ಮೆಗಾಸ್ಟಾರ್ ಚಿರಂಜೀವಿ ಹಿರಿಯ ಪುತ್ರಿ ಸುಶ್ಮಿತಾ ಚಿತ್ರರಂಗಕ್ಕೆ ಎಂಟ್ರಿ

ಫ್ಯಾಶನ್ ಡಿಸೈನರ್ ಸುಶ್ಮಿತಾ

ಚಿರಂಜೀವಿಯ ಹಿರಿಯ ಪುತ್ರಿ ಸುಶ್ಮಿತಾ ಕೊಂಡೇಲಾ ವೃತ್ತಿಯಲ್ಲಿ ಫ್ಯಾಶನ್ ಡಿಸೈನರ್. ಸಿನಿಮಾಗಳಿಗೆ ಕಾಸ್ಟ್ಯೂಮ್ ಡಿಸೈನರ್ ಆಗಿ ಕೆಲಸ ಸಹ ಮಾಡಿದ್ದಾರೆ. ಚಿರಂಜೀವಿ ನಟಿಸಿದ 'ಖೈದಿ ನಂ 150', 'ಜೈ ಚಿರಂಜೀವಿ', ಹಾಗೂ 'ರಂಗಸ್ಥಲಂ' ಚಿತ್ರಗಳಿಗೆ ವಸ್ತ್ರ ವಿನ್ಯಾಸಕಿ ಆಗಿದ್ದರು. 'ಗೋಲ್ಡ್ ಬಾಕ್ಸ್ ಎಂಟರ್‌ಟೈನ್‌ಮೆಂಟ್' ನಿರ್ಮಾಣ ಸಂಸ್ಥೆ ಹುಟ್ಟುಹಾಕಿ ಸಣ್ಣ ಬಜೆಟ್ ಚಿತ್ರಗಳನ್ನು ನಿರ್ಮಿಸುತ್ತಿದ್ದಾರೆ.

2006ರಲ್ಲಿ ಮದುವೆ ಆಗಿದೆ

ಸುಶ್ಮಿತಾ ಕೊಂಡೇಲಾ ಅವರಿಗೆ 2006ರಲ್ಲಿಯೇ ವಿವಾಹವಾಗಿದೆ. ವಿಷ್ಣುಪ್ರಸಾದ್ ಜೊತೆ ದಾಂಪತ್ಯ ಜೀವನ ಆರಂಭಿಸಿದ್ದರು. ಈ ದಂಪತಿಗೆ ಇಬ್ಬರು ಮಕ್ಕಳು ಸಹ ಇದ್ದಾರೆ. ಸಮರ ಮತ್ತು ಸಂಹಿತಾ. ಸುಶ್ಮಿತಾಗೆ ಈಗ 38 ವರ್ಷ ವಯಸ್ಸು.

ಚಿರಂಜೀವಿ ಮಕ್ಕಳ ವಿವರ

ತೆಲುಗಿನ ಖ್ಯಾತ ಕಲಾವಿದ ಅಲ್ಲು ರಾಮಲಿಂಗಯ್ಯ ಅವರ ಮಗಳು ಸುರೇಖಾ ಅವರನ್ನು 1980ರಲ್ಲಿ ಚಿರಂಜೀವಿ ಮದುವೆಯಾದರು. ಈ ದಂಪತಿಗೆ ಮೂವರು ಮಕ್ಕಳು. ಸುಶ್ಮಿತಾ, ಶ್ರೀಜಾ ಹಾಗೂ ರಾಮ್ ಚರಣ್. ರಾಮ್ ಚರಣ್ ತೆಲುಗು ಇಂಡಸ್ಟ್ರಿಯ ಸ್ಟಾರ್ ನಟ. ಚಿರಂಜೀವಿ ಸಹೋದರ ನಾಗಬಾಬು ಮತ್ತು ಪವನ್ ಕಲ್ಯಾಣ್. ನಾಗುಬಾಬು ಮಗ ವರುಣ್ ತೇಜ ನಾಯಕ ನಟ. ನಿಹಾರಿಕ ಸಹ ಸಿನಿಮಾ ಮಾಡಿದ್ದಾರೆ.

'ಆಚಾರ್ಯ' ಬಿಡುಗಡೆಯಾಗಬೇಕಿದೆ

ಸದ್ಯ ಚಿರಂಜೀವಿ ನಟನೆಯ 'ಆಚಾರ್ಯ' ಸಿನಿಮಾ ಸಂಪೂರ್ಣ ಚಿತ್ರೀಕರಣ ಮುಗಿಸಿದೆ. ರಾಮ್ ಚರಣ್ ತೇಜ ಈ ಚಿತ್ರ ನಿರ್ಮಿಸಿದ್ದು, ಮುಖ್ಯ ಪಾತ್ರವೊಂದರಲ್ಲಿ ಅಭಿನಯಿಸಿದ್ದಾರೆ. ಈಗಾಗಲೇ ಎರಡ್ಮೂರು ಸಲ ಬಿಡುಗಡೆ ದಿನಾಂಕ ಘೋಷಿಸಿ ಕೊರೊನಾ ಲಾಕ್‌ಡೌನ್‌ನಿಂದ ಮುಂದೂಡಿಕೆ ಮಾಡಿದೆ. ಈಗ ಹೊಸ ದಿನಾಂಕಕ್ಕಾಗಿ ಚಿತ್ರತಂಡ ಆಲೋಚಿಸುತ್ತಿದೆ. ಕಾಜಲ್ ಅಗರ್‌ವಾಲ್ ನಾಯಕಿಯಾಗಿ ನಟಿಸಿದ್ದು, ಪೂಜಾ ಹೆಗ್ಡೆ ವಿಶೇಷ ಪಾತ್ರದಲ್ಲಿ ನಟಿಸಿದ್ದಾರೆ.

ಬರ್ತಡೇಗೆ ಹೊಸ ಸಿನಿಮಾಗಳು ಘೋಷಣೆ

ಚಿರಂಜೀವಿ ಹುಟ್ಟುಹಬ್ಬದ ವಿಶೇಷವಾಗಿ ಅಭಿಮಾನಿಗಳಲ್ಲಿ ವಿಶೇಷ ಮನವಿ ಮಾಡಿರುವ ಚಿರಂಜೀವಿ ಸಾಧ್ಯವಾದರೆ ಗಿಡಗಳನ್ನು ನೆಡಿ ಎಂದು ಕರೆ ಕೊಟ್ಟಿದ್ದಾರೆ. ಬರ್ತಡೇ ಪ್ರಯುಕ್ತ ಹೊಸ ಸಿನಿಮಾಗಳು ಘೋಷಣೆಯಾಗಲಿದೆ. ಮಲಯಾಳಂ ಹಿಟ್ ಸಿನಿಮಾ 'ಲೂಸಿಫರ್' ತೆಲುಗು ರಿಮೇಕ್‌ಗೆ ಚಾಲನೆ ಕೊಟ್ಟಿದ್ದಾರೆ. ತಮಿಳಿನ 'ವೇದಲಂ' ಚಿತ್ರವನ್ನು ತೆಲುಗಿಗೆ ರಿಮೇಕ್ ಮಾಡಲಾಗುತ್ತಿದೆ. ಈ ಚಿತ್ರದಲ್ಲೂ ಚಿರಂಜೀವಿ ನಾಯಕ. ನಿರ್ದೇಶಕ ಬಾಬಿ ಜೊತೆಯೂ ಹೊಸ ಸಿನಿಮಾವೊಂದು ಆರಂಭಿಸುತ್ತಿದ್ದಾರೆ.