Nayattu movie review: ಇಲ್ಲಿ ಎಲ್ಲರೂ ಬೇಟೆಗಾರರೆ

ಕತೆಯಲ್ಲಿ 'ಮಿರ್ಯಾಕಲ್‌' ನಡೆಯುವುದಿಲ್ಲ

ತಪ್ಪು ಮಾಡದವರ ಮೇಲೆ ಆರೋಪ ಹೊರಿಸಿ ವ್ಯವಸ್ಥೆಯೊಂದು ಅವರನ್ನು ಬಲಿ ಹಾಕಲು ಯತ್ನಿಸುವ ಕತೆಗಳುಳ್ಳ ಸಿನಿಮಾಗಳು ಹಲವು ಬಂದಿವೆ. ಆದೆ ಮಾದರಿಯ ಸಿನಿಮಾ ಆದರೂ 'ನಾಯಟ್ಟು' ಭಿನ್ನವಾಗಿ ನಿಲ್ಲುತ್ತದೆ. ಕಾರಣ, ಈ ಸಿನಿಮಾದಲ್ಲಿ 'ಮಿರ್ಯಾಕಲ್'ಗಳು ನಡೆಯುವುದಿಲ್ಲ. ಇತರೆ ಸಿನಿಮಾಗಳಲ್ಲಿಯಾದರೆ ಆರೋಪಿಗಳು ಮಾಧ್ಯಮದ ಮೂಲಕವೊ, ಸಾಮಾಜಿಕ ಜಾಲತಾಣ ಬಳಸಿಕೊಂಡೊ ತಾವು ತಪ್ಪಿತಸ್ಥರಲ್ಲ ನಮಗೆ ಅನ್ಯಾಯವಾಗಿದೆ ಎಂದು ಎಲ್ಲರಿಗೂ ತಿಳಿಸಿ ತಮ್ಮ ಮೇಲಿನ ಆರೋಪದಿಂದ ಮುಕ್ತರಾಗುತ್ತಾರೆ, ಅಲ್ಲಿಗೆ ಅವರಿಗೆ 'ಸಿನಿಮಿಕ್ ಜಸ್ಟಿಸ್' ದೊರೆತು ಸಿನಿಮಾ ಮುಗಿಯುತ್ತದೆ. ಆದರೆ ಇಲ್ಲಿ ಮೂವರು ಪೊಲೀಸರಿಗೆ ತಾವು ನಿರಪರಾಧಿಗಳು ಎಂದು ಜಗತ್ತಿಗೆ ಹೇಳುವ ಅವಕಾಶಗಳು ದೊರೆಯುವುದಿಲ್ಲ. ಇದಕ್ಕೆ ಕಾರಣ ಸಿನಿಮಾದ ಕತೆ ವಾಸ್ತವತೆಗೆ ಹೆಚ್ಚು ಹತ್ತಿರವಾಗಿರುವುದು.

ವಾಸ್ತವಕ್ಕೆ ಹೆಚ್ಚು ಹತ್ತಿರದ ಕತೆ ಹೆಣೆಯಲಾಗಿದೆ

ಕತೆಯನ್ನು ವಾಸ್ತವತೆಗೆ ಹೆಚ್ಚು ಹತ್ತಿರವಿರುವಂತೆ ಹೆಣೆಯಲಾಗಿದೆ. ಸಿನಿಮಾದಲ್ಲಿ ಒಂದು ಘಟನೆಗೆ ಮತ್ತೊಂದು ಘಟನೆ, ಒಂದು ದೃಶ್ಯಕ್ಕೆ ಮತ್ತೊಂದು ದೃಶ್ಯ ಪೂರಕವಾಗಿ ಸರಣಿ ಮಾದರಿಯಲ್ಲಿ ನಡೆದುಕೊಂಡು ಹೋಗುತ್ತದೆ. ಇದೇ ಕಾರಣಕ್ಕೆ ಪ್ರೇಕ್ಷಕ ಸಿನಿಮಾದ ಕತೆಯ ಜೊತೆ ಎಲ್ಲಿಯೂ ನಂಟು ಕಳೆದುಕೊಳ್ಳುವುದಿಲ್ಲ.

ಪೊಲೀಸ್ ಇಲಾಖೆಯ ಎರಡು ಮುಖ ದರ್ಶನ

ಸಿನಿಮಾದಲ್ಲಿ ಪೊಲೀಸ್ ಇಲಾಖೆಯ ಸಣ್ಣ-ಸಣ್ಣ ಡೀಟೇಲ್‌ಗೂ ಮಹತ್ವ ನೀಡಲಾಗಿದೆ. ಜೊತೆಗೆ ರಾಜಕಾರಣಿಗಳು ತಮ್ಮ ಅವಶ್ಯಕತೆಗೆ ತಕ್ಕಂತೆ ಪೊಲೀಸ್ ಸೇರಿದಂತೆ ಇತರೆ ಸರ್ಕಾರಿ ಸಂಸ್ಥೆಗಳನ್ನು ಹೇಗೆ ಬಳಸಿಕೊಳ್ಳುತ್ತಾರೆ ಎಂಬುದನ್ನು ತೋರಿಸಲಾಗಿದೆ. ಜೊತೆಗೆ ಪೊಲೀಸ್ ಇಲಾಖೆಯ ಎರಡು ಮುಖಗಳ ಪರಿಚಯವನ್ನೂ ಮಾಡಿಸಲಾಗಿದೆ. ಅಮೂರ್ತ ಎನ್ನಬಹುದಾದ ಕೆಲವು ದೃಶ್ಯಗಳೂ ಸಿನಿಮಾದಲ್ಲಿ ಇವೆ, ಸಿನಿಮಾದ ಅಂತ್ಯದಲ್ಲಿ ಕುರುಡ ಮತದಾರನ ಮತವನ್ನು ಬಲವಂತದಿಂದ ಒತ್ತಿಸುವುದು ಇಂಥ ದೃಶ್ಯಗಳಿಗೆ ಒಂದು ಉದಾಹರಣೆ.

ಮೂವರ ನಟನೆ ಅದ್ಭುತ

ಅಮಾಯಕ ಪೊಲೀಸರ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಜೋಜು ಜಾರ್ಜ್, ಕುಂಚಾಕೊ ಬೋಬನ್, ನಿಮಿಷ ಸಜಯನ್ ಮೂವರುಗಳು ಈಗಾಗಲೇ ಹಲವು ಸಿನಿಮಾಗಳಲ್ಲಿ ತಮ್ಮ ಅಭಿನಯ ಸಾಮರ್ಥ್ಯವನ್ನು ಸಾಬೀತು ಮಾಡಿದ್ದಾರೆ. ಈ ಸಿನಿಮಾದಲ್ಲಿಯೂ ಸಹ ತಮ್ಮ ಅದ್ಭುತ ನಟನೆಯನ್ನು ಮುಂದುವರೆಸಿದ್ದಾರೆ. ಇತರೆ ಪಾತ್ರಗಳಲ್ಲಿ ನಟಿಸಿರುವ ಯಮಾ ಗಿಲ್ಗಮೇಶ್, ಅನಿಲ್ ನೆಡುಮಾಂಗಡ (ಇವರು ಚಿತ್ರೀಕರಣದ ವೇಳೆಯಲ್ಲಿ ನೀರಿನಲ್ಲಿ ಮುಳುಗಿ ಅಸುನೀಗಿದರು), ಅಜಿತ್ ಕೋಶಿ ಇನ್ನೂ ಕೆಲವರ ನಟನೆ ನೆನಪುಳಿಯುತ್ತದೆ.

'ನಾಯಟ್ಟು' ನೋಡಬೇಕಾದ ಸಿನಿಮಾ

ಸಿನಿಮಾದ ತಾಂತ್ರಿಕ ವಿಷಯ ಚರ್ಚಿಸುವುದಾದರೆ ಸಿನಿಮಾವನ್ನು ಕಾಡುವ ಥ್ರಿಲ್ಲರ್ ಆಗಿ ಮಾಡುವಲ್ಲಿ ಹಿನ್ನೆಲೆ ಸಂಗೀತದ ಕೊಡುಗೆ ದೊಡ್ಡದಿದೆ. ಹಿನ್ನೆಲೆ ಸಂಗೀತವು ಥ್ರಿಲ್ಲರ್ ದೃಶ್ಯಗಳ ತೀವ್ರತೆಯನ್ನು ಹೆಚ್ಚಿಸುವಂತಿದೆ. ಮುನ್ನಾರ್‌ನ ಸುಂದರ ದೃಶ್ಯಗಳನ್ನು ಸೆರೆಹಿಡಿದಿರುವ ಕ್ಯಾಮೆರಾಮನ್ ಶಿಜುಖಾಲಿದ್ ರಾತ್ರಿ ದೃಶ್ಯಗಳನ್ನೂ ಸಹ ಅಷ್ಟೇ ಸುಂದರವಾಗಿ ಸೆರೆಹಿಡಿದಿದ್ದಾರೆ. ಕಡಿಮೆ ಸಂಪನ್ಮೂಲ ಬಳಸಿಕೊಂಡು ಸುಂದರ ಸಿನಿಮಾ ಮಾಡುವ ಕಲೆ ಕೇರಳಿಗರಿಗೆ ಸಿದ್ದಿಸಿಬಿಟ್ಟಂತಿದೆ. ಒಟ್ಟಾರೆ 'ನಾಯಟ್ಟು' ನೋಡಬೇಕಾದ ಸಿನಿಮಾ.