ಟೆನ್ನಿಸ್ ಆಟಗಾರ ನೊವಾಕ್ ಜೊಕೊವಿಕ್‌ಗೆ ಶುಭ ಕೋರಲು 'ಕೆಜಿಎಫ್ 2' ಡೈಲಾಗ್ ಬಳಸಿದ ವಿಂಬಲ್ಡನ್‌!

ವಿಂಬಲ್ಡನ್‌ನಲ್ಲಿ 'ಕೆಜಿಎಫ್ 2' ಡೈಲಾಗ್

ಹೌದು.. ಆಶ್ಚರ್ಯ ಆದರೂ ಇದು ನಿಜ. 'ಕೆಜಿಎಫ್ 2' ಟ್ರೈಲರ್ ಬಿಡುಗಡೆಯಾದಾಗಲೇ ಒಂದು ಡೈಲಾಗ್ ವೈರಲ್ಆ ಆಗಿತ್ತು. ಅದೇ ವೈಲೆನ್ಸ್ ಡೈಲಾಗ್ ಈಗ ಮತ್ತೆ ವಿಂಬಲ್ಡನ್‌ನಲ್ಲಿ ಸದ್ದು ಮಾಡಿದೆ. ವಿಂಬಲ್ಡನ್‌ನ ಅಧಿಕೃತ ಟ್ವಿಟರ್‌ ಹ್ಯಾಂಡಲ್‌ 'ಕೆಜಿಎಫ್ 2' ಸಿನಿಮಾದ ಡೈಲಾಗ್ ಅನ್ನು ಅನುಕರಿಸಿದೆ. ಇದೇ ಕಾರಣಕ್ಕೆ ವಿಶ್ವದಾದ್ಯಂತ ಸಿಕ್ಕಾಪಟ್ಟೆ ಚರ್ಚೆಯಾಗುತ್ತಿದೆ. ವಿಶ್ವ ಮಟ್ಟದಲ್ಲಿ ಮತ್ತೆ 'ಕೆಜಿಎಫ್ 2' ಸೌಂಡ್ ಮಾಡುತ್ತಿರುವುದು ರಾಕಿ ಭಾಯ್ ಫ್ಯಾನ್ಸ್‌ಗೆ ಕಿಕ್ ಕೊಟ್ಟಿದೆ.

ಟ್ವಿಟರ್ ಖಾತೆಯಲ್ಲಿ ಏನಿದೆ?

ಜೂನ್ 10ರಂದು ವಿಂಬಲ್ಡನ್ ಫೈನಲ್ ಮ್ಯಾಚ್ ನಡೆದಿತ್ತು. ಫೈನಲ್‌ ಪಂದ್ಯದಲ್ಲಿ ನೊವಾಕ್ ಜೊಕೊವಿಕ್ ಏಳನೇ ಬಾರಿಗೆ ವಿಂಬಲ್ಡನ್‌ ಪ್ರಶಸ್ತಿಯನ್ನು ಗೆದ್ದಿದ್ದರು. ಸರ್ಬಿಯಾದ ಈ ಟೆನ್ನಿಸ್ ಆಟಗಾರನಿಗೆ ಶುಭಕೋರಲು ವಿಂಬಲ್ಡನ್ ಅಧಿಕಾರಿಗಳು 'ಕೆಜಿಎಫ್ 2' ಸಿನಿಮಾ ಡೈಲಾಗ್‌ ಅನ್ನು ಎರವಲಾಗಿ ಪಡೆದಿದ್ದಾರೆ. ಟ್ವಿಟರ್ ಖಾತೆಯಲ್ಲಿ "ಟ್ರೋಫಿ.. ಟ್ರೋಫಿ.. ಟ್ರೋಫಿ.. ಟ್ರೋಫಿಗಳು ಅಂದರೆ ನನಗೆ ಇಷ್ಟ. ಟ್ರೋಫಿಗಳು ನನ್ನನ್ನು ಪ್ರೀತಿಸುತ್ತವೆ. ನನ್ನಿಂದ ತಿರಸ್ಕರಿಸಲು ಸಾಧ್ಯವಿಲ್ಲ." ಎಂದು ನೊವಾಕ್ ಜೊಕೊವಿಕ್ ಫೋಟೊ ಸಮೇತ ಟ್ವೀಟ್ ಮಾಡಿದೆ.

'ಕೆಜಿಎಫ್ 2' ಡೈಲಾಗ್ ವೈರಲ್

ವಿಂಬಲ್ಡನ್‌ನಲ್ಲಿ 'ಕೆಜಿಎಫ್ 2' ಸಿನಿಮಾ ಡೈಲಾಗ್ ವೈರಲ್ ಆಗುತ್ತಿದ್ದಂತೆ ರಾಕಿ ಭಾಯ್ ಫ್ಯಾನ್ಸ್ ಫುಲ್ ಖುಷಿಯಾಗಿದ್ದಾರೆ. ವಿಂಬಲ್ಡನ್ ಅಧಿಕಾರಿಗಳು ಮಾಡಿದ ಟ್ವೀಟ್ ಅನ್ನು ರೀ-ಟ್ವೀಟ್ ಮಾಡುತ್ತಿದ್ದಾರೆ. ಅಭಿಮಾನಿಗಳು ಕೂಡ ಸೋಶಿಯಲ್ ಮೀಡಿಯಾದಲ್ಲಿ ರಾಕಿ ಭಾಯ್ ಡೈಲಾಗ್ ಅನ್ನು ವೈರಲ್ ಮಾಡುತ್ತಿದ್ದಾರೆ.

'ಪುಷ್ಪ'-'ಕೆಜಿಎಫ್ 2' ಕ್ರೇಜ್

ದಕ್ಷಿಣ ಭಾರತದ ಎರಡು ಸಿನಿಮಾ ವಿಶ್ವದಾದ್ಯಂತ ಕ್ರೇಜ್ ಹುಟ್ಟಾಕಿದ್ದವು. ಅಲ್ಲು ಅರ್ಜುನ್ 'ಪುಷ್ಪ' ಸಿನಿಮಾದ ತಗ್ಗದೆಲೆ ಮ್ಯಾನರಿಸಂ ವಿಶ್ವದ ಮೂಲೆ ಮೂಲೆಯಲ್ಲೂ ಅನುಕರಣೆ ಮಾಡಿದ್ದರು. ಇನ್ನೊಂದು ಕಡೆ ಕೆಜಿಎಫ್ 2 ಸಿನಿಮಾದ ಡೈಲಾಗ್ ಕಿಕ್ ಕೊಡುತ್ತಿದೆ. ಈ ಎರಡೂ ಸಿನಿಮಾಗಳು ಈ ವರ್ಷ ಸಖತ್ ಕ್ರೇಜ್ ಅನ್ನು ಹುಟ್ಟಾಕುತ್ತಿವೆ.