'ಸರ್ಕಾರು ವಾರಿ ಪಾಟ' ಸಿನಿಮಾಕ್ಕೆ ಮಹೇಶ್ ಬಾಬು ಪಡೆದ ಸಂಭಾವನೆ ಎಷ್ಟು?

ಮಹೇಶ್ ಪಡೆದ ಸಂಭಾವನೆ ಏಷ್ಟು?

'ಸರ್ಕಾರು ವಾರಿ ಪಾಟ' ಸಿನಿಮಾಕ್ಕೆ ಮಹೇಶ್ ಬಾಬು, ಸುಮಾರು 45 ರಿಂದ 50 ಕೋಟಿಗಳಷ್ಟು ಸಂಭಾವನೆ ಪಡೆದಿದ್ದಾರೆ ಎಂಬ ಮಾತುಗಳು ಕೇಳಿ ಬರುತ್ತಿವೆ. ಸಿನಿಮಾ ವ್ಯವಹಾರ ವಿಶ್ಲೇಷಕ ರಮೇಶ್ ಬಾಲಾ ಮಾಡಿರುವ ಟ್ವೀಟ್ ಪ್ರಕಾರ, ಸಾಮಾನ್ಯ ಸಿನಿಮಾಗಳಿಗೆ ಮಹೇಶ್ ಬಾಬು 35 ಕೋಟಿ ಪಡೆಯುತ್ತಾರೆ. ಅವರ ಸಂಭಾವನೆ 35 ರಿಂದ 50 ಕೋಟಿ ನಡುವಲ್ಲಿ ಇದೆ ಎಂದಿದ್ದಾರೆ.

ಜಾಹೀರಾತುಗಳಿಂದ ದೊಡ್ಡ ಮೊತ್ತದ ಸಂಭಾವನೆ

ಸಿನಿಮಾಗಳ ಜೊತೆಗೆ ಜಾಹೀರಾತುಗಳಲ್ಲಿ ಸಹ ಮಹೇಶ್ ಬಾಬು ನಟಿಸುತ್ತಾರೆ. ಜಾಹೀರಾತುಗಳಿಂದಲೂ ದೊಡ್ಡ ಮೊತ್ತದ ಸಂಭಾವನೆಯನ್ನೇ ಮಹೇಶ್ ಬಾಬು ಪಡೆಯುತ್ತಾರೆ. ಹಿಂದೊಮ್ಮೆ ಸಂದರ್ಶನವೊಂದರಲ್ಲಿ ಹೇಳಿದ್ದಂತೆ ಕೇವಲ ಜಾಹೀರಾತುಗಳಲ್ಲಿ ನಟಿಸಿ ಅದರಿಂದ ಬಂದ ಸಂಭಾವನೆಯಿಂದಲೇ ದೊಡ್ಡ ಆಸ್ತಿಯೊಂದನ್ನು ಮಹೇಶ್ ಬಾಬು ಖರೀದಿಸಿದ್ದರಂತೆ.

ಸಮಾಜ ಸೇವೆಯಲ್ಲಿ ತೊಡಗಿಕೊಂಡಿರುವ ಮಹೇಶ್

ಮಹೇಶ್ ಬಾಬು ಸಮಾಜ ಸೇವೆಯಲ್ಲಿ ಸಹ ತೊಡಗಿಕೊಂಡಿದ್ದಾರೆ. ಹಸುಗೂಸುಗಳ ರಕ್ಷಣೆಗೆ ಮಹೇಶ್ ಬಾಬು ಹಾಗೂ ಪತ್ನಿ ನಮ್ರತಾ ಶಿರೋಡ್ಕರ್ ಟೊಂಕಕಟ್ಟಿದ್ದಾರೆ. ಈ ದಂಪತಿಯ ಮೊದಲ ಮಗು ಸಹ ಹುಟ್ಟಿದಾಗ ಹಲವು ಸಮಸ್ಯೆಗಳನ್ನು ಅನುಭವಿಸಿತ್ತಂತೆ ಹಾಗಾಗಿಯೇ ಬಡ ಮಕ್ಕಳ ಜೀವ ಉಳಿಸುವ ಕಾರ್ಯದಲ್ಲಿ ಮಹೇಶ್ ಬಾಬು ಹಾಗೂ ನಮ್ರತಾ ತೊಡಗಿಕೊಂಡಿದ್ದಾರೆ. ಜೊತೆಗೆ ನೆಲ್ಲೂರು ಬಳಿ ಹಳ್ಳಿಯೊಂದನ್ನು ದತ್ತಿಗೆ ತೆಗೆದುಕೊಂಡಿರುವ ಮಹೇಶ್ ಬಾಬು ಅಲ್ಲಿನ ಜನರಿಗೆ ಕುಡಿಯುವ ನೀರು, ಆರೋಗ್ಯ ವ್ಯವಸ್ಥೆ, ಶಿಕ್ಷಣ ಇತರೆಗಳ ಜವಾಬ್ದಾರಿ ಹೊತ್ತುಕೊಂಡಿದ್ದಾರೆ.

ರಾಜಮೌಳಿ ಜೊತೆ ಸಿನಿಮಾ

'ಸರ್ಕಾರು ವಾರಿ ಪಾಟ' ಸಿನಿಮಾ ಒಳ್ಳೆಯ ಓಪನಿಂಗ್ ಪಡೆದುಕೊಂಡಿದೆ. ಈ ಸಿನಿಮಾದ ಬಳಿಕ ತ್ರಿವಿಕ್ರಮ್ ಶ್ರೀನಿವಾಸ್ ಜೊತೆಗೆ ಹೊಸ ಸಿನಿಮಾ ಒಂದರಲ್ಲಿ ಮಹೇಶ್ ಬಾಬು ನಟಿಸಲಿದ್ದಾರೆ. ಆ ಬಳಿಕ ರಾಜಮೌಳಿ ನಿರ್ದೇಶನದ ಹೊಸ ಸಿನಿಮಾದಲ್ಲಿ ಮಹೇಶ್ ಬಾಬು ನಟಿಸಲಿದ್ದಾರೆ. ರಾಜಮೌಳಿ ನಿರ್ದೇಶಿಸಲಿರುವ ಸಿನಿಮಾದಲ್ಲಿ ಮಹೇಶ್ ಬಾಬು ಬಾಂಡ್ ಪಾತ್ರದಲ್ಲಿ ನಟಿಸಲಿದ್ದಾರಂತೆ.