Mission Majnu Twitter Review; ಒಳ್ಳೆ ಚಿತ್ರವನ್ನು ನೇರ ಓಟಿಟಿ ಬಿಡುಗಡೆ ಮಾಡಿ ಕೆಟ್ಟರಲ್ಲ!

ಚಿತ್ರಮಂದಿರಲ್ಲಿ ಬಿಡುಗಡೆಯಾಗಬೇಕಿತ್ತು

ಮೊದಲ ದಿನ ಮಿಷನ್ ಮಜ್ನು ಚಿತ್ರದ ಬಗ್ಗೆ ಬರೆದುಕೊಂಡಿರುವ ಹಲವಾರು ಸಿನಿ ರಸಿಕರು ಉಲ್ಲೇಖಿಸಿರುವ ಸಾಮಾನ್ಯ ಸಾಲೆಂದರೆ 'ಈ ಚಿತ್ರ ಚಿತ್ರಮಂದಿರಗಳಲ್ಲಿ ತೆರೆ ಕಾಣಬೇಕಿತ್ತು' ಎಂಬುದು. ಹೌದು, ಮಿಷನ್ ಮಜ್ನು ಚಿತ್ರಕತೆ ಚೆನ್ನಾಗಿದ್ದು, ನಟ ಸಿದ್ದಾರ್ಥ್ ಮಲ್ಹೋತ್ರ ಹಾಗೂ ನಟಿ ರಶ್ಮಿಕಾ ಮಂದಣ್ಣ ನಟನೆ ಚೆನ್ನಾಗಿದೆ, ಶಂತಾನು ಬಾಗ್ಚಿ ಅವರ ನಿರ್ದೇಶನ ಪ್ರೇಕ್ಷಕನನ್ನು ಕೊನೆಯವರೆಗೆ ಬೇರೆಡೆ ಗಮನ ಕೊಡದ ಹಾಗೆ ಹಿಡಿದು ಕೂರಿಸಲಿದೆ ಎಂದು ಬರೆದುಕೊಂಡಿದ್ದಾರೆ. ಹೀಗೆ ಬರೆದುಕೊಂಡಿರುವ ಬಹುತೇಕರು ಚಿತ್ರಕ್ಕೆ ಮೂರು, ಮೂರೂವರೆ ಹಾಗೂ ನಾಲ್ಕು ಸ್ಟಾರ್‌ಗಳ ರೇಟಿಂಗ್ ನೀಡಿದ್ದಾರೆ.

ನೂರು ಕೋಟಿಯ ಸಿನಿಮಾ

ಇನ್ನು ಚಿತ್ರದ ಬಗ್ಗೆ ಬರೆದುಕೊಂಡಿರುವ ರೋಹಿತ್ ಜೈಸ್ವಾಲ್ ಎಂಬ ಸಿನಿ ರಸಿಕ ಮಿಷನ್ ಮಜ್ನು ಒಂದು ಮಾಸ್ಟರ್ ಪೀಸ್ ಎಂದಿದ್ದಾರೆ. ಸ್ಪೈ ಥ್ರಿಲ್ಲರ್ ಚಿತ್ರವಾಗಿರುವ ಮಿಷನ್ ಮಜ್ನು ಕೊನೆಯವರೆಗೂ ಪ್ರೇಕ್ಷಕನನ್ನು ಹಿಡಿದಿಟ್ಟುಕೊಳ್ಳಲಿದ್ದು, ದೇಶಪ್ರೇಮವನ್ನು ಸಾರಿರುವ ಸಿದ್ಧಾರ್ಥ್ ಮಲ್ಹೋತ್ರ ಹಾಗೂ ಮಿಷನ್ ಮಜ್ನು ಚಿತ್ರತಂಡಕ್ಕೆ ಚಿತ್ರಮಂದಿರದಲ್ಲಿ ಎಲ್ಲರೂ ಎದ್ದು ನಿಂತು ಗೌರವ ಸಲ್ಲಿಸುತ್ತಿದ್ದರು ಹಾಗೂ ಚಿತ್ರ ಬಾಕ್ಸ್ ಆಫೀಸ್‌ನಲ್ಲಿ ನೂರು ಕೋಟಿ ಗಳಿಸುತ್ತಿತ್ತು ಎಂದು ಬರೆದುಕೊಂಡಿದ್ದಾರೆ.

ನೆಗೆಟಿವ್ ವಿಮರ್ಶೆ ಕಣ್ಣಿಗೆ ಬೀಳಲಿಲ್ಲ!

ಇತ್ತೀಚೆಗಿನ ದಿನಗಳಲ್ಲಿ ಬಿಡುಗಡೆಯ ದಿನ ನೆಗೆಟಿವ್ ವಿಮರ್ಶೆಗಳನ್ನು ಹೆಚ್ಚಾಗಿ ಪಡೆದುಕೊಳ್ಳದ ಬಾಲಿವುಡ್ ಚಿತ್ರ ಈ ಮಿಷನ್ ಮಜ್ನು ಎನ್ನಬಹುದು. ಚಿತ್ರದ ಕುರಿತು ಎಲ್ಲರೂ ಎಮೋಷನಲ್ ಮೂವಿ, ಚೆನ್ನಾಗಿದೆ, ಒಳ್ಳೆಯ ಚಿತ್ರ ಎಂದು ಬರೆದುಕೊಂಡಿದ್ದಾರೆಯೇ ಹೊರತು ನೆಗೆಟಿವ್ ರಿವ್ಯೂಗಳು ಕಣ್ಣಿಗೆ ಬೀಳಲಿಲ್ಲ. ಇನ್ನು ಗೂಗಲ್ ಹಾಗೂ ಐಎಂಡಿಬಿ ರೇಟಿಂಗ್ ಸಹ ಚಿತ್ರಕ್ಕೆ ಚೆನ್ನಾಗಿದ್ದು, ಮುಂದಿನ ದಿನಗಳಲ್ಲಿ ಚಿತ್ರ ಯಾವ ರೀತಿಯ ಪ್ರತಿಕ್ರಿಯೆ ಪಡೆದುಕೊಳ್ಳಲಿದೆ ಕಾದುನೋಡಬೇಕಿದೆ.