಯ ನೋಡಿ ಹಿರಿಯ ನಟಿ ಲೀಲಾವತಿ ಅವರು ಆರ್ಶೀವಾದ ಮಾಡಿದ್ದರು. ''ನೀನೊಬ್ಬ ದೊಡ್ಡ ನಟಿಯಾಗುವೆ'' ಎಂದು ಮನಸ್ಸಿನಿಂದ ಹಾರೈಸಿದ್ದರು. ಅದರಂತೆ ಶ್ರೀದೇವಿ ಕೂಡ ದೊಡ್ಡ ಸ್ಟಾರ್ ಆಗಿ ಬೆಳೆದರು.

ಬಾಲ ಕಲಾವಿದೆ

'ಭಕ್ತ ಕುಂಬಾರ' ಚಿತ್ರದಲ್ಲಿ ನಟಿಸಿದ ನಂತರ 'ಬಾಲ ಭಾರತ', 'ಸಂಪೂರ್ಣ ರಾಮಾಯಣ' ಹಾಗೂ 'ಯಶೋಧ ಕೃಷ್ಣ' ಚಿತ್ರದಲ್ಲೂ ಶ್ರೀದೇವಿ ಬಾಲಕಲಾವಿದೆಯಾಗಿ ಅಭಿನಯಿಸಿದ್ದರು.

ಹೆಣ್ಣು ಸಂಸಾರದ ಕಣ್ಣು

ಬಾಲನಟಿಯಾಗಿ ನಟಿಸಿ ಯಶಸ್ಸು ಕಂಡಿದ್ದ ಶ್ರೀದೇವಿ 1975ರಲ್ಲಿ ತೆರೆಕಂಡ 'ಹೆಣ್ಣು ಸಂಸಾರದ ಕಣ್ಣು' ಚಿತ್ರದಲ್ಲಿ ಪ್ರಮುಖ ಪಾತ್ರಕ್ಕೆ ಬಣ್ಣ ಹಚ್ಚಿದರು. ಶೇಷಗಿರಿ ರಾವ್‌ ನಿರ್ದೇಶನದಲ್ಲಿ ಮೂಡಿ ಬಂದಿದ್ದ ಈ ಚಿತ್ರದಲ್ಲಿ ಶ್ರೀನಾಥ್ ಮತ್ತು ಮಂಜುಳಾ ನಾಯಕ, ನಾಯಕಿಯಾಗಿದ್ದರು. ಈ ಚಿತ್ರದಲ್ಲಿ ಪೋಷಕ ಪಾತ್ರ ಮಾಡಿದ್ದರೂ ಎಲ್ಲರ ಗಮನ ಸೆಳೆಯುವಂತಹ ಅಭಿನಯ ಮಾಡಿದ್ದರು.

ಅಂಬಿ-ರಜನಿ ಜೊತೆ ಅಭಿನಯ

1978ರಲ್ಲಿ ತೆರೆಕಂಡ 'ಪ್ರಿಯಾ' ಚಿತ್ರದಲ್ಲಿ ನಾಯಕಿಯಾಗಿ ಅಭಿನಯಿಸುವ ಅವಕಾಶ ಸಿಕ್ಕಿತ್ತು. ಶ್ರೀಮುತ್ತುರಾಮನ್ ನಿರ್ದೇಶನದ ಈ ಚಿತ್ರದಲ್ಲಿ ರಜನಿಕಾಂತ್ ಮತ್ತು ಅಂಬರೀಷ್ ಜತೆ ಶ್ರೀದೇವಿ ತೆರೆ ಹಂಚಿಕೊಂಡಿದ್ದರು.

ನಂತರ ಕನ್ನಡಕ್ಕೆ ಬರಲೇ ಇಲ್ಲ

ಇಲ್ಲಿಂದ ತೆಲುಗು ಹಾಗೂ ತಮಿಳಿನಲ್ಲಿ ಹೆಚ್ಚು ಯಶಸ್ಸು ಪಡೆದುಕೊಂಡ ಶ್ರೀದೇವಿ ಮತ್ತೆ ಕನ್ನಡದಲ್ಲಿ ಅಭಿನಯಿಸಲಿಲ್ಲ. ನೋಡು ನೋಡುತ್ತಿದ್ದಂತೆ ದಕ್ಷಿಣ ಭಾರತದ ಎವರ್ ಗ್ರೀನ್ ನಟಿಯಾಗುವಷ್ಟು ಎತ್ತರಕ್ಕೆ ಬೆಳೆದುಬಿಟ್ಟರು. ಮತ್ತೊಂದೆಡೆ ಬಾಲಿವುಡ್ ನಲ್ಲೂ ಮೋಡಿ ಮಾಡಿದರು.