'ಕೆ.ಜಿ.ಎಫ್'ನಲ್ಲಿ ರಾಕಿಂಗ್ ಸ್ಟಾರ್ ಯಶ್ ದರ್ಬಾರ್

ಸ್ಯಾಂಡಲ್ ವುಡ್ ನ ಲೇಟೆಸ್ಟ್ 'ಬಾಕ್ಸ್ ಆಫೀಸ್ ಸುಲ್ತಾನ್' ಯಶ್. ಸತತ ಹಿಟ್ ಸಿನಿಮಾಗಳನ್ನೇ ನೀಡುತ್ತಾ ಬಂದಿರುವ ಯಶ್, ಸದ್ಯ 'ಮಾಸ್ಟರ್ ಪೀಸ್' ಚಿತ್ರದ ಚಿತ್ರೀಕರಣದಲ್ಲಿ ಬಿಜಿಯಾಗಿದ್ದಾರೆ.

'ಮಾಸ್ಟರ್ ಪೀಸ್' ಮುಗಿದ ಬಳಿಕ ಯಶ್ ಮುಂದಿನ ಚಿತ್ರ ಯಾವುದು? ಈ ಪ್ರಶ್ನೆಗೆ ಇದೀಗ ಅಧಿಕೃತ ಉತ್ತರ ಸಿಕ್ಕಿದೆ. 'ಉಗ್ರಂ' ಚಿತ್ರದ ನಿರ್ದೇಶಕ ಪ್ರಶಾಂತ್ ನೀಲ್ ಜೊತೆ ಯಶ್ ಸಿನಿಮಾ ಮಾಡುತ್ತಿರುವ ಸುದ್ದಿಯನ್ನ ಇದೇ 'ಫಿಲ್ಮಿಬೀಟ್ ಕನ್ನಡ'ದಲ್ಲಿ ನೀವು ಓದಿದ್ರಿ.

ಅದರಂತೆ, 'ಮಾಸ್ಟರ್ ಪೀಸ್' ಮುಗಿದ ಬಳಿಕ ಯಶ್, ಈ ಚಿತ್ರವನ್ನ ಕೈಗೆತ್ತಿಕೊಳ್ಳಲಿದ್ದಾರೆ. ಚಿತ್ರಕ್ಕೆ ಅಧಿಕೃತ ಟೈಟಲ್ ಇನ್ನೂ ಫಿಕ್ಸ್ ಮಾಡದೇ ಇದ್ದರೂ, 'ಕೆ.ಜಿ.ಎಫ್' ಅಂತ ಹೇಳಲಾಗುತ್ತಿದೆ.

'ಕೆ.ಜಿ.ಎಫ್'...ಟೈಟಲ್ ಹೇಳಿದ ತಕ್ಷಣ ನಿಮಗೆ ನೆನಪಾಗುವುದು ಚಿನ್ನದ ಗಣಿ. ಅದರಂತೆ ಕೆ.ಜಿ.ಎಫ್ ನ ಗತಕಾಲದ ವೈಭವ ಈ ಚಿತ್ರದಲ್ಲಿ ಮರುಕಳಿಸಲಿದೆಯಂತೆ. ಅಂದ್ಹಾಗೆ, ಕೆ.ಜಿ.ಎಫ್ ಸಿನಿಮಾ ನೈಜ ಘಟನೆ ಆಧಾರಿತ ಚಿತ್ರವಾಗಿದ್ದು, ಯಶ್ ಪಾತ್ರ ಪ್ರಖ್ಯಾತ ವ್ಯಕ್ತಿಯೊಬ್ಬರನ್ನ ಪ್ರತಿನಿಧಿಸಲಿದೆ. [ರಾಕಿಂಗ್ ಸ್ಟಾರ್ ಯಶ್ ಹೊಸ ಸಿನಿಮಾ 'ಕೆಜಿಎಫ್']

70 ರ ದಶಕದ ಬ್ಯಾಕ್ ಡ್ರಾಪ್ ನಲ್ಲಿ ಚಿತ್ರ ತಯಾರಾಗಲಿದ್ದು, ಅದಕ್ಕೆ ಪೂರ್ವ ತಯಾರಿಯಲ್ಲಿ ಈಗಾಗಲೇ ಚಿತ್ರತಂಡ ತೊಡಗಿದೆ. ನಿಜ ಕಥೆ ಆದ್ದರಿಂದ ನಿರ್ದೇಶಕ ಪ್ರಶಾಂತ್ ನೀಲ್ ಅದಾಗಲೇ ಸಿಕ್ಕಾಪಟ್ಟೆ ರಿಸರ್ಚ್ ಮಾಡುತ್ತಿದ್ದಾರೆ. [ಇನ್ನೆರಡು ವರ್ಷ ರಾಕಿಂಗ್ ಸ್ಟಾರ್ ಯಶ್ ಫುಲ್ ಬಿಜಿ]

'ಮಾಸ್ಟರ್ ಪೀಸ್' ಚಿತ್ರಕ್ಕೆ ಬಂಡವಾಳ ಹಾಕುತ್ತಿರುವ ವಿಜಯ್ ಕಿರಗಂದೂರ್, ಈ ಚಿತ್ರವನ್ನೂ ನಿರ್ಮಾಣ ಮಾಡುತ್ತಿದ್ದಾರೆ. ಒಂದ್ಕಡೆ, ಸೂಪರ್ ಹಿಟ್ 'ಉಗ್ರಂ' ಚಿತ್ರದ ನಿರ್ದೇಶಕ, ಇನ್ನೊಂದ್ಕಡೆ 'ಕೆ.ಜಿ.ಎಫ್' ನೈಜ ಘಟನೆ ಆಧಾರಿತ ಚಿತ್ರ. ಇಷ್ಟು ಸಾಕು, ಇನ್ಮುಂದೆ 'ಕೆ.ಜಿ.ಎಫ್' ಹವಾ ಶುರುವಾಗುವುದಕ್ಕೆ. (ಏಜೆನ್ಸೀಸ್)