Ram Setu Movie Review: ರಾಮ್ ಸೇತು ಸಿನಿಮಾ ಹೇಗಿದೆ?

ಸೇತುಸಮುದ್ರಂ ಯೋಜನೆ ವಿವಾದವನ್ನು ನೆನಪಿಸುತ್ತದೆ

ಈ ಸಿನಿಮಾವು 2005 ರಲ್ಲಿ ವಿವಾದ ಎಬ್ಬಿಸಿದ್ದ ಸೇತುಸಮುದ್ರಂ ಯೋಜನೆಯನ್ನು ನೆನಪಿಸುತ್ತದೆ. ಆದರೆ ಈ ಸಿನಿಮಾ ಸಂಪೂರ್ಣವಾಗಿ ಅದರ ಮೇಲೆ ಆಧಾರಿತವಾಗಿಲ್ಲ. ಆ ವಿವಾದದ ಕೆಲವು ಅಂಶಗಳನ್ನಷ್ಟೆ ತೆಗೆದುಕೊಳ್ಳಲಾಗಿದೆ. ನಿರ್ದೇಶಕ-ಬರಹಗಾರ ಅಭಿಷೇಕ್ ಶರ್ಮಾ ಇತಿಹಾಸ, ಪುರಾಣ ಮತ್ತು ಫ್ಯಾಂಟಸಿಗಳ ಮಿಶ್ರಣ ಮಾಡಿ ನಿಜ ಜೀವನದ ಘಟನೆಯಿಂದಲೂ ಕೆಲವು ಎಳೆಗಳನ್ನು ತೆಗೆದುಕೊಂಡಿದ್ದಾರೆ. ದುರದೃಷ್ಟವಶಾತ್, ಅವರ ಚಿತ್ರಕತೆಯು ನಂಬಲರ್ಹವಾಗಿಲ್ಲ, ಬಹಳ ತ್ರಾಸದಾಯಕವಾಗಿ ಕಾಲ್ಪನಿಕ ಕತೆಯನ್ನು ಅಭಿಷೇಕ್ ಹೇಳಿದ್ದಾರೆ.

ಬರವಣಿಗೆಯಲ್ಲಿ ಮೊನಚಿನ ಕೊರತೆ

ಬರವಣಿಗೆಯಲ್ಲಿ ಮೊನಚಿನ ಕೊರತೆಯಿಂದಾಗಿ 'ರಾಮಸೇತು' ಸಿನಿಮಾ ಪ್ರೇಕ್ಷಕನ ಮೇಲೆ ಪ್ರಭಾವ ಬೀರಲು ವಿಫಲವಾಗುತ್ತದೆ. ಅಕ್ಷಯ್ ಕುಮಾರ್ ಮತ್ತು ಅವರ ತಂಡವು ಮೊಸಳೆಯಿಂದ ತುಂಬಿರುವ ಕೊಳ, ದಟ್ಟವಾದ ಕಾಡುಗಳು, ಅಪಾಯಕಾರಿ ಗುಹೆಗಳು ಮತ್ತು ಧೂಳಿನ ಪರ್ವತ ಪ್ರದೇಶಗಳಂತಹ ವಿಲಕ್ಷಣ ಸ್ಥಳಗಳಿಗೆ ಬಹಳ ಸುಲಭವಾಗಿ ಹೋಗಿಬಿಡುತ್ತಾರೆ! ಚಿತ್ರದ ಕ್ಲೈಮ್ಯಾಕ್ಸ್‌ ಅಂತೂ ನಿರ್ದೇಶಕ ಅಭಿಷೇಕ್ ಶರ್ಮಾ, ಸುಪ್ರೀಂ ಕೋರ್ಟ್‌ನಲ್ಲಿ ನಾಯಕ ಅಕ್ಷಯ್ ಕುಮಾರ್ 'ಸಂಸ್ಕೃತಿ' ಕುರಿತು ಧರ್ಮೋಪದೇಶಗಳನ್ನು ನೀಡುವುದರ ಮೇಲೆ ಹೆಚ್ಚು ಗಮನವಹಿಸಿದ್ದಾರೆ. ಇದರಿಂದಾಗಿ ಚಿತ್ರದ ಅಂತ್ಯದಲ್ಲಿ ಸಿನಿಮಾದಲ್ಲಿ ಉಪದೇಶ ಹೆಚ್ಚಾಯಿತು ಎನಿಸುತ್ತದೆ.

ಸಾಲ್ಟ್‌ ಆಂಡ್ ಪೆಪ್ಪರ್‌ ಲುಕ್‌ನಲ್ಲಿ ಅಕ್ಷಯ್ ಕುಮಾರ್

ಸಾಲ್ಟ್‌ ಆಂಡ್ ಪೆಪ್ಪರ್‌ ಲುಕ್‌ನಲ್ಲಿ ಅಕ್ಷಯ್ ಕುಮಾರ್ ಗಮನ ಸೆಳೆಯುತ್ತಾರೆ. ತಮ್ಮ ಸಾಹಸಗಳ ಮೂಲಕವೂ ಗಮನ ಸೆಳೆಯುತ್ತಾರೆ ಅಕ್ಷಯ್. ನಟ ಅಕ್ಷಯ್‌ರಿಗಿರುವ ಪುಟಿಯುವ ಉತ್ಸಾಹ ಚಿತ್ರಕತೆಗೂ ಇದ್ದಿದ್ದರೆ ಸಿನಿಮಾ ಚೆನ್ನಾಗಿರುತ್ತಿತ್ತೇನೋ. ಜಾಕ್ವೆಲಿನ್ ಫರ್ನಾಂಡೀಸ್, ಸಿನಿಮಾದಲ್ಲಿ ಆಟಕ್ಕುಂಟು, ಲೆಕ್ಕಕ್ಕಿಲ್ಲ. ನಟಿ ನುಸ್ರತ್ ಬರೂಚಾರ ಕತೆಯೂ ಅಷ್ಟೆ. ಆದರೆ ತೆಲುಗು ನಟ ಸತ್ಯದೇವ್ ಸಿನಿಮಾದಲ್ಲಿ ನಿಜವಾಗಿಯೂ ಗಮನ ಸೆಳೆಯುತ್ತಾರೆ. ಸಿನಿಮಾಕ್ಕೆ ಕಾಮಿಕ್ ರಿಲೀಫ್ ನೀಡುವ ಜೊತೆಗೆ ಪರ್ಫಾಮೆನ್ಸ್‌ನಿಂದಲೂ ಗಮನ ಸೆಳೆಯುತ್ತಾರೆ.

ಹಿನ್ನೆಲೆ ಸಂಗೀತ ಚೆನ್ನಾಗಿದೆ

ಸಿನಿಮಾದ ಸಿನಿಮಾಟೊಗ್ರಫಿ ಅಲ್ಲಲ್ಲಿ ಗಮನ ಸೆಳೆಯುತ್ತದೆ. ಸಿಜಿಐ ಸಹ ಗಮನ ಸೆಳೆಯುತ್ತದೆ. ಎಡಿಟಿಂಗ್ ಅಲ್ಲಲ್ಲಿ ಸಮಸ್ಯೆಯಾಗಿ ಕಾಣುತ್ತದೆ. ಸಿನಿಮಾದಲ್ಲಿ ಬರುವ 'ಜೈ ಶ್ರೀರಾಮ್' ಹಾಡು ಚೆನ್ನಾಗಿದೆ. ಹಿನ್ನೆಲೆ ಸಂಗೀತ ಸಹ ದೃಶ್ಯಕ್ಕೆ ತಕ್ಕುದಾಗಿದೆ. ಒಂದೊಳ್ಳೆ ವಿಷಯ ಕೈಯ್ಯಲ್ಲಿದ್ದರೂ ಸಹ ಅದನ್ನು ಸರಿಯಾಗಿ ಹ್ಯಾಂಡಲ್ ಮಾಡುವಲ್ಲಿ ಚಿತ್ರದ ನಿರ್ದೇಶಕರು ಎಡವಿದ್ದಾರೆ.