ಆ ನಟರು ಮಾಡಿದರೆ ತಪ್ಪಲ್ಲ, ಧನಂಜಯ್ ಮಾಡಿದರೆ ತಪ್ಪೆ? ನೆಟ್ಟಿಗರ ಪ್ರಶ್ನೆ

ಹುಲಿ ವೇಷಧಾರಿಗೆ ಹೊಡೆಯುವ ದೃಶ್ಯವಿದೆ

'ಉಳಿದವರು ಕಂಡಂತೆ' ಕನ್ನಡದ ಜನಪ್ರಿಯ ಸಿನಿಮಾಗಳಲ್ಲಿ ಒಂದು ಆ ಸಿನಿಮಾದಲ್ಲಿ ರಕ್ಷಿತ್ ಶೆಟ್ಟಿ, ಹುಲಿ ವೇಷ ಧರಿಸಿರುವ ಅಚ್ಯುತ್ ಕುಮಾರ್‌ಗೆ ಹಿಂಬದಿಯಿಂದ ತಲೆಗೆ ಹೊಡೆದು ಬೀಳಿಸುವ ದೃಶ್ಯವಿದೆ. ಆ ದೃಶ್ಯವನ್ನು ಹೀರೋ ಎಲಿವೇಶನ್ ನೀಡಿ ಮಾಸ್ ಆಗಿಯೇ ಚಿತ್ರಿಸಲಾಗಿದೆ. ಹುಲಿ ವೇಷ ಸಹ ಕಲೆ, ಹುಲಿ ವೇಷಧಾರಿಯ ಮೇಲೆ ಹಲ್ಲೆ ಮಾಡುವ ದೃಶ್ಯಕ್ಕೆ ಯಾಕೆ ಯಾರೂ ವಿವಾದ ಮಾಡಲಿಲ್ಲ ಎಂದು ಕೆಲವರು ಪ್ರಶ್ನೆ ಮಾಡಿದ್ದಾರೆ.

ಗಣೇಶನ ವಿಗ್ರಹಕ್ಕೆ ಮಾಡಿದ ಅಪಮಾನ ಎನ್ನಲಿಲ್ಲವೇಕೆ?

ಇನ್ನು 'ಎ' ಸಿನಿಮಾದಲ್ಲಿ ಉಪೇಂದ್ರ ಗಣೇಶನ ವಿಗ್ರಹದೊಂದಿಗೆ ಮಾತನಾಡುವ ದೃಶ್ಯ ಬಹಳ ಜನಪ್ರಿಯ. ಗಣೇಶ ವಿಗ್ರಹಕ್ಕೆ ಗನ್ ತೋರಿಸುವ ಉಪೇಂದ್ರ, ಗಣೇಶನ ಶಕ್ತಿ ಬಗ್ಗೆ ಸಾಮರ್ಥ್ಯದ ಬಗ್ಗೆ ಪ್ರಶ್ನೆ ಕೇಳುತ್ತಾರೆ ಆ ಬಳಿಕ ದೇವರುಗಳೇ ವ್ಯರ್ಥ ಎಂಬಂತೆಯೂ ಮಾತನಾಡಿ ದೇವರ ವಿಗ್ರಹವನ್ನು ಬಾವಿಗೆ ಬಿಸಾಡುತ್ತಾರೆ. ಆ ದೃಶ್ಯದ ಬಗ್ಗೆಯೂ ಯಾರೂ ಮಾತನಾಡಿರಲಿಲ್ಲ. ಆದರೆ ಈಗ ಏಕೆ ಪ್ರಶ್ನೆ ಮಾಡುತ್ತಿದ್ದಾರೆ? ಎಂದು ಪ್ರಶ್ನೆ ಕೇಳಿರುವ ಕೆಲವರು ಉಪೇಂದ್ರದ ಜಾತಿ ಅವರನ್ನು ಪ್ರಶ್ನಾತೀತರನ್ನಾಗಿಸಿದೆಯೇ ಎಂದು ಸಹ ಕೇಳಿದ್ದಾರೆ.

ಅಯ್ಯಪ್ಪ ಮಾಲಾಧಾರಿಗಳಿಗೆ ಹೊಡೆವ ದೃಶ್ಯವಿದೆ

'ಬೊಂಬಾಟ್' ಸಿನಿಮಾದಲ್ಲಿ ನಟ ಗಣೇಶ್, ಅಯ್ಯಪ್ಪ ಮಾಲೆ ಧರಿಸಿದ ವ್ಯಕ್ತಿಗಳಿಬ್ಬರನ್ನು ಹಿಡಿದು ಥಳಿಸುತ್ತಾರೆ. ಅವರಿಬ್ಬರೂ ಅಕ್ರಮ ಶಸ್ತ್ರಾಸ್ತ್ರ ಸಾಗಿಸುತ್ತಿದ್ದಾರೆ ಎಂದು ಹೇಳಿ ಆ ಇಬ್ಬರು ಮಾಲಾಧಾರಿಗಳನ್ನು ಹೊಡೆಯುತ್ತಾರೆ. ಆಗಲೂ ಆ ದೃಶ್ಯದ ವಿವರಣೆ ಅರ್ಥೈಸಿಕೊಂಡು ಯಾರೂ ಪ್ರಶ್ನೆ ಮಾಡಿರಲಿಲ್ಲ. ಆದರೆ ಈಗ, 'ಹೆಡ್ ಬುಷ್' ಸಿನಿಮಾದಲ್ಲಿ ವೀರಗಾಸೆ ಕಲಾವಿದರ ವೇಷ ಧರಿಸಿ ಬರುವ ರೌಡಿಗಳನ್ನು ಹೊಡೆದಾಗ ಪ್ರಶ್ನೆ ಮಾಡುತ್ತಿದ್ದಾರೆ ಏಕೆ? ಎಂದು ನೆಟ್ಟಿಗರು ಕೇಳಿದ್ದಾರೆ.

ಹಲವು ಸಿನಿಮಾಗಳಲ್ಲಿ ಇಂಥಹಾ ದೃಶ್ಯಗಳಿವೆ

ಕನ್ನಡದ ಹಲವು ಸಿನಿಮಾಗಳಲ್ಲಿ ಹಲವು ಕಲೆಗಳನ್ನು ಬೇರೆ-ಬೇರೆ ರೀತಿಯಲ್ಲಿ ಬಳಸಿಕೊಳ್ಳಲಾಗಿದೆ. ಕೆಲವೊಮ್ಮೆ ನಿರ್ದೇಶಕ ಕ್ರಿಯಾತ್ಮಕ ಸ್ವಾತಂತ್ರ್ಯ ಬಳಸಿ ತಿದ್ದುವ, ತಿರುಚು ಕಾರ್ಯಗಳನ್ನು ಮಾಡಿದ್ದಾರೆ. ಕೆಲವು ದೃಶ್ಯಗಳಲ್ಲಿ ಕೆಲವು ಸಮಯದಾಯದವರನ್ನು ಕಳಪೆ ಹಾಸ್ಯಕ್ಕೆ ಬಳಸಿಕೊಂಡು ಉದಾಹರಣೆಗಳೂ ಇವೆ. ಆದರೆ ಇತ್ತೀಚೆಗೆ ಮಾತ್ರ ಜನರು ಎಲ್ಲದರಲ್ಲೂ ತಪ್ಪು ಹುಡುಕುವ ಕೆಲಸಕ್ಕೆ ಇಳಿದಿದ್ದಾರೆ. ಅದರಲ್ಲಿಯೂ ಕೆಲವು ನಟ-ನಿರ್ದೇಶಕರ ಸಿನಿಮಾಗಳಲ್ಲಿ ಕಡ್ಡಾಯವಾಗಿ ತಪ್ಪು ಹುಡುಕಲು ಯತ್ನಿಸುತ್ತಿದ್ದಾರೇನೋ ಎಂಬ ಅನುಮಾನವನ್ನೂ ಕೆಲವು ನೆಟ್ಟಿಗರು ವ್ಯಕ್ತಪಡಿಸಿದ್ದಾರೆ.