ಯಶ್ ಧ್ವನಿಗೆ ಮಾರು ಹೋದ ಸಮಂತಾ: ಈಡೇರುತ್ತಾ ಸ್ಯಾಮ್ ಆಸೆ?

'ಕಾಫಿ ವಿಥ್ ಕರಣ್‌' ಶೋ ಗೆ ಬಂದ ಸಮಂತಾ

ಸಮಂತಾ ಹಾಗೂ ಅಕ್ಷಯ್ ಕುಮಾರ್ 'ಕಾಫಿ ವಿಥ್ ಕರಣ್' ಶೋಗೆ ಬರುತ್ತಾರೆ ಅನ್ನೋ ಸುಳಿವು ಮೊದಲೇ ಸಿಕ್ಕಿತ್ತು. ಪ್ರೋಮೊಗಳು ಮತ್ತಷ್ಟು ಕುತೂಹಲವನ್ನು ಸೃಷ್ಟಿಸಿತ್ತು. ಈ ಬೆನ್ನಲ್ಲೇ ಜುಲೈ 21ಕ್ಕೆ ಡಿಸ್ನಿ ಹಾಟ್‌ಸ್ಟಾರ್ ಒಟಿಟಿ ವೇದಿಕೆಯಲ್ಲಿ ಸಮಂತಾ ಹಾಗೂ ಅಕ್ಷಯ್ ಕುಮಾರ್ ಅವರ ವಿಶೇಷ ಸಂದರ್ಶನ ಬಿದ್ದಿದೆ. ಕರಣ್‌ ಪ್ರಶ್ನೆಗಳಿಗೆ ಉತ್ತರಿಸುವ ವೇಳೆ ಸಮಂತಾ ಕೆಲವು ಇಂಟ್ರೆಸ್ಟಿಂಗ್ ವಿಷಯಗಳನ್ನು ಹೊರಹಾಕಿದ್ದಾರೆ.

ಯಶ್ ಧ್ವನಿಗೆ ಸಮಂತಾ ಫಿದಾ!

ಕರಣ್‌ ಜೋಹರ್ ಹಾಗೂ ಸಮಂತಾ ನಡುವಿನ ಸಂಭಾಷಣೆಯಲ್ಲಿ ಕೆಲವು ಆಸಕ್ತಿಕರಸ ವಿಷಯಗಳು ಹೊರಬಿದ್ದಿವೆ. "GPSನಲ್ಲಿ ನೀವು ಯಾರ ಧ್ವನಿಯನ್ನು ಕೇಳಲು ಇಷ್ಟ ಪಡುತ್ತೀರಾ? ಎಂದು ಪ್ರಶ್ನೆ ಮಾಡಿದ್ದರು. ಇದಕ್ಕೆ ಸಮಂತಾ ಒಂದು ಕ್ಷಣವೂ ಯೋಚನೆ ಮಾಡದೆ "GPSನಲ್ಲಿ ಯಶ್ ಧ್ವನಿಯನ್ನು ಕೇಳಲು ಇಷ್ಟ ಪಡುತ್ತೇನೆ" ಎಂದು ಹೇಳಿದ್ದಾರೆ. ಸಮಂತಾ ಟಾಕ್ ಶೋನಲ್ಲಿ ಯಶ್ ಹೆಸರು ಪ್ರಸ್ತಾಪ ಮಾಡಿದ್ದು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ. ಈ ಮೂಲಕ ಮುಂದಿನ ದಿನಗಳಲ್ಲಿ GPSನಲ್ಲಿ ಯಶ್ ಧ್ವನಿ ಕೇಳಿಸುತ್ತಾ? ಸಮಂತಾ ಆಸೆ ಈಡೇರುತ್ತಾ? ಅನ್ನುವ ಪ್ರಶ್ನೆಯಂತೂ ಎದ್ದಿದೆ.

ಸಮಂತಾ ಮೂವರು ನಟರ ಬಗ್ಗೆ ಮಾತು!

'ಕಾಫಿ ವಿಥ್ ಕರಣ್' ಇಡೀ ಶೋ ನಲ್ಲಿ ಸಮಂತಾ ಮೂವರು ನಟರ ಬಗ್ಗೆ ಹೆಚ್ಚಾಗಿ ಮಾತಾಡಿದ್ದರು. ಅವರಲ್ಲಿ ಪ್ರಮುಖರು ರಣ್‌ವೀರ್ ಸಿಂಗ್. ಸಮಂತಾ ಬಾಲಿವುಡ್‌ ನಟ ರಣ್‌ವೀರ್ ಸಿಂಗ್‌ ಬಗ್ಗೆನೇ ಪದೇ ಪದೆ ಮಾತಾಡಿದ್ದಾರೆ. ಇನ್ನೊಂದು ಕಡೆ ಯಶ್ ಹಾಗೂ ವಿಜಯ್ ದೇವರಕೊಂಡ ಬಗ್ಗೆ ಆಡಿದ ಮಾತುಗಳ ಬಗ್ಗೆನೂ ಚರ್ಚೆಯಾಗುತ್ತಿದೆ. ಈ ಮೂವರು ನಟರು ಸಮಂತಾ ಮೇಲೆ ಹೆಚ್ಚು ಪರಿಣಾಮ ಬೀರಿದಂತಿದೆ.

ಯಶ್-ಸಮಂತಾ ಒಟ್ಟಿಗೆ ನಟಿಸಬಹುದಾ?

ಯಶ್ ಧ್ವನಿಗೆ ಫಿದಾ ಆಗಿರುವ ಸಮಂತಾ ಮಾತುಗಳು ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದೆ. ಈ ಮಧ್ಯೆ ನೆಟ್ಟಿಗರು ಇಬ್ಬರೂ ಒಟ್ಟಿಗೆ ನಟಿಸಿದರೆ ಹೇಗಿರುತ್ತೆ? ಎಂದೂ ಚರ್ಚೆ ಮಾಡುತ್ತಿದ್ದಾರೆ. ಇಲ್ಲಾ ಅಂದರೆ, ಯಶ್ ಮುಂದಿನ ಸಿನಿಮಾಗೆ ಒಂದು ಹಾಡಿನಲ್ಲದರೂ ಬರಲಿ ಎನ್ನುತ್ತಿದ್ದಾರೆ. ಆದರೆ, ಇನ್ನೂ ಸಿನಿಮಾದ ಡೇಟ್ ಅನೌನ್ಸ್ ಆಗಿಲ್ಲ. ಅಂದ್ಮೇಲೆ ಸಮಂತಾ ಹಾಗೂ ಯಶ್ ಒಟ್ಟಿಗೆ ಪರದೆ ಮೇಲೆ ಕಾಣಿಸಿಕೊಳ್ಳುವುದು ಸದ್ಯ ದೂರದ ಮಾತು.