ತೆಲುಗಿಗೆ ರಾಬರ್ಟ್‌: ದರ್ಶನ್‌ ಪಾತ್ರಕ್ಕೆ ಧ್ವನಿ ಕೊಡುವವರು ಯಾರು?

ಅಭಿಮಾನಿಗಳು ಬಯಸಿದಂತೆಯೇ ಆಗಿದೆ

ದರ್ಶನ್ ಅಭಿಮಾನಿಗಳು ಬಯಸಿದಂತೆಯೇ ಆಗಿದೆ. ತೆಲುಗು ರಾಬರ್ಟ್‌ನಲ್ಲಿ ತಮ್ಮ ಪಾತ್ರಕ್ಕೆ ತಾವೇ ಧ್ವನಿ ನೀಡಲಿದ್ದಾರೆ ನಟ ದರ್ಶನ್. ದರ್ಶನ್‌ ರ ಹಲವು ಸಿನಿಮಾಗಳು ಈಗಾಗಲೇ ತೆಲುಗಿಗೆ ಡಬ್ ಆಗಿ ಬಿಡುಗಡೆ ಆಗಿವೆ. ಆದರೆ ಇದೇ ಮೊದಲ ಬಾರಿಗೆ ದರ್ಶನ್ ತಮ್ಮದೇ ತೆಲುಗು ಸಿನಿಮಾಕ್ಕೆ ತಾವೇ ಡಬ್ ಮಾಡುತ್ತಿದ್ದಾರೆ.

ಸುಲಲಿತವಾಗಿ ತೆಲುಗು ಮಾತನಾಡುತ್ತಾರೆ ದರ್ಶನ್

ದರ್ಶನ್ ಅವರು ಸುಲಲಿತವಾಗಿ ತೆಲುಗು ಭಾಷೆ ಮಾತನಾಡಬಲ್ಲರು. ಈ ಹಿಂದೆ ತಮ್ಮ ತೆಲುಗು ಡಬ್ ಸಿನಿಮಾಗಳ ಪ್ರಚಾರಕ್ಕಾಗಿ ತೆಲುಗು ರಾಜ್ಯಗಳಿಗೆ ಹೋದಾಗ ಅಲ್ಲಿ ಸಂದರ್ಶಕರೊಂದಿಗೆ, ಟಿವಿ ಮಾಧ್ಯಮದವರೊಂದಿಗೆ ತೆಲುಗಿನಲ್ಲಿಯೇ ಮಾತನಾಡಿದ್ದರು ನಟ ದರ್ಶನ್.

ಸುಕುಮಾರ್ ಜೊತೆಗೆ ದರ್ಶನ್ ಸಿನಿಮಾ?

2004 ರಲ್ಲಿ ಬಿಡುಗಡೆ ಆಗಿದ್ದ ಭಗವಾನ್ ಸಿನಿಮಾದಿಂದ ಹಿಡಿದು ಇತ್ತೀಚಿನ ಕುರುಕ್ಷೇತ್ರ ದ ವರೆಗೆ ಹಲವಾರು ಸಿನಿಮಾಗಳು ತೆಲುಗಿಗೆ ಡಬ್ ಆಗಿವೆ. ನಟ ದರ್ಶನ್ ಗೆ ತೆಲುಗು ರಾಜ್ಯಗಳಲ್ಲಿ ಸಹ ಕೋಟ್ಯಂತರ ಅಭಿಮಾನಿಗಳಿದ್ದಾರೆ. ನಟ ದರ್ಶನ್, ತೆಲುಗಿನ ಸ್ಟಾರ್ ನಿರ್ದೇಶಕ ಸುಕುಮಾರ್ ಜೊತೆಗೆ ಸಿನಿಮಾ ಮಾಡಲಿದ್ದಾರೆ ಎಂಬ ಸುದ್ದಿಯೂ ಹರಿದಾಡುತ್ತಿದೆ.

ತಮಿಳು ಸಿನಿಮಾದಲ್ಲಿ ನಟಿಸಿದ್ದ ದರ್ಶನ್

ದರ್ಶನ್‌ ಗೆ ತಮಿಳು ಸಹ ಮಾತನಾಡಲು ಬರುತ್ತದೆ. ದರ್ಶನ್ ಹೀರೋ ಆಗಿ ನಟಿಸುವ ಮುನ್ನಾ ತಮಿಳಿನಲ್ಲಿ ಒಂದು ಸಿನಿಮಾ ನಟಿಸಿದ್ದರು. ವಿಜಯ್‌ಕಾಂತ್ ನಟನೆಯ ಆ ಸಿನಿಮಾದ ಹೆಸರು ವಲ್ಲರಸು. ಕಳೆದ ಲೋಕಸಭಾ ಚುನಾವಣೆ ವೇಳೆ ಸುಮಲತಾ ಪರ ಪ್ರಚಾರ ಮಾಡುತ್ತಾ ಮಂಡ್ಯದ ತಮಿಳು ಕಾಲೋನಿಯಲ್ಲಿ ತಮಿಳಿನಲ್ಲಿ ಮಾತನಾಡಿದ್ದರು ನಟ ದರ್ಶನ್.