ವರ್ಣಮಾಲೆಯಲ್ಲಿ ವಿಷ್ಣುವರ್ಧನ್ ಸಿನಿಮಾಗಳು: ಅಭಿಮಾನಿಗಳಿಂದ ಹೊಸ ಪ್ರಯತ್ನ

ಕನ್ನಡ ವರ್ಣಮಾಲೆ ಅ,ಆ,ಇ,ಈ ಎಲ್ಲರಿಗೂ ಗೊತ್ತಿರುವುದೇ. ವರ್ಣಮಾಲೆ ಮತ್ತು ಪದ ಗ್ರಹಿಕೆ ಕಲಿಸುವಾಗ ಅ=ಅರಸ, ಆ=ಆನೆ, ಇ=ಇಲಿ ಎಂದು ಕಲಿಸುವುದು ವಾಡಿಕೆ. ವಿಷ್ಣುವರ್ಧನ್ ಅಭಿಮಾನಿಗಳು ಇದನ್ನೇ ತುಸು ಭಿನ್ನವಾಗಿಸಿದ್ದಾರೆ.

ಡಾ.ವಿಷ್ಣು ಸೇನಾ ಸಮಿತಿ ವತಿಯಿಂದ ವಿಷ್ಣುವರ್ಧನ್ ಚಿತ್ರಗಳುಳ್ಳ 'ಕೋಟಿಗೊಬ್ಬ' 2021 ರ ಕ್ಯಾಲೆಂಡರ್ ಬಿಡುಗಡೆ ಮಾಡಲಾಗಿದ್ದು, ಕ್ಯಾಲೆಂಡರ್‌ ನಲ್ಲಿ ವರ್ಣಮಾಲೆಯ ಮುಂದಿನ ಪದಗಳನ್ನು ಪದಲಾಯಿಸಿ ವಿಷ್ಣುವರ್ಧನ್ ಅವರು ನಟಿಸಿದ್ದ ಸಿನಿಮಾಗಳ ಹೆಸರು ಸೇರಿಸಲಾಗಿದೆ.

ಅ=ಅಣ್ಣ-ಅತ್ತಿಗೆ, ಆ=ಆಪ್ತಮಿತ್ರ, ಇ=ಇಂದಿನ ರಾಮಾಯಣ, ಹೀಗೆ ವಿಷ್ಣುವರ್ಧನ್ ನಟಿಸಿರುವ ಹೆಸರುಗಳನ್ನು ಅಕ್ಷರ ಮಾಲೆ ಗುರುತಿಸಲು ಬಳಸಲಾಗಿದೆ.

ಕ್ಯಾಲೆಂಡರ್‌ನಲ್ಲಿ ವಿಷ್ಣುವರ್ಧನ್ ಅವರ ಅಪರೂಪದ ಚಿತ್ರಗಳನ್ನು ಮುದ್ರಿಸಲಾಗಿದ್ದು, ಪ್ರತಿ ತಿಂಗಳಿಗೂ ವಿಶೇಷ ಬಣ್ಣಗಳ ಸಂಯೋಜನೆ ಮಾಡಲಾಗಿದೆ. ಜೊತೆಗೆ ರಜಾದಿನಗಳು, ಅಮಾವಾಸೆ, ಹುಣ್ಣಿಮೆ, ಹಬ್ಬಗಳು, ಗಣ್ಯರ ಜನ್ಮದಿನದಗಳನ್ನು ಒಳಗೊಂಡಿರುವ ಈ ಕ್ಯಾಲೆಂಡರ್ ವೃತಿಪರ ಕ್ಯಾಲೆಂಡರ್ ಗಳಿಗೆ ಸರಿ ಸಮಾನವಾಗಿದೆ ಎಂದಿದೆ ವಿಷ್ಣುಸೇನಾ ಸಮಿತಿ.

Recommended Video

ಕೋಟಿಗೊಬ್ಬ ಕ್ಯಾಲೆಂಡರ್ ಗೆ ಇದು 10ನೇ ವಾರ್ಷಿಕೋತ್ಸವ. ಕೋಟಿಗೊಬ್ಬ ಕ್ಯಾಲೆಂಡರ್‌ನ ಮೊದಲ ಸಂಚಿಕೆಯನ್ನು ದಿವಂಗತ ಅನಂತಕುಮಾರ್ ಮತ್ತು ಡಾ.ಭಾರತಿ ವಿಷ್ಣುವರ್ಧನ್ ಅವರು ಈ ಕ್ಯಾಲೆಂಡರ್ ಬಿಡುಗಡೆಗೊಳಿಸಿದ್ದರು.