'One Cut Two Cut' Movie Review: ಏನೋ ಮಾಡಲು ಹೋಗಿ...!

ಪ್ರೇಕ್ಷಕರಿಗೆ ಹಲವು ಪ್ರಶ್ನೆಗಳು ಏಳುತ್ತವೆ

ಸಿನಿಮಾದ ಕತೆಯಲ್ಲಿಯೂ ಸಹ ಬಹಳ ಗೊಂದಲಗಳಿವೆ. ಆತುರದಲ್ಲಿ ಕತೆಯನ್ನು ಬರೆದು, ಕತೆ ಹೇಗೆ ಬರುತ್ತದೆಯೋ ಅದನ್ನು ಹಾಗೆಯೇ ಚಿತ್ರೀಕರಣ ಮಾಡಿಕೊಂಡು ಹೋದಂತಿದೆ. ಕೆಲವೆಡೆಯಂತೂ ಸರಳ ಲಾಜಿಕ್‌ಗಳೇ ಮಿಸ್ ಆಗಿಬಿಟ್ಟಿವೆ. ಸಿನಿಮಾ ನೋಡಬೇಕಾದರೆ ಪ್ರೇಕ್ಷಕರ 'ಇದ್ಯಾಕೆ ಹೀಗೆ?' ಎಂದು ಕೇಳಲು ಹಲವು ಅವಕಾಶಗಳನ್ನು ನಿರ್ದೇಶಕ ವಂಸಿಧರ ಭೋಗರಾಜು.

ದಾನಿಶ್, ಪ್ರಕಾಶ್ ಬೆಳವಾಡಿ ನಟನೆ ಉತ್ತಮ

ಸಿನಿಮಾದ ಕತೆ, ಚಿತ್ರಕತೆ ಅದ್ಭುತವಾಗಿಲ್ಲದಿದ್ದರೂ ಸಿನಿಮಾವನ್ನು 'ನೋಡೆನಲ್' ಮಾಡಿರುವುದು ದಾನಿಶ್ ಸೇಠ್‌, ಪ್ರಕಾಶ್ ಬೆಳವಾಡಿ, ವಿನೀತ್ ಇನ್ನು ಕೆಲವರ ನಟನೆ. ಪ್ರಕಾಶ್ ಬೆಳವಾಡಿ ಅದ್ಭುತವಾಗಿ ನಟಿಸಿದ್ದಾರೆ. ದಾನಿಶ್ ಸೇಠ್ ನಟನೆಯೂ ಸಾಕಷ್ಟು ಸುಧಾರಿಸಿದೆ ಪಕ್ವತೆಯೆಡೆಗೆ ಸಾಗುತ್ತಿದ್ದಾರೆ. ಜೋರ್ಡ್‌ ಇಂಡಿಯನ್ ಯೂಟ್ಯೂಬ್ ಚಾನೆಲ್‌ ಖ್ಯಾತಿಯ ವಿನೀತ್ ಬೀಪ್ ಕುಮಾರ್ ನಟನೆಯೂ ಚೆನ್ನಾಗಿದೆ. ಅವರ ಕೆಲವು ಹಾವ ಭಾವಗಳು, ಸಂಭಾಷಣೆಯ ರೀತಿ ನಗೆ ಉಕ್ಕಿಸುತ್ತವೆ. ಸಂಯುಕ್ತಾ ಹೊರನಾಡು ಅವರಿಗೆ ಹೆಚ್ಚಿನ ಅವಕಾಶವಿಲ್ಲವಾದರೂ ತಮ್ಮ ಪಾತ್ರಕ್ಕೆ ನ್ಯಾಯ ಒದಗಿಸಿದ್ದಾರೆ.

ಸಿನಿಮಾಟೊಗ್ರಫರ್ ಕಾರ್ಯ ಅಭಿನಂದನಾರ್ಹ

ಸಿನಿಮಾ ಅತ್ಯಂತ ಕಡಮೆ ಬಜೆಟ್‌ನಲ್ಲಿ ಚಿತ್ರೀಕರಣ ಮಾಡಲಾಗಿದೆ. ಶಾಲಾ ಮಕ್ಕಳನ್ನು ಒತ್ತೆಯಾಳಾಗಿ ಇರಿಸಿಕೊಂಡ ರೂಮ್‌ ಹಾಗೂ ಸಿಎಂ ಕಾರ್ಯದರ್ಶಿ ಪಾತ್ರದಲ್ಲಿ ನಟಿಸಿರುವ ಸಂಪತ್‌ ಕುಳಿತಿರುವ ರೂಮ್ ಇವೆರಡರಲ್ಲೇ ಸಿನಿಮಾದ ಬಹುತೇಕ ಚಿತ್ರೀಕರಣ ಮಾಡಲಾಗಿದೆ. ಕಡಿಮೆ ಬಜೆಟ್ ಆದರೂ ಸಿನಿಮಾದಲ್ಲಿ ರಿಚ್ ಫೀಲಿಂಗ್ ಇರುವಂತೆ ನೋಡಿಕೊಳ್ಳಲಾಗಿದೆ. ಸಿನಿಮಾದ ಸಿನಿಮಾಟೊಗ್ರಾಫರ್‌ ಇದಕ್ಕೆ ಅಭಿನಂದನಾರ್ಹರು. ಸಿನಿಮಾದ ಹಿನ್ನೆಲೆ ಸಂಗೀತ ಕೆಲವೊಮ್ಮೆ ಉತ್ತರ ಎನಿಸಿದರೆ ಕೆಲವೊಮ್ಮೆ ಗೊಂದಲಮಯ ಎನಿಸುತ್ತದೆ. ಸಿನಿಮಾವನ್ನು ಕೇವಲ 80 ನಿಮಿಷವಷ್ಟೆ ಇದೆ. ನಿರ್ದೇಶಕರ ಈ ನಿರ್ಣಯ ಸಿನಿಮಾವನ್ನು ಒಂದಷ್ಟು ಸಹ್ಯ ಮಾಡುತ್ತದೆ.

ಸಿನಿಮಾದಲ್ಲಿ ಸಂದೇಶವೂ ಇದೆ, ಆದರೆ..

ಸಿನಿಮಾದಲ್ಲಿ ಸಾಕಷ್ಟು ಪ್ರಚಲಿತ ವಿಷಯಗಳ ಉಲ್ಲೇಖಗಳು ಆಗುತ್ತವೆ. ಕಮಿಡಿಯನ್ ಕುನಾಲ್ ಕಾಮ್ರ, ದನದ ಮಾಂಸ, ಸಂಸ್ಕೃತ ಇನ್ನೂ ಹಲವು ವಿಷಯಗಳ ಉಲ್ಲೇಖ ಆಗುತ್ತವೆ ಆದರೆ ಇವು ಕೇವಲ 'ಹಾಸ್ಯ'ವಾಗಿ ಮಾತ್ರವೇ ಇವೆ. ಸರ್ಕಾರಿ ಶಾಲೆಗಳಲ್ಲಿ ಸರಿಯಾದ ಊಟ ಸಿಗೊಲ್ಲ, ಸರಿಯಾದ ಸ್ವಚ್ಛತೆ ಇಲ್ಲ, ಶಿಕ್ಷಕರಿಗೆ ಸೂಕ್ತ ಸಂಬಳ ಇಲ್ಲ ಇತರೆ ವಿಷಯಗಳ ಬಗ್ಗೆಯೂ ಸಿನಿಮಾ ಮಾತನಾಡುತ್ತದೆ ಆದರೆ ಇದಕ್ಕೆ ಸರಿಯಾದ ಒತ್ತು ಕೊಡುವಲ್ಲಿ ನಿರ್ದೇಶಕರು ಧಾರುಣವಾಗಿ ಸೋತಿದ್ದಾರೆ. ಸಿನಿಮಾದಲ್ಲಿನ ಸಂದೇಶ ಕೇವಲ ಬಾಯಿ ಮಾತಿಗಷ್ಟೆ ಸೀಮಿತವಾಗಿದೆ. ಸಂದೇಶವನ್ನು ಅಂತ್ಯದಲ್ಲಿ ಬಲವಂತವಾಗಿ ತುರುಕಿದಂತೆಯೂ ಭಾಸವಾಗುತ್ತದೆ.

ಅದು ಸುಲಭ, ಇದು ಕಷ್ಟ

ಕಿರು ವಿಡಿಯೋಗಳ ಮೂಲಕ ಜನರನ್ನು ಎರಡು-ಮೂರು ನಗಿಸುವುದು ಸುಲಭ ಆದರೆ ಒಂದು ಸಿನಿಮಾ ಮಾಡಿ ಪ್ರೇಕ್ಷಕರನ್ನು ಗಂಟೆ ಗಂಟ್ಟಲೆ ರಂಜಿಸುವುದು ಸುಲಭದ ಕಾರ್ಯವಲ್ಲ. ಅದಕ್ಕೆ ಕೇವಲ ನಟ ಇದ್ದರೆ ಮಾತ್ರ ಸಾಲದು ಎಲ್ಲ ವಿಭಾಗಗಳು ಜೊತೆ-ಜೊತೆಯಾಗಿ ಕೆಲಸ ಮಾಡಬೇಕು ಎಂಬುದಕ್ಕೆ 'ಒನ್‌ ಕಟ್ ಟು ಕಟ್' ಒಂದೊಳ್ಳೆ ಉದಾಹರಣೆ. ಸಾಮಾಜಿಕ ಜಾಲತಾಣದಲ್ಲಿ ಕಿರು ವಿಡಿಯೋಗಳಿಂದ ಮೋಡಿ ಮಾಡಿರುವ ದಾನಿಶ್‌, ಸಿನಿಮಾಗಳಲ್ಲಿ ಅದೇ ಮೋಡಿಯನ್ನು ರಿಪೀಟ್ ಮಾಡಲು ಹೆಣಗುತ್ತಿದ್ದಾರೆ. ಒಟ್ಟಾರೆಯಾಗಿ, ಸಿನಿಮಾದ ಅವಧಿ ಚಿಕ್ಕದಾಗಿರುವ ಕಾರಣ ಸಮಯ ಇರುವವರು ಹಾಗೂ ಅಮೆಜಾನ್‌ನಲ್ಲಿ ಖಾತೆ ಇರುವವರು ಒಮ್ಮೆ ನೋಡಬಹುದು.