'ಅದು ನಮ್ಮ ಸಿನಿಮಾ ವೃತ್ತಿಯ ಆರಂಭವಷ್ಟೇ ಆಗಿರಲಿಲ್ಲ': ಮೊದಲ ಸಿನಿಮಾ ಸ್ಮರಿಸಿದ ಯಶ್

ಸಿನಿಮಾ ಬದುಕಷ್ಟೇ ಅಲ್ಲ

'ಮೊಗ್ಗಿನ ಮನಸ್ಸು' ಬಿಡುಗಡೆಯಾಗಿ 12 ವರ್ಷಗಳಾಯಿತು ಎನ್ನುವುದು ಈಗಷ್ಟೇ ಅರಿವಾಯಿತು. ನನ್ನನ್ನು ಮತ್ತು ರಾಧಿಕಾ ಇಬ್ಬರನ್ನೂ ಜತೆಯಾಗಿ ಪರಿಚಯಿಸಿದ ಸಿನಿಮಾ. ಆಗ ಶುರುಮಾಡಿದ್ದು ನಮ್ಮ ಸಿನಿಮಾ ಜೀವನವನ್ನಷ್ಟೇ ಅಲ್ಲ ಎನ್ನುವ ಯೋಚನೆಯೂ ಇರಲಿಲ್ಲ ಎಂದು ಯಶ್ ಹೇಳಿದ್ದಾರೆ.

ಮೊಗ್ಗಿನ ಮನಸ್ಸಿನಿಂದ ಶುರು

'ನಂದಗೋಕುಲ' ಧಾರಾವಾಹಿಯಲ್ಲಿ ಜತೆಯಾಗಿ ನಟಿಸಿದ್ದ ನಿಜ ಜೀವನದ ಜೋಡಿ, ಯಶ್ ಮತ್ತು ರಾಧಿಕಾ ಪಂಡಿತ್ ತೆರೆಯ ಮೇಲೆ ಹಲವು ಸಿನಿಮಾಗಳಲ್ಲಿ ಜೋಡಿಯಾಗಿ ಕಾಣಿಸಿಕೊಂಡಿದ್ದಾರೆ. ಅದಕ್ಕೆ ಆರಂಭ ಕೊಟ್ಟಿದ್ದು 'ಮೊಗ್ಗಿನ ಮನಸ್ಸು'. ಕಾಲೇಜು ಮೆಟ್ಟಿಲೇರಿದ ತರುಣ- ತರುಣಿಯರ ಮನಸ್ಸಿನ ತಲ್ಲಣ, ಪ್ರೇಮದ ಸೆಳೆತಗಳನ್ನು ಕಟ್ಟಿಕೊಟ್ಟಿದ್ದ ಈ ಚಿತ್ರ, ಸೂಪರ್ ಹಿಟ್ ಆಗಿತ್ತು. ಹಲವು ಪ್ರಶಸ್ತಿಗಳನ್ನೂ ತಂದುಕೊಟ್ಟಿತ್ತು.

ಚಿತ್ರತಂಡಕ್ಕೆ ಕೃತಜ್ಞತೆ ಸಲ್ಲಿಸಿದ ಯಶ್

ಇಂತಹ ವಿಶೇಷ ಸಿನಿಮಾಕ್ಕಾಗಿ ನಮ್ಮ ಚಿತ್ರದ ನಿರ್ಮಾಪಕರಾದ ಇ. ಕೃಷ್ಣಪ್ಪ ಮತ್ತು ಗಂಗಾಧರ್ ಅವರಿಗೆ ಧನ್ಯವಾದಗಳು. ನಮ್ಮ ಛಾಯಾಗ್ರಾಹಕ ಚಂದ್ರು ಸರ್ ಹಾಗೂ ನನ್ನನ್ನು ನಂಬಿದ್ದಕ್ಕಾಗಿ ನಮ್ಮ ನಿರ್ದೇಶಕ ಶಶಾಂಕ್ ಅವರಿಗೆ ವಿಶೇಷ ಕೃತಜ್ಞತೆಗಳು ಎಂದು ಯಶ್ ತಮ್ಮ ಪಯಣಕ್ಕೆ ಬುನಾದಿ ಹಾಕಿದ ಚಿತ್ರತಂಡವನ್ನು ಸ್ಮರಿಸಿದ್ದಾರೆ.

ಕೆಜಿಎಫ್‌ನ ಹೊಸ ಸ್ಟಿಲ್

ಈ ನಡುವೆ ಅಭಿಮಾನಿಗಳು ಕಾತರದಿಂದ ಕಾದಿರುವ 'ಕೆಜಿಎಫ್ ಚಾಪ್ಟರ್ 2' ಚಿತ್ರದಿಂದಲೂ ವಿಶೇಷ ಗಿಫ್ಟ್ ಸಿಕ್ಕಿದೆ. 12 ವರ್ಷದ ವೃತ್ತಿ ಬದುಕು ಪೂರೈಸಿದ ಸವಿ ಗಳಿಗೆಗಾಗಿ ಕೆಜಿಎಫ್ ಚಾಪ್ಟರ್ 2ನ ಯಶ್ ಅವರ ಹೊಸ ಚಿತ್ರವೊಂದನ್ನು ಬಿಡುಗಡೆ ಮಾಡಲಾಗಿದೆ. ಕೈಯಲ್ಲಿ ಕ್ಯಾಮೆರಾ ಹಿಡಿದು ಕುಳಿತಿರುವ ಈ ಪೋಸ್ ಕಂಡು ಯಶ್ ಫ್ಯಾನ್ಸ್ ಫಿದಾ ಆಗಿದ್ದಾರೆ.