ಡೈರೆಕ್ಟರ್ಸ್ ಸ್ಪೆಷಲ್ : ಒರಿಜಿನಲ್ ಕಿಕ್ ಕೊಡುವ ಚಿತ್ರ

ಸಂಬಂಧಗಳ ಸುತ್ತ ಸುತ್ತುವ ಕಥೆ

'ಎದ್ದೇಳು ಮಂಜುನಾಥ' ಚಿತ್ರದಂತೆ ಇಲ್ಲೂ ಒಂದು ಚಿಕ್ಕಮನೆಯಲ್ಲಿ ಕಥೆ ಸಾಗುತ್ತದೆ. ಕಥೆ ಸಾಗಿದಂತೆ ಸಂಬಂಧಗಳು ಒಂದಕ್ಕೊಂದು ಹತ್ತಿರವಾಗುತ್ತಾ ಸಾಗುತ್ತವೆ. ಪಂಚೆ ಶಾಸ್ತ್ರಿಯಾಗಿ ರಂಗಾಯಣ ರಘು ಅವರು ಪಾತ್ರದ ಆಳಕ್ಕೆ ಇಳಿದಿದ್ದಾರೆ. ಚಿತ್ರದ ಹೀರೋ ಅವರೇ ಏನೋ ಎಂಬಷ್ಟು ಗಾಢವಾದ ಪ್ರಭಾವ ಬೀರುತ್ತದೆ.

ಯಾರ್‍ಯಾರ ಪಾತ್ರ ಹೇಗಿದೆ?

ಡಾ.ವತ್ಸಲಾ ಮೋಹನ್ ಅವರು ಅಷ್ಟೇ ಅಮ್ಮನಾಗಿ ಬಹಳ ನಾಜೂಕಿನ ಅಭಿನಯ ನೀಡಿದ್ದಾರೆ. ಬುದ್ಧಿಮಾಂದ್ಯ ಅಣ್ಣನಾಗಿ 'ರಮ್ಯಚೈತ್ರ ಕಾಲ'ದ ರಾಮ್, ತಂಗಿಯಾಗಿ ಸುಮಿತ್ರಾ ದೇವಿ, ಸ್ವಾಮೀಜಿಯಾಗಿ 'ಪಡುವಾರಳ್ಳಿ ಪಾಂಡವರು' ಕೃಷ್ಣಪ್ಪ ಪಾತ್ರಗಳ ಪೋಷಣೆ ಮನಮುಟ್ಟುವಂತಿದೆ.

ಮೊದಲ ಚಿತ್ರದಲ್ಲೇ ಧನಂಜಯ ಭರವಸೆ

ಧನಂಜಯ್ ಅವರು ತಮ್ಮ ಚೊಚ್ಚಲ ಅಭಿನಯದಲ್ಲೇ ಗಮನಸೆಳೆದಿದ್ದಾರೆ. ಅವರ ಹಾವ ಭಾವ, ಸಂಭಾಷಣೆ, ತೀಕ್ಷ್ಣ ನೋಟ, ಆಕರ್ಷಕ ಮೈಕಟ್ಟು ನಿಲುವಿನಿಂದ ಗಮನಸೆಳೆಯುತ್ತಾರೆ. ಕನ್ನಡ ಚಿತ್ರರಂಗಕ್ಕೆ ಮತ್ತೊಬ್ಬ ಸಿಕ್ಸ್ ಪ್ಯಾಕ್ ನಟ ಸಿಕ್ಕಂತಾಗಿದೆ. ಮೊದಲ ಚಿತ್ರದಲ್ಲೇ ಭರವಸೆ ಮೂಡಿಸಿದ್ದಾರೆ.

ತಾಂತ್ರಿಕವಾಗಿಯೂ ಚಿತ್ರ ಪ್ರೌಢವಾಗಿದೆ

ಚಿತ್ರದ ಮತ್ತೊಂದು ಗಮನಾರ್ಹ ಸಂಗತಿ ಎಂದರೆ ಛಾಯಾಗ್ರಹಣ. ಸಣ್ಣ ಮನೆಯೊಂದರ ಹಿನ್ನೆಲೆಯಲ್ಲಿ ಸಾಗುವ ಕಥೆಯನ್ನು ಅದ್ಭುತವಾಗಿ ಸೆರೆಹಿಡಿದ್ದಾರೆ ಮಹೇಂದ್ರ ಸಿಂಹ. ಬಿ.ಎಸ್.ಕೆಂಪರಾಜ್ ಅವರ ಸಂಕಲನವೂ ಎಲ್ಲೂ ಲೆಕ್ಕಾಚಾರ ತಪ್ಪಿಲ್ಲ. ತಂತ್ರಜ್ಞರನ್ನು ಸಮರ್ಥವಾಗಿ ದುಡಿಸಿಕೊಂಡಿದ್ದಾರೆ ಗುರುಪ್ರಸಾದ್.

ಪೂಜಾಗಾಂಧಿ ಲಯಬದ್ಧ ಐಟಂ ಹಾಡು

ಚಿತ್ರದಲ್ಲಿ ಒಂದೇ ಒಂದು ಫೈಟ್ ಇದೆ. ಹಾಗೆಯೇ ಒಂದೇ ಒಂದು ಸ್ಪೆಷಲ್ ಸಾಂಗ್ ಸಹ ಇದೆ. ಇದನ್ನು ಬೇಕಾದರೆ ಐಟಂ ಸಾಂಗ್ ಎಂತಲೂ ಕರೆಯಬಹುದು. ಕಣ್ಣಲ್ಲೆ ಯಾಕೆ ನೆಕ್ತೀಯಾ ಎಂಬ ಹಾಡಿಗೆ ಪೂಜಾಗಾಂಧಿ ಲಯಬದ್ಧವಾಗಿ ಮೈಕೈ ಕುಣಿಸಿದ್ದಾರೆ. ಎಲ್ಲೂ ಅವರ ಕುಣಿತ ಮೇರೆ ಮೀರದಂತೆ ನೃತ್ಯ ನಿರ್ದೇಶಕ ಇಮ್ರಾನ್ ಸರ್ದಾರಿಯಾ ನೋಡಿಕೊಂಡಿದ್ದಾರೆ.

ಅನೂಪ್ ಸೀಳಿನ ಇಂಪಾದ ಸಂಗೀತ

ಇನ್ನೊಂದು ಗಮನಸೆಳೆಯುವ ಪ್ರಮುಖ ಅಂಶ ಎಂದರೆ ಸಂಗೀತ. ಚಿತ್ರದಲ್ಲಿ ಒಂದು ಸಣ್ಣ ಪಾತ್ರವನ್ನೂ ಪೋಷಿಸಿರುವ ಅನೂಪ್ ಸೀಳಿನ್ ಸಂಗೀತ ಹಾಗೂ ನಡುನಡುವೆ ಜುಳುಜುಳು ಹರಿಯುವ ನದಿಯಂತೆ ಕೇಳಿಬರುವ ಹಾಡುಗಳು ಇಂಪಾಗಿದ್ದು ಆಸ್ವಾದಿಸುವಂತಿವೆ. ಆರಂಭದಲ್ಲೇ ಮೂಡಿಬಂದಿರುವ "ದೇವರೆ ಅಗಾಧ ನಿನ್ನ ಊಹೆಯ ಕಡಲು..." ಎಂಬ ಹಾಡಿನ ಸಾಹಿತ್ಯ ಹಾಗೂ ಅದರ ಸಂಗೀತ ಆಕರ್ಷಕವಾಗಿದೆ.

ಕೊನೆಯ ತನಕ ಬಿಗಿ ನಿರೂಪಣೆ

ಚಿತ್ರದ ಮೊದಲರ್ಧ ಒಂಚೂರು ವೇಗ ಕಳೆದುಕೊಂಡಂತೆ ಭಾಸವಾದರೂ ದ್ವಿತೀಯಾರ್ಧಕ್ಕೆ ಹೊರಳುತ್ತಿದ್ದಂತೆ ಕುತೂಹಲ ಉಳಿಸಿಕೊಂಡು ಸಾಗುತ್ತದೆ. ಕಡೆಯ ತನಕ ಏನಾಗುತ್ತದೆ ಎಂಬ ಕುತೂಹಲದಲ್ಲಿ ಪ್ರೇಕ್ಷಕರನ್ನು ಹಿಡಿದಿಡುತ್ತದೆ.

ಗ್ಯಾಲಕ್ಸಿ ಅವರು ಅದೆಂಥದೋ ಥರ್ಡ್ ಅಂತ ಬಿಟ್ಟಿದ್ದಾರೆ

ಚಿತ್ರದ ಕೆಲವು ಡೈಲಾಗ್ಸ್ ಹೀಗಿವೆ. ಗ್ಯಾಲಕ್ಸಿ ಅವರು ಥರ್ಡ್ ಅಂತ ಬಿಟ್ಟಿದ್ದಾರೆ ಅದರಲ್ಲೇ ಏನೇನೋ ಫೀಚರ್ಸ್ ಇದೆಯಂತೆ....ಮಧ್ಯಪ್ರದೇಶದ (ಹೊಟ್ಟೆ) ಉರಿ ಕಡಿಮೆ ಮಾಡುವುದು ಹೇಗೆ ಎಂದು ಉತ್ತರ ಪ್ರದೇಶ (ತಲೆ) ಸದಾ ತಲೆ ಕೆಡಿಸಿಕೊಳ್ಳುತ್ತಿರುತ್ತದೆ....

ಚಿತ್ರದ ಇನ್ನೊಂದಿಷ್ಟು ಡೈಲಾಗ್ಸ್

ಇನ್ನೊಂದಷ್ಟು ಡೈಲಾಗ್ಸ್...ಈ ಪ್ರಪಂಚದಲ್ಲಿ ಏನೇ ಎಳೆದರೂ ಉದ್ದ ಆಗುತ್ತದೆ ಆದರೆ ಎಳೆದರೆ ಗಿಡ್ಡ ಆಗೋದು ಮಾತ್ರ ಸಿಗರೇಟ್ ಒಂದೇ. ಅಪ್ಪ ಆಗೋದು ಮೂರು ನಿಮಿಷದ ಕೆಲಸ, ತಾಯಿ ಆಗೋದು ಒಂಬತ್ತು ತಿಂಗಳ ಕೆಲಸ ಈ ತಾಪತ್ರಯವೇ ಇಲ್ಲದೆ ಅಪ್ಪನನ್ನಾಗಿಸಿ ಬಿಟ್ಟೆ...ನೀವು ಕಪ್ಪಾಗಿದ್ದೀರಲ್ಲಾ ಯಾಕೆ? ಶ್ರಮಜೀವಿಗಳು ದಿಗಂತ್ ತರಹ ಇರಕ್ಕಾಗುತ್ತದೆಯೇ?