'ಕನ್ನಡದ ಈ ಇಬ್ಬರು ನಟರ ಜೊತೆ ಇದ್ದರೆ ಸುಖ, ನೆಮ್ಮದಿ, ಪ್ರೀತಿ ಇರುತ್ತೆ' ಎಂದ ರಂಗಾಯಣ ರಘು

ಗಣೇಶ್ ಹೊಗಳಿದ ರಂಗಾಯಣ ರಘು

ಹೀಗೆ ಚಿತ್ರದ ಕುರಿತು ಮಾತನಾಡಲು ವೇದಿಕೆ ಮೇಲೆ ಬಂದ ರಂಗಾಯಣ ರಘು ವಿಶೇಷವಾಗಿ ನಟ ಗೋಲ್ಡನ್ ಸ್ಟಾರ್ ಗಣೇಶ್ ಅವರನ್ನು ಹೊಗಳಿದರು. ತಾನು ಅಭಿನಯಿಸಿರುವ ಸುಮಾರು ಮುನ್ನೂರು ಚಿತ್ರಗಳಲ್ಲಿ ಮೂವತ್ತು ಚಿತ್ರಗಳು ಗಣೇಶ್ ಚಿತ್ರಗಳೇ ಎಂದು ರಂಗಾಯಣ ರಘು ಹೇಳಿದರು. ಇನ್ನು ಗಣೇಶ್ ಜೊತೆಗಿದ್ರೆ ಎಲ್ಲವೂ ಸಿಕ್ಕಿದ ಹಾಗೆ, ಒಂದೊಂದು ಸಲ ಹೈಸ್ಕೂಲ್ ಹುಡುಗರು ಆಗ್ತೀವಿ, ಒಮ್ಮೊಮ್ಮೆ ಕಾಲೇಜ್ ಹುಡುಗರು ಆಗ್ತೀವಿ ಹಾಗೂ ವಯಸ್ಸಾಗಿದೆ ಅಂತ ನನ್ನ ಚೆನ್ನಾಗಿ ಮುದ್ದು ಮಾಡಿ ನೋಡಿಕೊಳ್ತಾರೆ ಎಂದು ರಂಗಾಯಣ ರಘು ಗೋಲ್ಡನ್ ಸ್ಟಾರ್ ಬಗ್ಗೆ ಬಂಗಾರದಂತಹ ಮಾತುಗಳನ್ನು ಆಡಿದರು.

ಈ ಇಬ್ಬರು ನಟರ ಜೊತೆ ಇದ್ದರೆ ಸುಖ, ಪ್ರೀತಿ, ನೆಮ್ಮದಿ

ಮಾತು ಮುಂದುವರಿಸಿದ ರಂಗಾಯಣ ರಘು ಈ ರೀತಿ ಗಣೇಶ್ ಜೊತೆಗಿದ್ದರೆ ಅದೊಂಥರ ಸುಖ, ಪ್ರೀತಿ, ನೆಮ್ಮದಿ, ಆತ್ಮ ವಿಶ್ವಾಸ, ಒಂಥರ ಅಪ್ಪು ಸರ್ ಜೊತೆ ಇದ್ದ ಹಾಗೆ ಆಗಿಬಿಡುತ್ತೆ ಎಂದರು. ಅಪ್ಪು ಸರ್ ಜೊತೆ ಇದ್ದಾಗಲೂ ಸಹ ನಮಗೆ ಇದೇ ರೀತಿಯ ಭಾವನೆ ಬರುತ್ತಿತ್ತು ಎಂದ ರಂಗಾಯಣ ರಘು ಇದೇ ಸಮಯದಲ್ಲಿ ಅಪ್ಪು ಅವರನ್ನು ತುಂಬಾ ಮಿಸ್ ಮಾಡಿಕೊಳ್ಳುತ್ತೇನೆ ಎಂದರು. ಈ ಮೂಲಕ ಪುನೀತ್ ರಾಜ್‌ಕುಮಾರ್ ಹಾಗೂ ಗಣೇಶ್ ಜೊತೆಗಿದ್ದರೆ ಸುಖ, ಪ್ರೀತಿ ಹಾಗೂ ನೆಮ್ಮದಿ ಹೆಚ್ಚಾಗಿ ಸಿಗಲಿದೆ ಎಂದು ರಂಗಾಯಣ ರಘು ತಿಳಿಸಿದರು.

ಮೂವರು ನಾಯಕಿಯರ ಜೊತೆ ಗಣಿ ರೊಮ್ಯಾನ್ಸ್

ಇನ್ನು ಈ ತ್ರಿಬಲ್ ರೈಡಿಂಗ್ ಚಿತ್ರದಲ್ಲಿ ಗಣೇಶ್ ರಾಮ್ ಪಾತ್ರದಲ್ಲಿ ನಟಿಸಿದ್ದರೆ ಅದಿತಿ ಪ್ರಭುದೇವ, ರಚನಾ ಇಂದರ್ ಹಾಗೂ ಮೇಘಾ ಶೆಟ್ಟಿ ಮೂವರು ನಾಯಕಿಯರಾಗಿ ಕಾಣಿಸಿಕೊಂಡಿದ್ದಾರೆ. ಚಿತ್ರದ ಟ್ರೈಲರ್‌ನಲ್ಲಿ ಈ ಮೂವರೂ ಸಹ ನಾಯಕನಿಗೆ ಪ್ರೇಮ ನಿವೇದನೆ ಮಾಡುವ ದೃಶ್ಯಗಳಿದ್ದು ಈ ಬಾರಿ ಗಣೇಶ್ ಚಿತ್ರದಲ್ಲಿ ಟ್ರಯಾಂಗಲ್ ಲವ್ ಸ್ಟೋರಿಗೂ ಮಿಗಿಲಾದ ಮನರಂಜನೆ ಸಿಗಲಿದೆ. ಇನ್ನು ಟ್ರೈಲರ್‌ನಲ್ಲಿ ಲವ್, ಆಕ್ಷನ್ ಹಾಗೂ ಲವ್ ಫೀಲ್‌ನ ದೃಶ್ಯಗಳಿದ್ದು ಇದೊಂದು ಪಕ್ಕಾ ಕಮರ್ಷಿಯಲ್ ಚಿತ್ರವಾಗಿದೆ.