ವೀರಗಾಸೆಗೆ ಅಪಮಾನ ಮಾಡಿಲ್ಲ ಎಂದ ಧನಂಜಯ್: ಅಂಥಹದ್ದೇನಿದೆ 'ಹೆಡ್ ಬುಷ್'ನಲ್ಲಿ!

ವೀರಗಾಸೆ ಕಲೆಯ ನೋಡುತ್ತಾ ಬೆಳೆದವನು: ಧನಂಜಯ್

ಮಾಧ್ಯಮದ ಸಂದರ್ಶನವೊಂದರಲ್ಲಿ ಇದೇ ವಿಷಯವಾಗಿ ಮಾತನಾಡಿರುವ ನಟ ಧನಂಜಯ್, ''ನಾನು ವೀರಗಾಸೆ ಕಲೆಯನ್ನು ಸಣ್ಣ ವಯಸ್ಸಿನಿಂದಲೂ ನೋಡಿಕೊಂಡು ಬಂದವನು. ನಾನು ಆ ಕಲೆಗೆ ಅವಮಾನ ಮಾಡಿಲ್ಲ. ಸಿನಿಮಾದಲ್ಲಿ ಸಹ ವೀರಗಾಸೆ ವೇಷದಲ್ಲಿರುವ ಕೆಲವರು ಜಯರಾಜ್ ಪಾತ್ರದಾರಿಯ ಮೇಲೆ ದಾಳಿ ಮಾಡಲು ಬಂದಾಗ, ನಿಜವಾದ ವೀರಗಾಸೆಯವರು ಹಿಂದೆ ಹೋಗಿ, ದುಷ್ಟರು ಮಾತ್ರ ಮುಂದೆ ಬಂದು ಜಯರಾಜ್ ಮೇಲೆ ದಾಳಿ ಮಾಡುವ ದೃಶ್ಯವಿದೆ'' ಎಂದಿದ್ದಾರೆ.

ವೀರಗಾಸೆಯವರು ಶೂ, ಚಪ್ಪಲಿ ಧರಿಸುವುದಿಲ್ಲ: ಧನಂಜಯ್

''ವೀರಗಾಸೆಯವರು ಶೂ ಅಥವಾ ಚಪ್ಪಲಿಗಳನ್ನು ಧರಿಸುವುದಿಲ್ಲ, ಆದರೆ ಸಿನಿಮಾದಲ್ಲಿ ಜಯರಾಜ್ ಅನ್ನು ಅಟ್ಯಾಕ್ ಮಾಡಲು ಬಂದವರು ಶೂ ಹಾಕಿರುತ್ತಾರೆ, ಜಯರಾಜ್ ಪಾತ್ರಧಾರಿ ಅದನ್ನು ಗಮನಿಸಿ, ವೀರಗಾಸೆಯವರ ವೇಷದಲ್ಲಿ ಬಂದ ಇವರು ದುರುಳರು ಎಂದು ಎಣಿಸಿಯೇ ಅವರ ಮೇಲೆ ದಾಳಿ ಮಾಡುತ್ತಾನೆ. ಹಾಗಾಗಿ ಸಿನಿಮಾದಲ್ಲಿ ಸಹ ಜಯರಾಜ್ ಪಾತ್ರಧಾರಿ ಹೊಡೆಯುತ್ತಿರುವುದು ವೀರಗಾಸೆಯವರನ್ನಲ್ಲ ಬದಲಿಗೆ ಆ ವೇಷ ಧರಿಸಿ ಬಂದ ಕೆಲವು ದುಷ್ಟರನ್ನು'' ಎಂದು ಸ್ಪಷ್ಟನೆ ನೀಡಿದ್ದಾರೆ ಧನಂಜಯ್.

ಅವಮಾನ ಮಾಡಿದವರಿಗೆ ಜಯರಾಜ್ ಹೊಡೆಯುತ್ತಾನೆ: ಧನಂಜಯ್

''ಒಟ್ಟಾರೆಯಾಗಿ ನೋಡುವುದಾದರೆ, ವೀರಗಾಸೆಗೆ ಅವಮಾನ ಮಾಡುತ್ತಿರುವವರಿಗೆ ಜಯರಾಜ್ ಹೊಡೆಯುತ್ತಿರುವುದೇ ವಿನಃ ವೀರಗಾಸೆಯವರಿಗೆ ಅಲ್ಲ. ಆ ಫೈಟ್ ದೃಶ್ಯದಲ್ಲಿ ನಿಜವಾದ ವೀರಗಾಸೆಯವರು ಹಿಂದೆ ನಿಂತಿರುತ್ತಾರೆ ಆದರೆ ನಕಲಿ ವೀರಗಾಸೆಯವರ ಮೇಲೆ ಜಯರಾಜ್ ಪಾತ್ರಧಾರಿ ಫೈಟ್ ಮಾಡುತ್ತಿರುತ್ತಾನೆ. ಅದನ್ನು ನಾವು ಸ್ಪಷ್ಟವಾಗಿ ತೋರಿಸಿದ್ದೀವಿ. ಈ ಫೈಟ್ ದೃಶ್ಯ ಕಂಪೋಸ್ ಮಾಡುವ ಮುನ್ನ ಸಾಕಷ್ಟು ಚರ್ಚೆ ಮಾಡಿಯೇ ಈ ದೃಶ್ಯಗಳನ್ನು ಚಿತ್ರೀಕರಣ ಮಾಡಲಾಗಿದೆ. ನಮ್ಮ ನಾಡಿನ ಕಲೆಗಳನ್ನು ಇಟ್ಟುಕೊಂಡು ಕೆಟ್ಟದಾಗಿ ಏನೇನೋ ಮಾಡಲು ಸಾಧ್ಯವಿಲ್ಲ'' ಎಂದಿದ್ದಾರೆ ಧನಂಜಯ್.

ಸಿನಿಮಾದಲ್ಲಿರುವ ದೃಶ್ಯ ಹೇಗಿದೆ

ಸಿನಿಮಾದ ದೃಶ್ಯವೊಂದರಲ್ಲಿ ಜಯರಾಜ್ ಪಾತ್ರಧಾರಿ ಧನಂಜಯ್ ಮೇಲೆ ಕರಗದ ಸಂದರ್ಭದಲ್ಲಿ ವೀರಗಾಸೆ ವೇಷ ಧರಿಸಿದ ಕೆಲವರು ದಾಳಿ ಮಾಡುತ್ತಾರೆ. ಆಗ ಜಯರಾಜ್, ತನ್ನ ಮೇಲೆ ದಾಳಿ ಮಾಡಿದವರ ಮೇಲೆ ಫೈಟ್ ಮಾಡುತ್ತಾನೆ. ಜಯರಾಜ್ ಮೇಲೆ ದಾಳಿ ಮಾಡಿದ ದುರುಳರು ವೀರಗಾಸೆ ವೇಷ ತೊಟ್ಟಿರುತ್ತಾರೆ ಆದರೆ ಅವರು ಶೂಗಳನ್ನು ಧರಿಸಿರುವುದನ್ನು ಜಯರಾಜ್ ಗಮನಿಸಿಯೇ ಅವರನ್ನು ಗುರುತಿಸಿ ಅವರನ್ನು ಹೊಡೆದು ಕೆಡವುತ್ತಾನೆ. ಫೈಟ್ ಶುರುವಾಗುತ್ತಿದ್ದಂತೆ ನಿಜವಾದ ವೀರಗಾಸೆಯವರು ಹಿಂದೆ ಹೋಗುವ, ಜಯರಾಜ್‌ ಮೇಲೆ ದಾಳಿ ಮಾಡಲು ಬಂದ ನಕಲಿ ವೇಷಧಾರಿಗಳು ಮುಂದೆ ಬರುವ ದೃಶ್ಯವನ್ನೂ ಸಹ ತೋರಿಸಲಾಗಿದೆ.