ಬಾಕ್ಸಾಫೀಸ್‌ನಲ್ಲಿ 'ಗಾಡ್‌ಫಾದರ್' ಕಥೆ ಏನಾಯ್ತು? ಓಟಿಟಿ ರಿಲೀಸ್ ಡೇಟ್ ಫಿಕ್ಸ್: ಎಲ್ಲಿ, ಯಾವಾಗ?

ನ.19ಕ್ಕೆ ಓಟಿಟಿಗೆ 'ಗಾಡ್‌ಫಾದರ್'

ಇಷ್ಟು ದಿನ ಅಂತರಾಷ್ಟ್ರೀಯ ಕಂಟೆಂಟ್‌ನ ಮಾತ್ರ ಗಣನೆಗೆ ತೆಗೆದುಕೊಳ್ಳುತ್ತಿದ್ದ ನೆಟ್‌ಫ್ಲಿಕ್ಸ್ ನಿಧಾನವಾಗಿ ದಕ್ಷಿಣ ಭಾರತದ ಸಿನಿಮಾಗಳನ್ನು ಕೊಂಡುಕೊಳ್ಳುತ್ತಿದೆ. ನವೆಂಬರ್ 19ಕ್ಕೆ ಸ್ಮಾಲ್‌ಸ್ಕ್ರೀನ್‌ನಲ್ಲಿ 'ಗಾಡ್‌ಫಾದರ್' ಆರ್ಭಟ ಶುರುವಾಗಲಿದೆ. ಚಿರು ಜೊತೆಗಿನ ಸ್ನೇಹಕ್ಕಾಗಿ ಸಲ್ಮಾನ್ ಖಾನ್ ಮೊದಲ ಬಾರಿಗೆ ದಕ್ಷಿಣ ಭಾರತ ಚಿತ್ರದಲ್ಲಿ ನಟಿಸಿದ್ದರು. ಇವರಿಬ್ಬರ ಕಾಂಬಿನೇಷನ್ ಭಾರೀ ಕುತೂಹಲ ಕೆರಳಿಸಿತ್ತು. ಅದಕ್ಕೆ ತಕ್ಕಂತೆ ಓಪನಿಂಗ್ ಸಿಕ್ಕಿತ್ತು.

ಮಾಲಿವುಡ್ 'ಲೂಸಿಫರ್' ರೀಮೆಕ್

3 ವರ್ಷಗಳ ಹಿಂದೆ ಮಲಯಾಳಂನಲ್ಲಿ 'ಲೂಸಿಫರ್' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಪೃಥ್ವಿರಾಜ್ ಸುಕುಮಾರನ್ ನಿರ್ದೇಶಿಸಿ ನಟಿಸಿದ್ದ ಚಿತ್ರದಲ್ಲಿ ಮೋಹನ್ ಲಾಲ್ ಲೀಡ್‌ ರೋಲ್‌ನಲ್ಲಿ ಮಿಂಚಿದ್ದರು. ಚಿತ್ರ ತೆಲುಗಿಗೂ ಡಬ್ ಆಗಿ ಬಂದಿತ್ತು. ಆದರೂ ಕೂಡ ಈ ಚಿತ್ರವನ್ನು ತೆಲುಗಿಗೆ ರೀಮೆಕ್ ಮಾಡುವ ಪ್ರಯತ್ನ ಮಾಡಿದ್ದರು ಚಿರಂಜೀವಿ. ಇದನ್ನು ನೋಡಿ ಕೆಲವರು ತಮಾಷೆ ಮಾಡಿದ್ದರು. ಇನ್ನು ಟೀಸರ್, ಪೋಸ್ಟರ್, ಟ್ರೈಲರ್ ಎಲ್ಲದನ್ನು ಮೂಲ ಸಿನಿಮಾ ಜೊತೆಗೆ ಹೋಲಿಸಿ ಗೇಲಿ ಮಾಡಿದ್ದರು. ಆದರೆ 'ಗಾಡ್‌ಫಾದರ್' ಸಿನಿಮಾ ನೋಡಿದ ಪ್ರೇಕ್ಷಕರು ಮೆಚ್ಚಿಕೊಂಡಿದ್ದರು.

ಬಾಕ್ಸಾಫೀಸ್‌ ರಿಸಲ್ಟ್ ಏನಾಯ್ತು?

ಅಕ್ಟೋಬರ್ 5ರಂದು 'ಗಾಡ್‌ಫಾದರ್' ಸಿನಿಮಾ ರಿಲೀಸ್ ಆಗಿತ್ತು. ಅದೇ ದಿನ ನಾಗಾರ್ಜುನ ನಟನೆಯ 'ದಿ ಘೋಸ್ಟ್' ಸಿನಿಮಾ ಕೂಡ ಪ್ರೇಕ್ಷಕರ ಮುಂದೆ ಬಂದಿತ್ತು. ಮೆಗಾಸ್ಟಾರ್ ಆರ್ಭಟದ ಎದುರು ಕಿಂಗ್ ನಾಗಾರ್ಜುನ ಹವಾ ನಡೆಯಲೇ ಇಲ್ಲ. ಆದರೆ ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ಸಿಕ್ಕಿತ್ತು. ಸದ್ಯ ಸಿನಿಮಾ ಇವತ್ತಿಗೂ ಕೆಲವೆಡೆ ಪ್ರದರ್ಶನ ಕಾಣುತ್ತಿದೆ. ಚಿತ್ರತಂಡ ಸಕ್ಸಸ್ ಮೀಟ್ ಕೂಡ ಮಾಡಿ ಪ್ರೇಕ್ಷಕರಿಗೆ ಧನ್ಯವಾದ ತಿಳಿಸಿತ್ತು. ಆದರೆ ಕಲೆಕ್ಷನ್ ಬಗ್ಗೆ ಸರಿಯಾದ ಮಾಹಿತಿ ಸಿಗಲೇಯಿಲ್ಲ. ಕೆಲವರು ಸಿನಿಮಾ ಸೂಪರ್ ಹಿಟ್ ಅಂದರೆ ಮತ್ತೆ ಕೆಲವರು ಫ್ಲಾಪ್ ಎನ್ನುತ್ತಿದ್ದಾರೆ.

ಹೊಸ ಅವತಾರದಲ್ಲಿ ಚಿರು ಅಬ್ಬರ

ಬಹುಕೋಟಿ ವೆಚ್ಚದ ಅದ್ಧೂರಿ ಸಿನಿಮಾ 'ಗಾಡ್‌ಫಾದರ್'. ಚಿರಂಜೀವಿ, ಸಲ್ಮಾನ್ ಖಾನ್ ಜೊತೆಗೆ ನಯನತಾರಾ, ಸತ್ಯದೇವ್, ಸಮುದ್ರ ಖನಿ ಚಿತ್ರದ ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದರು. 'ಆಚಾರ್ಯ' ಸೋಲಿನ ಕಹಿ ಉಂಡಿದ್ದ ಚಿರಂಜೀವಿ ಒಂದು ರೇಂಜಿಗೆ ಪ್ರೇಕ್ಷಕರನ್ನು ರಂಜಿಸುವಲ್ಲಿ ಸಕ್ಸಸ್ ಕಂಡಿದ್ದರು. ಮೋಹನ್‌ಲಾಲ್‌ ಲುಕ್‌ನ ಯಥಾವತ್ ಕಾಪಿ ಮಾಡದೇ ಬಹಳ ವಿಭಿನ್ನವಾಗಿ ಪ್ರೇಕ್ಷಕರ ಮುಂದೆ ಬಂದಿದ್ದರು. ಅಭಿಮಾನಿಗಳಿಂದ ಭರ್ಜರಿ ರೆಸ್ಪಾನ್ಸ್ ಸಿಕ್ಕಿತ್ತು.