ಮೇಡಮ್ ಟುಸ್ಸಾಡ್ಸ್ ನಲ್ಲಿ ಕಾಜಲ್ ಮೇಣದ ಪ್ರತಿಮೆ: ಹೊಸ ಇತಿಹಾಸ ಬರೆದ ನಟಿ.!

ಸಂತಸಗೊಂಡ ಕಾಜಲ್ ಅಗರ್ವಾಲ್

''ಚಿಕ್ಕವಳಿದ್ದಾಗ ನಾನು ಮೇಡಮ್ ಟ್ಯುಸ್ಸಾಡ್ಸ್ ಗೆ ಭೇಟಿ ನೀಡಿದ್ದೆ. ಅಲ್ಲಿನ ಮೇಣದ ಪ್ರತಿಮೆಗಳನ್ನು ನೋಡಿ ಬೆರಗಾಗಿದ್ದೆ. ಈಗ ನನ್ನದೇ ಮೇಣದ ಪ್ರತಿಮೆ ಅನಾವರಣಗೊಳ್ಳುತ್ತಿರುವುದು ಸಂತೋಷವಾಗಿದೆ'' ಎಂದು ಸೋಷಿಯಲ್ ಮೀಡಿಯಾದಲ್ಲಿ ಕಾಜಲ್ ಅಗರ್ವಾಲ್ ಬರೆದುಕೊಂಡಿದ್ದಾರೆ.

ಮೊದಲ ದಕ್ಷಿಣ ಭಾರತದ ನಟಿ

ಸಿಂಗಾಪುರ್ ನಲ್ಲಿರುವ ಮೇಡಮ್ ಟ್ಯುಸ್ಸಾಡ್ಸ್ ನಲ್ಲಿ ಶ್ರೀದೇವಿ, ಕರಣ್ ಜೋಹರ್, ಅನುಷ್ಕಾ ಶರ್ಮಾ ಮತ್ತು ಮಹೇಶ್ ಬಾಬು ರವರ ಮೇಣದ ಪ್ರತಿಮೆಗಳಿವೆ. ಇದೀಗ ಇದೇ ಲಿಸ್ಟ್ ಗೆ ಕಾಜಲ್ ಅಗರ್ವಾಲ್ ಸೇರ್ಪಡೆಗೊಳ್ಳುತ್ತಿದ್ದಾರೆ. ಮೇಡಮ್ ಟ್ಯುಸ್ಸಾಡ್ಸ್ ಮ್ಯೂಸಿಯಂನಲ್ಲಿ ಮೇಣದ ಪ್ರತಿಮೆ ಪಡೆಯುತ್ತಿರುವ ದಕ್ಷಿಣ ಭಾರತದ ಮೊಟ್ಟ ಮೊದಲ ನಟಿ ಕಾಜಲ್ ಅಗರ್ವಾಲ್. ಇನ್ನೂ ಲಂಡನ್ ನಲ್ಲಿರುವ ಮೇಡಮ್ ಟ್ಯುಸ್ಸಾಡ್ಸ್ ನಲ್ಲಿ ಅಮಿತಾಬ್ ಬಚ್ಚನ್, ಶಾರೂಖ್ ಖಾನ್, ಸಲ್ಮಾನ್ ಖಾನ್, ಐಶ್ವರ್ಯ ರೈ ಬಚ್ಚನ್, ಕತ್ರಿನಾ ಕೈಫ್, ದೀಪಿಕಾ ಪಡುಕೋಣೆ ಮುಂತಾದವರ ಮೇಣದ ಪ್ರತಿಮೆಗಳಿವೆ.

ಬಹುಬೇಡಿಕೆಯ ನಟಿ

2007 ರಲ್ಲಿ 'ಲಕ್ಷ್ಮಿ ಕಲ್ಯಾಣಂ' ಚಿತ್ರದ ಮೂಲಕ ಟಾಲಿವುಡ್ ಗೆ ಪದಾರ್ಪಣೆ ಮಾಡಿದ ಕಾಜಲ್ ಅಗರ್ವಾಲ್ ಸದ್ಯ ದಕ್ಷಿಣ ಭಾರತದ ಬಹು ಬೇಡಿಕೆಯ ನಟಿ. 'ಮಗಧೀರ', 'ಆರ್ಯ-2', 'ಡಾರ್ಲಿಂಗ್', 'ಬೃಂದಾವನ', 'ಬಾದ್ಷಾ' ಮುಂತಾದ ಹಿಟ್ ಸಿನಿಮಾಗಳ ನಾಯಕಿ ಕಾಜಲ್ ಅಗರ್ವಾಲ್.

ಕಾಜಲ್ ಕೈಯಲ್ಲಿರುವ ಚಿತ್ರಗಳು ಯಾವುವು.?

ಇದೀಗ ಕಾಜಲ್ ಅಗರ್ವಾಲ್ ಅಭಿನಯದ 'ಕ್ವೀನ್' ಚಿತ್ರದ ರೀಮೇಕ್ ಆಗಿರುವ 'ಪ್ಯಾರಿಸ್ ಪ್ಯಾರಿಸ್', ಕಮಲ್ ಹಾಸನ್ ಜೊತೆಗಿನ 'ಇಂಡಿಯನ್-2' ಮತ್ತು ಬಾಲಿವುಡ್ ಗ್ಯಾಂಗ್ ಸ್ಟರ್ ಡ್ರಾಮಾ 'ಮುಂಬೈ ಸಾಗಾ' ಬಿಡುಗಡೆ ಆಗಬೇಕಿದೆ.