ತೆಲುಗು 'ಲವ್ ಮಾಕ್ಟೇಲ್' ಅಟ್ಟರ್ ಫ್ಲಾಪ್: ಕನ್ನಡ ಸಿನಿಮಾ ಬಜೆಟ್‌ನಷ್ಟು ಕಲೆಕ್ಷನ್ ಮಾಡ್ಲಿಲ್ಲ!

ಒಟ್ಟು 39 ಲಕ್ಷ ಕಲೆಕ್ಷನ್

'ಗುರ್ತುಂದಾ ಶೀತಾಕಾಲಂ' ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಹೀನಾಯವಾಗಿ ಸೋಲುಂಡಿದೆ. ತಮನ್ನಾ ರೀತಿಯ ಸ್ಟಾರ್ ಹೀರೊಯಿನ್ ನಟಿಸಿದ್ದಾರೆ ಎನ್ನುವ ಕಾರಣಕ್ಕೆ ಸಿನಿಮಾ ಬಗ್ಗೆ ನಿರೀಕ್ಷೆ ಇತ್ತು. ಮೊದಲ ದಿನ ಸಿನಿಮಾ ಬಗ್ಗೆ ಒಳ್ಳೆ ಮಾತುಗಳು ಕೇಳಿಬಂದಿತ್ತು. ಸಿನಿಮಾ ಕಥೆ, ಸತ್ಯದೇವ್ ಹಾಗೂ ತಮನ್ನಾ ಅಭಿನಯಕ್ಕೂ ಮೆಚ್ಚುಗೆ ಸಿಕ್ಕಿತ್ತು. ಆದರೆ ಸಿನಿಮಾ ನೋಡಲು ಪ್ರೇಕ್ಷಕರು ಥಿಯೇಟರ್‌ಗೆ ಬರಲೇಯಿಲ್ಲ. ಒಂದೇ ವಾರಕ್ಕೆ ಥಿಯೇಟರ್‌ಗಳಿಂದ ಎತ್ತಂಗಡಿಯಾದ ಸಿನಿಮಾ ಒಟ್ಟು ಗಳಿಸಿರುವ 39 ಲಕ್ಷ ಮಾತ್ರ ಎಂದು ಟಾಲಿವುಡ್ ಸಿನಿ ಪಂಡಿತರು ಲೆಕ್ಕ ಕೊಡುತ್ತಿದ್ದಾರೆ.

1.61 ಕೋಟಿ ರೂ. ನಷ್ಟ

ಸಿನಿಮಾ 1.72 ಕೋಟಿ ಥ್ರಿಯೇಟ್ರಿಕಲ್ ಬ್ಯುಸಿನೆಸ್ ಮಾಡಿತ್ತು. ಬ್ರೇಕ್ ಈವನ್ ಆಗುವುದಕ್ಕೆ 2 ಕೋಟಿ ಶೇರ್ ಬರಬೇಕಿತ್ತು. ಆದರೆ ಸಿನಿಮಾ ಒಟ್ಟು ಕಲೆಕ್ಷನ್ 40 ಲಕ್ಷ ದಾಟಿಲ್ಲ. ಇದರಿಂದ ವಿತರಕರು 1.61 ಕೋಟಿ ನಷ್ಟ ಅನುಭವಿಸಿದ್ದಾರೆ. ಕೆಲವರು ಸಿನಿಮಾ ನೋಡಲು ಸೀರಿಯಲ್ ತರ ಇದೆ ಎಂದಿದ್ದಾರೆ. ಒಳ್ಳೆ ಸಿನಿಮಾ ಆದರೆ ಓಟಿಟಿ ಕಂಟೆಂಟ್ ಎನ್ನುವುದು ಕೆಲವರ ವಾದ. ಹಾಗಾಗಿ ಸಿನಿಮಾ ಡಿಜಿಟಲ್ ಮಾಧ್ಯಮದಲ್ಲಿ ಸದ್ದು ಮಾಡುವ ಸಾಧ್ಯತೆಯಿದೆ.

ತಮನ್ನಾಗೆ ಕಥೆ ಹೇಳಿ ಒಪ್ಪಿಸಿದ್ದ ನಿರ್ದೇಶಕ

ಸತತ ಸೋಲುಗಳಿಂದ ಕಂಗೆಟ್ಟಿದ್ದ ನಿರ್ದೇಶಕ ನಾಗಶೇಖರ್ 'ಲವ್ ಮಾಕ್ಟೇಲ್' ಮೂಲಕ ಟಾಲಿವುಡ್‌ನಲ್ಲಿ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದರು. ತಮನ್ನಾಗೆ ಕಥೆ ಹೇಳಿ ಒಪ್ಪಿಸಿ ಗೆದ್ದಿದ್ದರು. ನಿರ್ಮಾಪಕರನ್ನು ಹುಡುಕಿ ಸಿನಿಮಾ ಮಾಡಿದ್ದರು. ಆದರೆ ಅವರ ಲೆಕ್ಕಾಚಾರವೆಲ್ಲಾ ತಲೆಕೆಳಗಾಗಿದೆ. ಕನ್ನಡದಲ್ಲಿ ಸೂಪರ್ ಹಿಟ್ ಆದ ಸಿನಿಮಾ ತೆಲುಗಿನಲ್ಲಿ ಸೋತಿದ್ದು ಯಾಕೆ ಎನ್ನುವ ಚರ್ಚೆ ಶುರುವಾಗಿದೆ.

ತಮಿಳಿನಲ್ಲಿ ನಾಗಶೇಖರ್ ಹೀರೊ

ಅಮರ್ ನಂತರ ನಾಗಶೇಖರ್ ಕನ್ನಡಕ್ಕಿಂತ ಹೆಚ್ಚು ತೆಲುಗು, ತಮಿಳಿನತ್ತ ಮುಖ ಮಾಡಿದ್ದಾರೆ. ತೆಲುಗಿನಲ್ಲಿ ನಿರ್ದೇಶಿಸಿದ್ದ 'ಗುರ್ತುಂದಾ ಶೀತಾಕಾಲಂ' ಸಿನಿಮಾ ಸೋತಿದೆ. 'ನವೆಂಬರ್ ಮಳೆಯಿಳ್ ನಾನು ಅವಳುಂ' ಹೆಸರಿನ ತಮಿಳು ಚಿತ್ರದಲ್ಲಿ ಒಂದು ವಿಭಿನ್ನ ಕಥೆ ಹೇಳಲು ನಾಗಶೇಖರ್ ಮುಂದಾಗಿದ್ದಾರೆ. ಚಿತ್ರವನ್ನು ನಿರ್ದೇಶನ ಮಾಡುವುದರ ಜೊತೆಗೆ ಹೀರೊ ಆಗಿ ನಟಿಸುತ್ತಿದ್ದಾರೆ.