ಮುಖಪುಟ

Telugu

ಏಳು ವರ್ಷದ ಹಿಂದೆ ಬಿಡುಗಡೆ ಆಗಿದ್ದ ಮೋಹನ್‌ಲಾಲ್ ನಟಿಸಿ, ಜೀತು ಜೋಸೆಫ್ ನಿರ್ದೇಶಿಸಿದ್ದ ಮಲಯಾಳಂ ನ 'ದೃಶ್ಯಂ' ಸಿನಿಮಾ ಹಲವು ದಾಖಲೆಗಳನ್ನು ಬರೆದಿತ್ತು. ಅದರಲ್ಲಿ ಮುಖ್ಯವಾದುದು, ಅತಿ ಹೆಚ್ಚು ಭಾಷೆಗೆ ರೀಮೇಕ್ ಆದ ಭಾರತದ ಸಿನಿಮಾ ಎಂಬ ಖ್ಯಾತಿ ಗಳಿಸಿಕೊಂಡಿತು 'ದೃಶ್ಯಂ'

ಇದೀಗ 'ದೃಶ್ಯಂ2' ಸಿನಿಮಾ ಬಿಡುಗಡೆ ಆಗಿದ್ದು, ಬಿಡುಗಡೆ ಆದ ಎರಡೇ ದಿನಕ್ಕೆ ರೀಮೇಕ್ ಗೊಳ್ಳಲು ಸಕಲ ಸಜ್ಜಾಗಿದೆ. 'ದೃಶ್ಯಂ' ಸಿನಿಮಾವನ್ನು ಅದೇ ಹೆಸರಲ್ಲಿ ತೆಲುಗಿಗೆ ರೀಮೇಕ್ ಮಾಡಲಾಗಿತ್ತು, ಅದರಲ್ಲಿ ವೆಂಕಟೇಶ್ ನಟಿಸಿದ್ದರು, ಈಗ ಮತ್ತೆ 'ದೃಶ್ಯಂ 2' ರೀಮೇಕ್‌ ನಲ್ಲಿಯೂ ಅವರೇ ನಟಿಸುತ್ತಿದ್ದಾರೆ.

ಕಳೆದ ಬಾರಿ ತೆಲುಗು 'ದೃಶ್ಯಂ' ಅನ್ನು ಶ್ರೀಪ್ರಿಯಾ ನಿರ್ದೇಶಿಸಿದ್ದರು, ಈ ಬಾರಿ ಮೂಲ ಸಿನಿಮಾದ ನಿರ್ದೇಶಕರಾಗಿರುವ ಜೀತು ಜೂಸೆಫ್ ಅವರೇ ತೆಲುಗು ರೀಮೇಕ್ ಅನ್ನು ನಿರ್ದೇಶಿಸಲಿದ್ದಾರೆ.

ಜೀತು ಜೋಸೆಫ್ ಈಗಾಗಲೇ ತೆಲಂಗಾಣದಲ್ಲಿ ಲೊಕೇಶನ್ ಹುಡುಕಾಟ ಆರಂಭಿಸಿದ್ದು, ಮಾರ್ಚ್ ತಿಂಗಳಲ್ಲಿ ಚಿತ್ರೀಕರಣ ಪ್ರಾರಂಭ ಮಾಡಲಿದ್ದಾರೆ. ಜೀತು ಜೋಸೆಫ್ ಅವರೇ ರೀಮೇಕ್ ನಿರ್ದೇಶನ ಮಾಡುತ್ತಿರುವ ಕಾರಣ ಕತೆಯಲ್ಲಿ ತುಸು ಬದಲಾವಣೆ ಮಾಡುವ ನಿರೀಕ್ಷೆ ಇದೆ.

ಮೊದಲ 'ದೃಶ್ಯಂ' ಸಿನಿಮಾವು ಕನ್ನಡ, ತೆಲುಗು, ತಮಿಳು, ಹಿಂದಿ, ಸಿಂಹಳಿ ಭಾಷೆ, ಚೈನೀಸ್ ಭಾಷೆಗೆ ರೀಮೇಕ್ ಆಗಿತ್ತು. ಎಲ್ಲ ಭಾಷೆಗಳಲ್ಲಿಯೂ ಹಿಟ್ ಸಿನಿಮಾ ಎನಿಸಿಕೊಂಡಿತ್ತು. ಇದೀಗ ದೃಶ್ಯಂ 2 ಸಿನಿಮಾ ಬಿಡುಗಡೆ ಆಗಿದ್ದು, ಅದೂ ಸಹ ಹಿಟ್ ಎನಿಸಿಕೊಂಡಿದೆ, ಆ ಸಿನಿಮಾದ ರೀಮೇಕ್ ಸಹ ಹಲವು ಭಾಷೆಗಳಲ್ಲಿ ಬರುವ ನಿರೀಕ್ಷೆ ಇದೆ.

ದೃಶ್ಯಂ 2 ಮಲಯಾಳಂ ಸಿನಿಮಾ ಅಮೆಜಾನ್ ಪ್ರೈಂ ನಲ್ಲಿ ಫೆಬ್ರವರಿ 19 ರಂದು ಬಿಡುಗಡೆ ಆಗಿದ್ದು, ಸಿನಿಮಾ ಬಗ್ಗೆ ಧನಾತ್ಮಕ ವಿಮರ್ಶೆಗಳು ಕೇಳಿಬಂದಿವೆ. ದೃಶ್ಯಂ 2 ಅನ್ನು ಪ್ರೇಕ್ಷಕರು ಮೆಚ್ಚಿಕೊಂಡಿದ್ದಾರೆ.