BBK OTT : ಬಿಗ್‌ಬಾಸ್ ಮನೆ ಸ್ಪರ್ಧಿಗಳಿಗೆ ಐದು ಲಕ್ಷ ಬಹುಮಾನದ ಆಫರ್: ಗೆಲ್ಲಲು ಏನು ಮಾಡಬೇಕು?

ಐದು ಲಕ್ಷ ಬಹುಮಾನ ಘೋಷಿಸಿದ ಬಿಗ್‌ಬಾಸ್

''ಬಿಗ್‌ಬಾಸ್ ಒಟಿಟಿ ಮೊದಲ ಸೀಸನ್ ಮುಗಿಯಲು ಇನ್ನೆರಡು ವಾರವಷ್ಟೆ ಬಾಕಿ ಇದೆ. ಈ ಹಂತ ತಲುಪಲು ನೀವೆಲ್ಲ ಒಟ್ಟಾಗಿ, ಒಬ್ಬೊಬ್ಬರಾಗಿ ವಿವಿಧ ಆಟಗಳನ್ನು ಆಡಿದ್ದೀರಿ. ಕೆಲವು ಟಾಸ್ಕ್‌ಗಳಲ್ಲಿ ಗೆದ್ದಿದ್ದೀರಿ, ಕೆಲವು ಟಾಸ್ಕ್‌ಗಳಲ್ಲಿ ಸೋತಿದ್ದೀರಿ. ಈ ವಾರ ಬಿಗ್‌ಬಾಸ್‌ ಮನೆಯೆ ಸದಸ್ಯರಿಗೆ ಐದು ಲಕ್ಷ ಹಣ ಗೆಲ್ಲುವ ಅವಕಾಶವನ್ನು ನೀಡಲಾಗುತ್ತಿದೆ. ಈ ಹಣವನ್ನು ಮನೆಯ ಸದಸ್ಯರೆಲ್ಲರೂ ಒಟ್ಟಿಗೆ ಆಡಿ ಸಂಗ್ರಹಿಸಬೇಕಾಗುತ್ತದೆ'' ಎಂದು ಬಿಗ್‌ಬಾಸ್ ಘೋಷಣೆ ಮಾಡಿದ್ದಾರೆ.

ಒಂದೊಂದು ಟಾಸ್ಕ್‌ಗೆ ಒಂದೊಂದು ಮೌಲ್ಯ

ಮುಂದುವರೆದು, ''ಐದು ಲಕ್ಷ ರುಪಾಯಿ ಹಣ ಗಳಿಸಲು ವಿವಿಧ ಟಾಸ್ಕ್‌ಗಳು ಇರುತ್ತವೆ. ಪ್ರತಿ ಟಾಸ್ಕ್‌ಗೆ ಒಂದೊಂದು ಮೌಲ್ಯ ಇರುತ್ತದೆ. ಟಾಸ್ಕ್‌ನಲ್ಲಿ ಭಾಗವಹಿಸುವ ಆಟಗಾರರ ಸಂಖ್ಯೆ, ಹೆಸರು ಹೇಳಲಾಗುತ್ತದೆ. ಮನೆಯ ಸದಸ್ಯರು ಆಡಿ ಗೆದ್ದು ಹಣವನ್ನು ಖಾತೆಗೆ ಜಮಾ ಮಾಡಿಕೊಳ್ಳಬೇಕು. ಅಂತಿಮವಾಗಿ ಉಳಿದ ಹಣವನ್ನು ಫಿನಾಲೆಯ ದಿನ ಜನ ಮೆಚ್ಚಿದ ಒಬ್ಬ ಆಟಗಾರನಿಗೆ ನೀಡಲಾಗುವುದು. ಎಲ್ಲರೂ ಮನಸಿಟ್ಟು ಆಡಿ, ಇನ್ನು ಉಳಿದಿರುವುದು 13 ದಿನಗಳು ಮಾತ್ರ'' ಎಂದು ಬಿಗ್‌ಬಾಸ್ ಹೇಳಿದ್ದಾರೆ.

ಐದು ಲಕ್ಷ ಹಣ ಗೆಲ್ಲುವುದು ಹೇಗೆ?

ಪ್ರತಿ ಟಾಸ್ಕ್‌ಗೆ ಇಂತಿಷ್ಟೆಂದು ಮೌಲ್ಯವನ್ನು ಬಿಗ್‌ಬಾಸ್ ನಿಗದಿ ಪಡಿಸುತ್ತಾರೆ ಆ ಟಾಸ್ಕ್‌ ಅನ್ನು ಜಯಿಸಿದರೆ ಆ ಮೌಲ್ಯ ಆಟಗಾರರ ಖಾತೆಗೆ ಜಮಾ ಆಗುತ್ತದೆ. ಸೋತರೆ ಒಟ್ಟು ಮೌಲ್ಯದ ಕೆಲ ಭಾಗವಷ್ಟೆ ಆಟಗಾರರ ಖಾತೆಗೆ ಜಮಾ ಆಗುತ್ತದೆ. ಅಂತಿಮವಾಗಿ ಉಳಿದ ಹಣವನ್ನು ಒಬ್ಬ ಸ್ಪರ್ಧಿಗೆ ಬಿಗ್‌ಬಾಸ್ ವೇದಿಕೆ ಮೇಲೆ ಸುದೀಪ್ ನೀಡುತ್ತಾರೆ. ಆ ಲಕ್ಕಿ ಆಟಗಾರನನ್ನು ಜನರೇ ನಿರ್ಧಾರ ಮಾಡಿ ಮತ ಚಲಾಯಿಸಿ ಆಯ್ಕೆ ಮಾಡುತ್ತಾರೆ. ಆ ಲಕ್ಕಿ ಸ್ಪರ್ಧಿ ಯಾರಾಗಲಿದ್ದಾರೆ ಎಂಬುದು ಕುತೂಹಲ.

ಮನೆಯಲ್ಲಿ ಉಳಿದಿರುವ ಸದಸ್ಯರು ಯಾರು?

ಬಿಗ್‌ಬಾಸ್ ಕನ್ನಡ ಒಟಿಟಿ ಮೊದಲ ಸೀಸನ್‌ ಆರಂಭವಾದಾಗ ಮನೆಯಲ್ಲಿ 16 ಮಂದಿ ಸದಸ್ಯರಿದ್ದರು. ಶೋ ಮುಗಿಯಲು ಇನ್ನು ಹನ್ನೆರಡು ದಿನ ಇರುವಾಗ ಬಿಗ್‌ಬಾಸ್ ಮನೆಯಲ್ಲಿ ಉಳಿದಿರುವುದು ಕೇವಲ 9 ಮಂದಿ. ಆರ್ವರ್ಧನ್ ಗುರೂಜಿ, ಸೋಮಣ್ಣ ಮಾಚಿಮಾಡ, ರಾಕೇಶ್, ರೂಪೇಶ್, ಜಶ್ವಂತ್, ಸಾನ್ಯಾ ಐಯ್ಯರ್, ಜಯಶ್ರೀ, ನಂದಿನಿ, ಸೋನು ಗೌಡ ಇವರುಗಳು ಮಾತ್ರ ಮನೆಯಲ್ಲಿದ್ದಾರೆ. ಕಳೆದ ವಾರ ಚೈತ್ರಾ ಹಳ್ಳಿಕೆರೆ ಹಾಗೂ ಅಕ್ಷತಾ ಕುಕಿ ಒಟ್ಟಿಗೆ ಮನೆಯಿಂದ ಹೊರಬಂದಿದ್ದಾರೆ. ರಾಕೇಶ್, ರೂಪೇಶ್ ಅವರುಗಳು ಫಿನಾಲೆ ವಾರಕ್ಕೆ ಹೋಗುವ ಸಾಧ್ಯತೆ ಹೆಚ್ಚಿದೆ ಎನ್ನಲಾಗುತ್ತಿದೆ.