'KGF - 2' ಎದುರು ಮುಗ್ಗರಿಸಿದ 'ಬೀಸ್ಟ್' ಮತ್ತೆ ಗೆದ್ದಿದ್ಹೇಗೆ? ದಳಪತಿ ವಿಜಯ್ ಮುಂದೆ ಮಂಕಾದ ಕಮಲ್ 'ವಿಕ್ರಂ'!

12.62 ರೇಟಿಂಗ್ ಪಡೆದ 'ಬೀಸ್ಟ್'

ನೆಲ್ಸನ್ ದಿಲೀಪ್ ಕುಮಾರ್ ನಿರ್ದೇಶನದ 'ಬೀಸ್ಟ್' ಸಿನಿಮಾ ಏಪ್ರಿಲ್ 13ಕ್ಕೆ ತೆರೆಗೆ ಬಂದಿತ್ತು. ಇಳಯ ದಳಪತಿ ವಿಜಯ್ ಜೋಡಿಯಾಗಿ ಪೂಜಾ ಹೆಗ್ಡೆ ಮಿಂಚಿದ್ದರು. ಚಿತ್ರಕ್ಕೆ ಅನಿರುದ್ಧ್ ರವಿಚಂದರ್ ಮ್ಯೂಸಿಕ್ ಹೈಲೆಟ್ ಆಗಿತ್ತು. ಅದರಲ್ಲೂ 'ಅರಾಬಿಕ್ ಕುತ್ತು' ಸೂಪರ್ ಹಿಟ್ ಆಗಿತ್ತು. ಆದರೆ ಸಿನಿಮಾ ಪ್ರೇಕ್ಷಕರ ಮನಗೆಲ್ಲುವಲ್ಲಿ ವಿಫಲವಾಗಿತ್ತು. ಮರುದಿನವೇ 'KGF - 2' ತೆರೆಗಪ್ಪಳಿಸಿ ಬಾಕ್ಸಾಫೀಸ್ ಶೇಕ್ ಮಾಡಿತ್ತು. 'ಬೀಸ್ಟ್' ಆರ್ಭಟ ನಡೆಯಲೇ ಇಲ್ಲ. ಆದರೆ ಟಿವಿಯಲ್ಲಿ ಪ್ರಸಾರವಾದ ಚಿತ್ರಕ್ಕೆ 12.62 TRP ರೇಟಿಂಗ್ ಸಿಕ್ಕಿದೆ. 'ವಿಕ್ರಂ' ಚಿತ್ರಕ್ಕೆ ಕೇವಲ 4.42 ರೇಟಿಂಗ್ ಅಷ್ಟೇ ಸಿಕ್ಕಿದೆ.

426 ಕೋಟಿ ದೋಚಿದ್ದ 'ವಿಕ್ರಂ'

ಲೋಕೇಶ್ ಕನಕರಾಜ್ ನಿರ್ದೇಶನದ ಆಕ್ಷನ್ ಥ್ರಿಲ್ಲರ್ 'ವಿಕ್ರಂ' ಸಿನಿಮಾ ಸೆನ್ಸೇಷನ್ ಕ್ರಿಯೇಟ್ ಮಾಡಿತ್ತು. ತಮಿಳುನಾಡು ಬಾಕ್ಸಾಫೀಸ್‌ನಲ್ಲಿ ಕೊಂಚ ಜೋರಾಗೇ ಸದ್ದು ಮಡಿ 426 ಕೋಟಿ ರೂ.ಗೂ ಹೆಚ್ಚು ಗಳಿಸಿತ್ತು. ಚಿತ್ರದಲ್ಲಿ ಕಮಲ್ ಹಾಸನ್‌ಗೆ ವಿಜಯ್ ಸೇತುಪತಿ, ಫಹಾದ್ ಫಾಸಿಲ್ ಸಾಥ್ ಕೊಟ್ಟಿದ್ದರು. ಬಾಕ್ಸಾಫೀಸ್‌ನಲ್ಲಿ ಅಷ್ಟೆಲ್ಲಾ ಸದ್ದು ಮಾಡಿದ ಚಿತ್ರ ಟಿವಿಯಲ್ಲಿ ವೀಕ್ಷಕರನ್ನು ಸೆಳೆಯದೇ ಇರುವುದು ಅಚ್ಚರಿ ಎನಿಸಿದೆ.

ದೀಪಾವಳಿ ತಮಿಳು ಚಿತ್ರಗಳ TRP

ಟಿವಿಯಲ್ಲಿ ಯಾವ ಸಿನಿಮಾವನ್ನು ವೀಕ್ಷಕರು ಹೆಚ್ಚು ನೋಡಿದ್ದಾರೆ ಅನ್ನೋದು TRP ರೇಟಿಂಗ್‌ನಿಂದ ಗೊತ್ತಾಗುತ್ತದೆ. ಈ ಬಾರಿ ದೀಪಾವಳಿಗೆ ಟಿವಿಯಲ್ಲಿ ಪ್ರಸಾರವಾಗಿದ್ದ ಇನ್ನುಳಿದ ತಮಿಳು ಸಿನಿಮಾಗಳ ರೇಟಿಂಗ್ ನೋಡುವುದಾದರೆ ರಜನಿಕಾಂತ್ ನಟನೆಯ 'ಅರುಣಾಚಲಂ' ಚಿತ್ರಕ್ಕೆ 9.21 ರೇಟಿಂಗ್ ಸಿಕ್ಕಿದೆ. ಈ ಹಿಂದೆ ಸಾಕಷ್ಟು ಬಾರಿ ಈ ಸಿನಿಮಾ ಟಿವಿಯಲ್ಲಿ ಪ್ರಸಾರವಾಗಿತ್ತು. ಇನ್ನು 10ನೇ ಬಾರಿಗೆ ಪ್ರಸಾರವಾಗಿದ್ದ ಅಜಿತ್ ನಟನೆಯ 'ವಿಶ್ವಾಸಂ' ಚಿತ್ರಕ್ಕೆ 10.27 ರೇಟಿಂಗ್ ಸಿಕ್ಕಿರೋದು ವಿಶೇಷ.

'ವಿಕ್ರಂ' ಶತದಿನೋತ್ಸವ ಸಂಭ್ರಮಾಚರಣೆ

ಸೋತು ಸುಣ್ಣವಾಗಿದ್ದ ಕಮಲ್ ಹಾಸನ್‌ಗೆ 'ವಿಕ್ರಂ' ಸಕ್ಸಸ್ ಟಾನಿಕ್ ನೀಡಿರೋದು ಸುಳ್ಳಲ್ಲ. ಚಿತ್ರದ ನಿರ್ಮಾಣದಲ್ಲೂ ಕೈ ಜೋಡಿಸಿದ್ದ ಉಳಗ ನಾಯಗನ್ ತಮ್ಮ ಸಾಲವನ್ನು ತೀರಿಸಿದ್ದರು. ಇನ್ನು ಉಳಗನಾಯಗನ್ ಹುಟ್ಟುಹಬ್ಬದ ಸಂಭ್ರಮದಲ್ಲೇ 'ವಿಕ್ರಂ' ಚಿತ್ರದ ಶತದಿನೋತ್ಸವ ಸಂಭ್ರಮಾಚರಣೆ ಮಾಡಲಾಗಿದೆ. ಚೆನ್ನೈನ ಕಲೆವನೈರ್ ಸಭಾಂಗಣದಲ್ಲಿ ಚಿತ್ರರಂಗ ಹಾಗೂ ರಾಜಕೀಯ ಮುಖಂಡರ ಸಮ್ಮುಖದಲ್ಲಿ ಕಾರ್ಯಕ್ರಮ ನೆರವೇರಿದೆ.