'ಪದ್ಮಾವತ್' ಮೊದಲ ವಿಮರ್ಶೆ: ಮೂಕವಿಸ್ಮಿತಗೊಳಿಸುವ ಬನ್ಸಾಲಿ ದೃಶ್ಯಕಾವ್ಯ

ಕಥಾಹಂದರ

ಚಿತ್ತೋರ್ ರಾಜ ಮಹಾರಾವಲ್ ರತನ್ ಸಿಂಗ್ (ಶಾಹೀದ್ ಕಪೂರ್), ರಾಣಿ ಪದ್ಮಾವತಿ (ದೀಪಿಕಾ ಪಡುಕೋಣೆ) ಹಾಗೂ ದೆಹಲಿ ಸುಲ್ತಾನ ಅಲ್ಲಾವುದ್ದೀನ್ ಖುಲ್ಜಿ ಸುತ್ತ ಹೆಣೆದಿರುವ ಕಥೆ 'ಪದ್ಮಾವತ್'. 1540 ರಲ್ಲಿ ಮಲಿಕ್ ಮೊಹಮ್ಮದ್ ಜಯಾಸಿ ರಚಿಸಿರುವ ಮಹಾಕಾವ್ಯ 'ಪದ್ಮಾವತ್' ಆಧರಿಸಿರುವ ಚಿತ್ರವೇ 'ಪದ್ಮಾವತ್'.

ದೀಪಿಕಾ-ಶಾಹೀದ್ ಅಭಿನಯ ಹೇಗಿದೆ.?

ಒಂದೇ ಮಾತಲ್ಲಿ ಹೇಳಬೇಕು ಅಂದ್ರೆ, ರಾಣಿ ಪದ್ಮಾವತಿ ಆಗಿ ದೀಪಿಕಾ ಪಡುಕೋಣೆ ಅಭಿನಯ ಎಲ್ಲರನ್ನೂ ಮೂಕವಿಸ್ಮಿತರನ್ನಾಗಿಸುತ್ತದೆ. ರಾಜಪೂತ ರಾಜ ಮಹಾರಾವಲ್ ರತನ್ ಸಿಂಗ್ ಆಗಿ ಶಾಹೀದ್ ಕಪೂರ್ ನಟನೆ ಅಮೋಘ. ಅದಕ್ಕೆ ಸಾಕ್ಷಿ ಚಿತ್ರದಲ್ಲಿ ಇರುವ ಚದುರಂಗದ ದೃಶ್ಯ.

ರಣ್ವೀರ್ ಸಿಂಗ್ ಪರ್ಫಾಮೆನ್ಸ್ ಚೆನ್ನಾಗಿದ್ಯಾ.?

ಅಲ್ಲಾವುದ್ದೀನ್ ಖಿಲ್ಜಿ ಆಗಿ ರಣ್ವೀರ್ ಸಿಂಗ್ ಪರ್ಫಾಮೆನ್ಸ್ ಅಕ್ಷರಶಃ ಅದ್ಭುತ. 'ಪದ್ಮಾವತ್' ಸಿನಿಮಾ ನೋಡಿದ್ಮೇಲೆ, ಐತಿಹಾಸಿಕ ಪಾತ್ರ ಅಲ್ಲಾವುದ್ದೀನ್ ಖಿಲ್ಜಿ ಹೆಸರು ಕೇಳಿದ ಕೂಡಲೇ ನಿಮಗೆ ಭಯವುಂಟಾದ್ರೆ ಅಥವಾ ದ್ವೇಷಿಸಲು ಶುರು ಮಾಡಿದರೆ ಅದಕ್ಕೆ ನೇರ ಹೊಣೆ ರಣ್ವೀರ್ ಸಿಂಗ್. ಅಷ್ಟರಮಟ್ಟಿಗೆ ಪರಕಾಯ ಪ್ರವೇಶಿಸಿ ರಣ್ವೀರ್ ಸಿಂಗ್ ಅಭಿನಯಿಸಿದ್ದಾರೆ.

ಉಳಿದವರ ಆಕ್ಟಿಂಗ್.?

ಉಳಿದಂತೆ ಮಲಿಕ್ ಕಾಫುರ್ ಪಾತ್ರಧಾರಿ ಜಿಮ್ ಸರ್ಬ್ ಹಾಗೂ ಅದಿತಿ ರಾವ್ ಹೈದರಿ ಕೊಟ್ಟ ಪಾತ್ರಗಳನ್ನ ಅಚ್ಚುಕಟ್ಟಾಗಿ ನಿಭಾಯಿಸಿದ್ದಾರೆ.

ಬ್ರ್ಯಾಕ್ ಗ್ರೌಂಡ್ ಮ್ಯೂಸಿಕ್ ಚೆಂದ

ಸಂಚಿತ್ ಬಲ್ಹಾರಾ ಅವರ ಪವರ್ ಫುಲ್ ಬ್ಯಾಕ್ ಗ್ರೌಂಡ್ ಸ್ಕೋರ್ ಇಲ್ಲದೇ ಹೋಗಿದ್ದರೆ 'ಪದ್ಮಾವತ್' ಸಿನಿಮಾ ಮಹಾ ದೃಶ್ಯ ಕಾವ್ಯ ಆಗಲು ಸಾಧ್ಯವೇ ಆಗುತ್ತಿರಲಿಲ್ಲ. ಹಾಗೇ, ಸಂಜಯ್ ಲೀಲಾ ಬನ್ಸಾಲಿ ಸಂಯೋಜಿಸಿರುವ ಹಾಡುಗಳು ಕೂಡ ನಿಮ್ಮ ತಲೆ ತೂಗುವಂತೆ ಮಾಡುತ್ತದೆ.

ಕ್ಲೈಮ್ಯಾಕ್ಸ್ ಸನ್ನಿವೇಶ ಸೂಪರ್

ತಾವು ಎಂಥಾ ಜಾದುಗಾರ ಅಂತ ಸಂಜಯ್ ಲೀಲಾ ಬನ್ಸಾಲಿ 'ಪದ್ಮಾವತ್' ಸಿನಿಮಾ ಮೂಲಕ ಮತ್ತೆ ಸಾಬೀತು ಪಡಿಸಿದ್ದಾರೆ. ಇಡೀ ಕ್ಲೈಮ್ಯಾಕ್ಸ್ ಸನ್ನಿವೇಶದಲ್ಲಿ ಪ್ರೇಕ್ಷಕರನ್ನ ಹಿಡಿದು ಕೂರಿಸುವಲ್ಲಿ ಸಂಜಯ್ ಲೀಲಾ ಬನ್ಸಾಲಿ ಯಶಸ್ವಿ ಆಗಿದ್ದಾರೆ.

ಮೈನಸ್ ಪಾಯಿಂಟ್ಸ್ ಏನು.?

ಮೊದಲಾರ್ಧಲ್ಲಿ ಸಂಕಲನ ಇನ್ನೂ ಚುರುಕಾಗಿರಬೇಕಿತ್ತು. ಕೆಲ ದೃಶ್ಯಗಳಲ್ಲಿ ಕನ್ಟಿನ್ಯೂಟಿ ಮಿಸ್ ಆಗಿದೆ. 'ಪದ್ಮಾವತ್' ಚಿತ್ರದ ಕೆಲ ದೃಶ್ಯಗಳನ್ನ ನೋಡಿದ್ರೆ, ಬನ್ಸಾಲಿ ಅವರ ಹಿಂದಿನ ಸಿನಿಮಾಗಳ ಕೆಲ ದೃಶ್ಯಗಳು ನೆನಪಿಗೆ ಬರುತ್ತದೆ ಅನ್ನೋದು ಬಿಟ್ಟರೆ ಸಿನಿಮಾದಲ್ಲಿ ಅಂತಹ ಮೈನಸ್ ಅಂಶಗಳು ಇಲ್ಲ.

ಖಂಡಿತ ಮೋಸ ಇಲ್ಲ

ತಾಂತ್ರಿಕವಾಗಿ ಅದ್ಭುತವಾಗಿರುವ 'ಪದ್ಮಾವತ್' ಚಿತ್ರ ಖಂಡಿತ ನೋಡುವಂಥದ್ದು. ಕೊಟ್ಟ ಕಾಸಿಗೆ 'ಪದ್ಮಾವತ್' ಸಿನಿಮಾ ಮೋಸ ಮಾಡುವುದಿಲ್ಲ.