ಆಗಸ್ಟ್‌ನಿಂದ ಬಾಲಿವುಡ್ ಸಿನಿಮಾಗಳು ದಿಢೀರನೆ ಒಟಿಟಿಯಲ್ಲಿ ರಿಲೀಸ್ ಆಗಲ್ಲ: 8 ವಾರ ಕಾಯ್ಬೇಕು!

ಒಟಿಟಿಯಲ್ಲಿ 8 ವಾರಗಳ ಬಳಿಕ ರಿಲೀಸ್

ಕೋವಿಡ್ ಬಳಿಕ ಥಿಯೇಟರ್‌ಗಳಿಗೆ ಜನರು ಬರುತ್ತಿದ್ದಾರೆ. ಶೇ.100ರಷ್ಟು ಪ್ರದರ್ಶನ ಕಾಣುತ್ತಿದೆ. ಈ ಕಾರಣಕ್ಕಾಗಿ ಹೆಚ್ಚೆಚ್ಚು ಸಿನಿಮಾಗಳು ಬಿಡುಗಡೆಯಾಗುತ್ತಿದೆ. ಆದರೆ, ಸಿನಿಮಾ ಬಿಡುಗಡೆಯಾದ ಕೆಲವೇ ದಿನಗಳಲ್ಲಿಯೇ ಒಟಿಟಿಗೆ ಲಗ್ಗೆ ಇಡುತ್ತಿದೆ. ಇದರಿಂದ ಥಿಯೇಟರ್ ಮಾಲೀಕರಿಗೆ ನಷ್ಟ ಆಗುತ್ತಿದೆ. ಕೊರೊನಾ ಸಮಯದಲ್ಲಿ ಜನರು ಥಿಯೇಟರ್‌ಗಳಿಗೆ ಬಾರದೇ ಇದ್ದಿದ್ದರಿಂದ ನಾಲ್ಕು ವಾರಗಳಿಗೆ ಒಟಿಟಿಯಲ್ಲಿ ಸಿನಿಮಾ ರಿಲೀಸ್ ಮಾಡುತ್ತಿದ್ದರು. ಆದ್ರೀಗ 8 ವಾರಗಳಾದ್ಮೇಲೆ ರಿಲೀಸ್ ಆಗ್ಬೇಕು ಎಂಬ ರೂಲ್ಸ್ ತರಲು ಮುಂದಾಗಿದ್ದಾರೆ.

ಒಟಿಟಿ ರಿಲೀಸ್ 8 ವಾರಗಳ ಬಳಿಕ ಯಾಕೆ?

'ಕೆಜಿಎಫ್ 2' ಹಾಗೂ RRR ಸಿನಿಮಾಗಳು ಬಾಕ್ಸಾಫೀಸ್‌ನಲ್ಲಿ 1000 ಕೋಟಿ ಲೂಟಿ ಮಾಡಿವೆ. ಈ ಎರಡು ಸಿನಿಮಾಗಳನ್ನು ನೋಡಿಕೊಂಡು ಬಾಲಿವುಡ್‌ ನಿರ್ಮಾಪಕರು ಈ ನಿರ್ಧಾರಕ್ಕೆ ಬಂದಿದ್ದಾರೆ. ಅಲ್ಲದೆ 'ದಿ ಕಾಶ್ಮೀರ್ ಫೈಲ್ಸ್', 'ಭೂಲ್ ಭುಲಯ್ಯ 2' ಅಂತಹ ಸಿನಿಮಾಗಳೂ ಥಿಯೇಟರ್‌ನಿಂದ ಒಳ್ಳೆಯ ಕಲೆಕ್ಷನ್ ಮಾಡಿದೆ. ಈ ಕಾರಣಕ್ಕೆ ನಿರ್ಮಾಪಕರೆಲ್ಲಾ ಸೇರಿಕೊಂಡು ಒಟಿಟಿಗೆ 8 ವಾರಗಳ ಬಳಿಕ ಸಿನಿಮಾ ರಿಲೀಸ್ ಮಾಡ್ಬೇಕು ಎಂದು ನಿರ್ಧಾರ ಕೈಗೊಂಡಿದ್ದಾರೆ ಎಂದು ವರದಿಯಾಗಿದೆ.

ಆಗಸ್ಸ್ ತಿಂಗಳಿಂದಲೇ ಹೊಸ ರೂಲ್ಸ್

ಆಗಸ್ಟ್ ತಿಂಗಳಿಂದಲೇ 8 ವಾರಗಳ ಬಳಿಕ ಒಟಿಟಿಯಲ್ಲಿ ಸಿನಿಮಾ ಬಿಡುಗಡೆ ಮಾಡುವ ನಿರ್ಧಾರ ಮಾಡಲಾಗಿದೆ. ಅಕ್ಷಯ್ ಕುಮಾರ್ ಅಭಿನಯದ 'ರಕ್ಷಾ ಬಂಧನ್', 'ಲಾಲ್ ಸಿಂಗ್ ಚಡ್ಡಾ', 'ಲೈಗರ್', 'ಬ್ರಹ್ಮಾಸ್ತ್ರ', ಸೇರಿದಂತೆ ಹಲವು ಬಿಗ್ ಸಿನಿಮಾಗಳು ಬಿಡುಗಡೆ ಸಜ್ಜಾಗಿವೆ. ಈ ಎಲ್ಲಾ ಸಿನಿಮಾಗಳು 8 ವಾರಗಳ ಬಳಿಕವೇ ಒಟಿಟಿಗೆ ಲಗ್ಗೆ ಇಡಲಿವೆ. ನಿರ್ಮಾಪಕರು ಹಾಗೂ ಪ್ರದರ್ಶಕರ ನಡುವಿನ ಈ ಒಪ್ಪಂದ ಹೇಗಿರುತ್ತೆ ಎಂದು ನೋಡಬೇಕಿದೆ.

50 ದಿನಗಳ ಬಳಿಕ ರಿಲೀಸ್

ಟಾಲಿವುಡ್‌ನಲ್ಲೂ ಸಿನಿಮಾ ಥಿಯೇಟರ್‌ನಲ್ಲಿ ಬಿಡುಗಡೆಗೊಂಡ 50 ದಿನಗಳ ಬಳಿಕ ಒಟಿಟಿಗೆ ರಿಲೀಸ್ ಆಗಬೇಕು ಎಂಬ ರೂಲ್ಸ್ ತಂದಿದ್ದರು. ಆ ಬಳಿಕ ಈಗ ಬಾಲಿವುಡ್‌ ಕೂಡ ಅದೇ ನಿರ್ಧಾರಕ್ಕೆ ಬಂದಿದೆ. ಟಾಲಿವುಡ್ ಹಾಗೂ ಬಾಲಿವುಡ್ ನೋಡಿ ಉಳಿದ ಚಿತ್ರರಂಗ ಕೂಡ ಇದೇ ನಿರ್ಧಾರ ಕೈಗೊಳ್ಳುತ್ತಾ? ಒಟಿಟಿ ವೇದಿಕೆಗಳ ನಿರ್ಧಾರವೇನು? ಅನ್ನುವುದು ಮುಂದಿನ ದಿನಗಳಲ್ಲಿ ತಿಳಿಯಲಿದೆ.