ಪ್ರೀತಿಯಲ್ಲಿ ಬಿದ್ದರೇ ಶಮಿತಾ ಶೆಟ್ಟಿ? ಒಂದು ಮುತ್ತಿನ ಕಥೆ

ಶಮಿತಾಗೆ ಮುತ್ತುಕೊಟ್ಟ ರಾಕೇಶ್

ನಿನ್ನೆಯ ಎಪಿಸೋಡ್‌ನಲ್ಲಿಯಂತೂ ಶಮಿತಾ ಶೆಟ್ಟಿ ಮಲಗಿದ್ದಾಗ ಆಕೆಯನ್ನು ಎಬ್ಬಿಸಲು ಹೋದ ರಾಕೇಶ್, ಶಮಿತಾಗೆ ಮುತ್ತು ಕೊಟ್ಟು ಎಬ್ಬಿಸಿದ್ದಾರೆ. ಶಮಿತಾ ಸಹ ಮುಗುಳ್ನಗುತ್ತಾ ರಾಕೇಶ್‌ನ ಸಿಹಿಮುತ್ತನ್ನು ಸ್ವೀಕರಿಸಿದ್ದಾರೆ. ಆ ನಂತರ ಹೊರಗೆ ಬಂದು ಇಬ್ಬರೂ ಒಟ್ಟಿಗೆ ಹಾಡಿಗೆ ಸಣ್ಣದಾಗಿ ಹೆಜ್ಜೆ ಸಹ ಹಾಕಿದ್ದಾರೆ.

ರಾಕೇಶ್‌ಗೆ ಹೃದಯ ಕೊಟ್ಟ ಶಮಿತಾ

ನಂತರ ಸ್ಪರ್ಧಿಗಳ ನಡುವೆ ಏರ್ಪಡಿಸಲಾದ ಟಾಸ್ಕ್ ಒಂದರಲ್ಲಿ ಶಮಿತಾ ಶೆಟ್ಟಿ ತಮ್ಮ ಹೃದಯವನ್ನು ರಾಕೇಶ್‌ಗೆ ಕೊಟ್ಟಿದ್ದಾರೆ. ಶಮಿತಾ ಶೆಟ್ಟಿ ನೀಡಿದ ಹೃದಯ ಸ್ವೀಕರಿಸಿದ ರಾಕೇಶ್, ''ಶಮಿತಾ ಕೊಟ್ಟ ಹೃದಯವನ್ನು ಖುಷಿಯಿಂದ ಸ್ವೀಕರಿಸುತ್ತೇನೆ. ಮೊದಲಿಗೆ ನಾವಿಬ್ಬರೂ ತುಸು ಜಗಳ ಮಾಡಿದೆವು. ನಂತರ ದಿವ್ಯಾರ ಮಾತಿನಂತೆ ಶಮಿತಾ ಜೊತೆ ಮಾತನಾಡಲು ಆರಂಭಿಸಿದೆ. ಆ ಬಳಿಕವೇ ಶಮಿತಾಳ ವ್ಯಕ್ತಿತ್ವ ಅರ್ಥವಾಗಿ ನಾವು ಹೆಚ್ಚು ಕ್ಲೋಸ್ ಆದೆವು'' ಎಂದಿದ್ದಾರೆ ರಾಕೇಶ್.

ಶಮಿತಾ ನನಗೆ ಸೇರಿದವಳು ಎಂಬ ಭಾವ ಇದೆ: ರಾಕೇಶ್

ಮುಂದುವರೆದು, ''ನಾನು ಯಾರೊಂದಿಗೆ ಹತ್ತಿರವಾಗುತ್ತೇನೊ ಅವರೊಂದಿಗೆ ಬಹಳ ನಿಷ್ಠೆಯಿಂದ ಇರುತ್ತೇನೆ. ಇಲ್ಲಿಯೂ ಅಷ್ಟೆ ಶಮಿತಾ ಜೊತೆ ನಾನು ನಿಷ್ಠೆಯಿಂದ ಇರುತ್ತೇನೆ. ಶಮಿತಾ ಒಂದು ರೀತಿ ನನಗೆ ಸೇರಿದವಳು ಎಂಬ ಭಾವ ನನಗೆ ಉಲ್ಬಣವಾಗಿದೆ'' ಎಂದು ರಾಕೇಶ್ ಹೇಳಿದ್ದಾರೆ. ರಾಕೇಶ್ ಮಾತಿಗೆ ಭಾವುಕರಾದ ಶಮಿತಾ ರಾಕೇಶ್‌ ಅನ್ನು ತಬ್ಬಿಕೊಂಡು ಅವರ ಮಾತನ್ನು ಅನುಮೋದಿಸಿದ್ದಾರೆ.

ಸಿನಿಮಾದವಳೆಂಬ ಕಾರಣಕ್ಕೆ ದೂರ ಇಡಲಾಗಿದೆ: ಶಮಿತಾ

ಕೆಲವು ದಿನಗಳ ಹಿಂದೆ ಅಳುಬುರುಕಿಯಾಗಿದ್ದ ಶಮಿತಾ ಶೆಟ್ಟಿ ಇದೀಗ ಬೇರೆಯದೇ ರೀತಿಯಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಕೆಲವು ದಿನಗಳ ಹಿಂದೆ ತಮ್ಮನ್ನು ಬಿಗ್‌ಬಾಸ್‌ ಒಟಿಟಿ ಮನೆಯ ಇತರ ಸ್ಪರ್ಧಿಗಳು ಉದ್ದೇಶಪೂರ್ವಕವಾಗಿ ದೂರ ಇಟ್ಟಿದ್ದಾರೆ ಎಂದು ಕಣ್ಣೀರು ಹಾಕಿದ್ದರು. ''ಈ ಮನೆಯಲ್ಲಿ ಕ್ಲಾಸ್ ಆಧಾರದ ಮೇಲೆ ವಿಭಾಗಗಳು ಆಗಿಬಿಟ್ಟಿವೆ. ನಾನು ಸಿನಿಮಾ ರಂಗದಿಂದ ಬಂದಿದ್ದೇನೆ. ಸಿನಿಮಾ ಕುಟುಂಬದಿಂದ ಬಂದಿದ್ದೇನೆ (ಶೆಟ್ಟಿ ಕುಟುಂಬ) ನಾನು ನಟಿ, ನಾನು ಕ್ಲಾಸಿ ಎಂಬ ಕಾರಣಕ್ಕೆ ನನ್ನನ್ನು ಭಿನ್ನವಾಗಿ ನೋಡಲಾಗುತ್ತಿದೆ. ನಾನು ಸಿನಿಮಾ ಜಗತ್ತಿನ ಬಗ್ಗೆ ಮಾತನಾಡುತ್ತೇನೆ, ನನಗೆ ಅವಕಾಶ ಕೊಟ್ಟ ಜನರ ಬಗ್ಗೆ ಮಾತನಾಡಿದ್ದೇನೆ. ನನಗೆ ಅವಕಾಶ ಕೊಟ್ಟ ಜನ ಹೊರಗಿದ್ದಾರೆ. ಈ ಮನೆಯ ಜನರು ನನಗೆ ಅವಕಾಶ ಕೊಟ್ಟಿಲ್ಲ'' ಎಂದಿದ್ದರು ಶಮಿತಾ.

ಅಕ್ಕನ ಬಗ್ಗೆ ಮಾತನಾಡಿ ಕಣ್ಣೀರು ಹಾಕಿದ್ದ ಶಮಿತಾ

ಅದಕ್ಕೂ ಮುನ್ನ ಅಕ್ಕ ಶಿಲ್ಪಾ ಶೆಟ್ಟಿಯಿಂದ ತಾವು ಎದುರಿಸಿದ ಸಮಸ್ಯೆ ಬಗ್ಗೆ ಮಾತನಾಡಿ ಕಣ್ಣೀರು ಹಾಕಿದ್ದ ಶಮಿತಾ, ''''ಶಿಲ್ಪಾ ಶೆಟ್ಟಿಯ ತಂಗಿಯಾಗಿರುವುದು ಸುಲಭದ ಕಾರ್ಯವಲ್ಲ. ಎಲ್ಲರೂ ನನ್ನನ್ನು ಅಕ್ಕನಿಗೆ ಹೋಲಿಸಿ ಮಾತನಾಡುತ್ತಿದ್ದರು. ಅದು ನನಗೆ ಬಹಳ ಸಮಸ್ಯೆ ಕೊಟ್ಟಿದೆ. ಆದರೆ ನಾನು ಅಂಥಹಾ ಅಕ್ಕನನ್ನು ಪಡೆಯಲು ಪುಣ್ಯ ಮಾಡಿದ್ದೆ. ಆಕೆಯಿಂದಾಗಿ ನಾನು ಇಷ್ಟು ವರ್ಷ ಸಿನಿಮಾರಂಗದಲ್ಲಿ ಇರಲು ಸಾಧ್ಯವಾಯಿತು. ಆದರೆ ಆಕೆಯ ನೆರಳಿನಿಂದ ಆಚೆ ಬಂದು ನಾನು ನನ್ನದೇ ಆದ ಗುರುತನ್ನು ಪಡೆದುಕೊಂಡೆ'' ಎಂದಿದ್ದರು.