ಇದಕ್ಕೆ ಕಾಕತಾಳೀಯ ಅಂತೀರಾ, ವಿಚಿತ್ರ ಅಂತೀರಾ.?

Recommended Video

ಕನ್ನಡದ 'ಕನ್ವರ್ ಲಾಲ್', ಸ್ಯಾಂಡಲ್ ವುಡ್ ನ ಜಲೀಲ ಅಂಬರೀಶ್ ಇಹಲೋಕ ತ್ಯಜಿಸಿದ್ದಾರೆ. ಅನಾರೋಗ್ಯದಿಂದ ಬಳಲುತ್ತಿದ್ದ ಅಂಬರೀಶ್ ನಿನ್ನೆ (ನವೆಂಬರ್ 24) ರಾತ್ರಿ 10:15 ಸುಮಾರಿಗೆ ಬೆಂಗಳೂರಿನ ವಿಕ್ರಂ ಆಸ್ಪತ್ರೆಯಲ್ಲಿ ನಿಧನರಾದರು.

ಕಾಕತಾಳೀಯ ಅಂದ್ರೆ, ಅಂಬರೀಶ್ ರವರ ಸಹೋದರ ಡಾ.ಹರೀಶ್ ವಿಧಿವಶರಾಗಿ ನಿನ್ನೆಗೆ ಸರಿಯಾಗಿ ಒಂದು ವರ್ಷ.

ಹೌದು, ಕಳೆದ ವರ್ಷ.. ಅಂದ್ರೆ ನವೆಂಬರ್ 24, 2017 ರಂದು ಅಂಬರೀಶ್ ಅವರ ಅಣ್ಣ ಡಾ.ಹರೀಶ್ ಕೊನೆಯುಸಿರೆಳೆದಿದ್ದರು. ಅನಾರೋಗ್ಯದಿಂದ ಬಳಲುತ್ತಿದ್ದ ಡಾ.ಹರೀಶ್ ವರ್ಷದ ಹಿಂದೆ ಬಾರದ ಲೋಕಕ್ಕೆ ಪಯಣಿಸಿದ್ದರು. ವಿಚಿತ್ರ ಅಂದ್ರೆ, ಈ ವರ್ಷದ ನವೆಂಬರ್ 24 ರಂದು ಅಂಬರೀಶ್ ಮೋಡದ ಮರೆಗೆ ಸರಿದಿದ್ದಾರೆ.

ಸಹೋದರ ಹರೀಶ್ ಮೃತಪಟ್ಟಿದ್ದ ದಿನವೇ ಅಂಬರೀಶ್ ನಿಧನ

ನಿನ್ನೆ ಮೃತಪಟ್ಟ ಅಂಬರೀಶ್ ಅವರ ಪಾರ್ಥೀವ ಶರೀರವನ್ನ ಇದೀಗ ಜೆ.ಪಿ.ನಗರ ಮನೆಗೆ ತೆಗೆದುಕೊಂಡು ಹೋಗಲಾಗುತ್ತಿದೆ. ಭಾನುವಾರ (ನವೆಂಬರ್ 25) ಬೆಳಗ್ಗೆ 8 ಗಂಟೆಯಿಂದ ಬೆಂಗಳೂರಿನ ಕಂಠೀರವ ಸ್ಟೇಡಿಯಮ್ ನಲ್ಲಿ ಸಾರ್ವಜನಿಕರಿಗೆ ಅಂತಿಮ ದರ್ಶನದ ವ್ಯವಸ್ಥೆ ಮಾಡಲಾಗಿದೆ.

ಸೋಮವಾರ ಬೆಂಗಳೂರಿನ ಕಂಠೀರವ ಸ್ಟುಡಿಯೋದಲ್ಲಿ ಡಾ.ರಾಜ್ ಕುಮಾರ್ ಸ್ಮಾರಕ ಪಕ್ಕದಲ್ಲಿ ಅಂಬರೀಶ್ ಅಂತಿಮ ಸಂಸ್ಕಾರ ನಡೆಸಲು ಸರ್ಕಾರ ತೀರ್ಮಾನ ಮಾಡಿದೆ.