ದರ್ಶನ್ 50ನೇ ಚಿತ್ರದ ಬಗ್ಗೆ ನಿಲ್ಲದ ಚರ್ಚೆ: ಗೊಂದಲವೇ ಹೆಚ್ಚು.!

ಯುಗಾದಿಗೆ ಕುರುಕ್ಷೇತ್ರ?

ನಿರ್ಮಾಪಕ ಮುನಿರತ್ನ ಅವರು ಹೇಳಿರುವ ಪ್ರಕಾರ, ದರ್ಶನ್ ಅಭಿನಯದ ಕುರುಕ್ಷೇತ್ರ ಸಿನಿಮಾ ಯುಗಾದಿ ಹಬ್ಬದ ಪ್ರಯುಕ್ತ ಏಪ್ರಿಲ್ 5 ರಂದು ತೆರೆಕಾಣಲಿದೆ. ಈಗ ಪ್ರಶ್ನೆ ಮೂಡುತ್ತಿರುವುದು ಅದಕ್ಕೂ ಮುಂಚೆ ಯಜಮಾನ ರಿಲೀಸ್ ಆಗುತ್ತಾ ಅಂತ?

ಸೆನ್ಸಾರ್ ಮುಗಿಸಿದ 'ಯಜಮಾನ'

ಈಗಾಗಲೇ ಹಾಡುಗಳನ್ನ ರಿಲೀಸ್ ಮಾಡಿರುವ ಯಜಮಾನ ಫೆಬ್ರವರಿ 10 ರಂದು ಟ್ರೈಲರ್ ಬಿಡುಗಡೆ ಮಾಡುತ್ತಿದೆ. ನಿನ್ನೆಯಷ್ಟೇ ಸೆನ್ಸಾರ್ ಮುಗಿಸಿರುವ ಯಜಮಾನ ಯು/ಎ ಪ್ರಮಾಣಪತ್ರ ಪಡೆದುಕೊಂಡಿದೆ. ಅಲ್ಲಿಗೆ ಯಜಮಾನ ಚಿತ್ರಮಂದಿರಕ್ಕೆ ಬರಲು ಸಿದ್ಧವಾಗಿದೆ. ಯಜಮಾನನ ವೇಗ ನೋಡಿದ್ರೆ ಕುರುಕ್ಷೇತ್ರ ಚಿತ್ರಕ್ಕೂ ಮೊದಲೇ ಬರುತ್ತಾ ಎಂಬ ಅನುಮಾನ ಕಾಡ್ತಿದೆ.

ಯಜಮಾನ D51 ಆಗಲಿದೆ

ಹಾಡು, ಟ್ರೈಲರ್, ಸೆನ್ಸಾರ್ ಮುಗಿಸಿದ್ರು ಯಜಮಾನ ಬರೋದು ಸ್ವಲ್ಪ ತಡವಾಗುತ್ತೆ. ಯಾಕಂದ್ರೆ, 50ನೇ ಸಿನಿಮಾ ಕುರುಕ್ಷೇತ್ರವೇ ಮೊದಲು ಎನ್ನಲಾಗಿದೆ. ಯುಗಾದಿಗೆ ಕುರುಕ್ಷೇತ್ರ ಬಂದ್ರೆ, ಅದಾದ ಬಳಿಕ ಯಜಮಾನ ಬರ್ತಾನೆ. ಇಲ್ಲಿಯವರೆಗೂ ಯಜಮಾನ 51ನೇ ಸಿನಿಮಾ ಎಂದೇ ಗುರುತಿಸಿಕೊಳ್ಳುತ್ತಿದೆ.

ಕುರುಕ್ಷೇತ್ರ ಮುಂದಕ್ಕೆ ಹೋದರೇ....?

ಎಲ್ಲ ಅಂದುಕೊಂಡಂತೆ ಆಗಿದ್ದರೇ ಕುರುಕ್ಷೇತ್ರ ಇಷ್ಟೋತ್ತಿಗಾಗಲೇ ತೆರೆಗೆ ಬರಬೇಕಿತ್ತು. 3ಡಿ ಕೆಲಸ ನಡೆಯುತ್ತಿದ್ದು, ವಿಳಂಬವಾಗ್ತಿದೆ. ಒಂದು ವೇಳೆ ಈ ಕೆಲಸ ಇನ್ನೂ ಲೇಟ್ ಆದ್ರೆ ಕುರುಕ್ಷೇತ್ರ ಚಿತ್ರಕ್ಕೂ ಮೊದಲೇ ಯಜಮಾನ ಬರೋದು ಖಚಿತ.

ದರ್ಶನ್ ಹುಟ್ಟುಹಬ್ಬಕ್ಕೆ ಸ್ಪಷ್ಟನೆ ಸಿಗಬಹುದು

ಈ ಎಲ್ಲ ಗೊಂದಲಗಳಿಗೂ ದರ್ಶನ್ ಹುಟ್ಟುಹಬ್ಬದಂದು ಸ್ಪಷ್ಟನೆ ಸಿಗಬಹುದು ಎಂಬ ನಿರೀಕ್ಷೆ ಇದೆ. ಯಜಮಾನ, ಕುರುಕ್ಷೇತ್ರ, ಒಡೆಯ, ಗಂಡುಗಲಿ ಮದಕರಿ, ರಾಬರ್ಟ್ ಚಿತ್ರಗಳಿಂದ ಡಿ ಬಾಸ್ ಬರ್ತಡೇಗೆ ಟೀಸರ್, ಟ್ರೈಲರ್, ಪೋಸ್ಟರ್ ರಿಲೀಸ್ ಮಾಡಬಹುದು. ಈ ವೇಳೆಯಲ್ಲಿ ರಿಲೀಸ್ ಡೇಟ್ ಘೋಷಣೆ ಮಾಡಿದ್ರೂ ಅಚ್ಚರಿಯಿಲ್ಲ.