ರಾಜಮೌಳಿ ಚಿತ್ರಕ್ಕಾಗಿ ಪ್ರಭಾಸ್ ಹಾದಿಯಲ್ಲಿ ಮಹೇಶ್ ಬಾಬು!

ರಾಜಮೌಳಿ ಹೀರೋಗಳಿಗೆ ಸವಾಲು!

ನಿರ್ದೇಶಕ ರಾಜಮೌಳಿ ತಮ್ಮ ನಟರಿಂದ ಅತ್ಯುತ್ತಮವಾದುದನ್ನು ನಿರೀಕ್ಷೆ ಮಾಡುತ್ತಾರೆ. ನಾಯಕ ನಟರು ಎಷ್ಟೇ ಸಿನಿಮಾಗಳನ್ನು ಮಾಡಿದ್ದರು ಕೂಡ, ರಾಜಮೌಳಿ ಸಿನಿಮಾದಲ್ಲಿ ಬೇರೆ ರೀತಿಯಲ್ಲಿ ಕಾಣಿಸುತ್ತಾರೆ. ಇನ್ನು ರಾಜಮೌಳಿ ಸಿನಿಮಾದಲ್ಲಿ ನಟಿಸುವುದೇ ಒಂದು ಅದೃಷ್ಟ ಎನ್ನುವಂತಾಗಿದೆ. ಈಗ ನಟ ಮಹೇಶ್ ಬಾಬು ಸರದಿ. ಸಿನಿಮಾ ಶುರುವಾಗಲು ಇನ್ನು ಸಾಕಷ್ಟು ಸಮಯ ಇದೆ. ಆದರೆ ಈಗಿನಿಂದಲೇ ನಟ ಮಹೇಶ್ ಬಾಬು, ರಾಜಮೌಳಿ ಸಿನಿಮಾಗಾಗಿ ತಯಾರಿ ಶುರು ಮಾಡಿದ್ದಾರಂತೆ.

ಮಹೇಶ್ ಬಾಬು ರೂಪಾಂತರ!

ವರದಿಗಳ ಪ್ರಕಾರ, ನಟ ಮಹೇಶ್ ಬಾಬು ಮತ್ತು ರಾಜಮೌಳಿ ಅವರ ಚಿತ್ರ ಮುಂದಿನ ವರ್ಷ ಪ್ರಾರಂಭವಾಗಲಿದೆ. ಆದರೆ ಈಗಿನಿಂದಲೇ ದೈಹಿಕವಾಗಿ ಬದಲಾವಣೆಗಳನ್ನು ಮಾಡಿಕೊಳ್ಳಲು ನಟ ಮಹೇಶ್ ಬಾಬು ಕಸರತ್ತು ಆರಂಭಿಸಿದ್ದಾರೆ. ಸದ್ಯ ಕೆಲವು ದಿನಗಳ ಹಿಂದೆ, ಫಿಟ್ನೆಸ್ ತರಬೇತುದಾರ ಲಾಯ್ಡ್ ಸ್ಟೀವನ್ಸ್, ಮಹೇಶ್ ಜೊತೆಗಿನ ಫೋಟೋಗಳನ್ನು ಹಂಚಿಕೊಂಡಿದ್ದರು. ಈ ಫೋಟೋಗಳು ಮಹೇಶ್ ಬಾಬು ತಮ್ಮ ದೈಹಿಕ ರೂಪಾಂತರಕ್ಕಾಗಿ ತಯಾರಿ ಆರಂಭಿಸಿದ್ದಾರೆ ಎನ್ನುವ ಸುಳಿವು ನೀಡಿದ್ದವು.

ಪ್ರಭಾಸ್ ಹಾದಿಯಲ್ಲಿ ಮಹೇಶ್ ಬಾಬು!

ರಾಜಮೌಳಿ ಸಿನಿಮಾಗಾಗಿ ನಟ ಮಹೇಶ್ ಬಾಬು, ಪ್ರಭಾಸ್ ದಾರಿ ಹಿಡಿಯಲು ನಿರ್ಧರಿಸಿದ್ದಾರೆ ಎನ್ನುವುದು ವರದಿಯಾಗಿದೆ. ಬಾಹುಬಲಿ ಸರಣಿ ಸಿನಿಮಾಗಳಿಗಾಗಿ ನಟ ಪ್ರಭಾಸ್ ಸುಮಾರು ನಾಲ್ಕರಿಂದ ಐದು ವರ್ಷಗಳನ್ನು ಮೀಸಲಿಟ್ಟಿದ್ದರು. ಅಷ್ಟೂ ವರ್ಷಗಳೂ ಪ್ರಭಾಸ್ ಕೇವಲ ರಾಜಮೌಳಿ ಅವರೊಂದಿಗೆ ಸಿನಿಮಾ ಮಾಡಿದ್ದರು. ಆ ಸಮಯದಲ್ಲಿ ಬಾಹುಬಲಿ ಬಿಟ್ಟರೆ ಬೇರೆ ಯಾವುದೇ ಸಿನಿಮಾವನ್ನೂ ಕೂಡ ಅವರು ಕೈಗೆತ್ತಿಕೊಂಡಿರಲಿಲ್ಲ. ಈಗ ನಟ ಮಹೇಶ್ ಬಾಬು ಕೂಡ ಅದೇ ನಿರ್ಧಾರ ಮಾಡಿದ್ದು, ಸದ್ಯ ಸಂಪೂರ್ಣವಾಗಿ ರಾಜಮೌಳಿ ಸಿನಿಮಾಗೆ ತಯಾರಿ ನಡೆಸಿದ್ದಾರಂತೆ.

ಮಹೇಶ್ ಬಾಬು 28ನೇ ಚಿತ್ರದಲ್ಲಿ ಬ್ಯೂಸಿ!

ಮಹೇಶ್ ಬಾಬು ಈಗಾಗಲೇ ಎಸ್‌ಎಸ್‌ಎಂಬಿ28ರ ಚಿತ್ರೀಕರಣವನ್ನು ಪ್ರಾರಂಭಿಸಿದ್ದಾರೆ. ಮಹೇಶ್ ಬಾಬು ಹಾಗೂ ತ್ರಿವಿಕ್ರಮ್ ಕಾಂಬಿನೇಷನ್ ಸಿನಿಮಾ ಇದು. ಈ ಚಿತ್ರದಲ್ಲಿ ನಟಿ ಪೂಜಾ ಹೆಗ್ಡೆ ನಾಯಾಕಿಯಾಗಿದ್ದು, ಕನ್ನಡದ ನಟ ಉಪೇಂದ್ರ ಮತ್ತು ವಿಜಯ್ ಸೇತುಪತಿ ಇಬ್ಬರು ಪ್ರಮುಖ ಪಾತ್ರಗಳಲ್ಲಿ ನಟಿಸಲಿದ್ದಾರೆ ಎನ್ನಲಾಗುತ್ತಿದೆ.