ಭದ್ರತೆ ನೀಡಿ, ಡ್ರಗ್ಸ್ ಸೇವಿಸುವ ತೆಲುಗು ನಟ-ನಟಿಯರ ಪಟ್ಟಿ ಕೊಡ್ತೀನಿ: ಶ್ರೀರೆಡ್ಡಿ ಬಾಂಬ್

ವಿವಾದಗಳಿಂದಲೇ ಖ್ಯಾತರಾಗಿರುವ ಶ್ರೀರೆಡ್ಡಿ

ವಿವಾದಗಳಿಂದಲೇ ಹೆಸರುಮಾಡಿರುವ ನಟಿ ಶ್ರೀರೆಡ್ಡಿ ಫೇಸ್‌ಬುಕ್‌ನಲ್ಲಿ 8 ನಿಮಿಷದ ವಿಡಿಯೋ ಒಂದನ್ನು ಹಂಚಿಕೊಂಡಿದ್ದರು. ತೆಲುಗು ಚಿತ್ರರಂಗದಲ್ಲಿ ಡ್ರಗ್ಸ್, ವ್ಯಭಿಚಾರ ಮುಂತಾದ ಅನಾಚಾರಗಳಿವೆ ಎಂದು ಆರೋಪಿಸಿದ್ದು, ತನಿಖೆ ಮಾಡುವಂತೆ ಒತ್ತಾಯಿಸಿದ್ದಾರೆ.

ದೊಡ್ಡ ನಟರ ಮನೆಯಲ್ಲಿ ಡ್ರಗ್ಸ್ ಸರಬರಾಜಾಗುತ್ತದೆ

ದೊಡ್ಡ-ದೊಡ್ಡ ನಟರ ಮನೆಯಲ್ಲಿ ನಡೆಯುವ ಪಾರ್ಟಿಗಳಲ್ಲಿ ಡ್ರಗ್ಸ್‌ ಸರಬರಾಜು ಆಗುತ್ತದೆ. ದೊಡ್ಡ ನಟರ ಮಕ್ಕಳು ರೇವ್ ಪಾರ್ಟಿಗಳನ್ನು ಮಾಡುತ್ತಾರೆ. ಅಲ್ಲೆಲ್ಲಾ ಡ್ರಗ್ಸ್ ಸರಬರಾಜು ಆಗುತ್ತದೆ. ಡ್ರಗ್ಸ್ ಮಾತ್ರವೇ ಅಲ್ಲ ವ್ಯಭಿಚಾರದ ದೊಡ್ಡ ಜಾಲವೇ ತೆಲುಗು ಸಿನಿಉದ್ಯಮದಲ್ಲಿದೆ ಎಂದಿದ್ದಾರೆ ಶ್ರೀರೆಡ್ಡಿ.

ರಾಕುಲ್ ಪ್ರೀತ್ ಸಿಂಗ್ ಅನ್ನು ಬಂಧಿಸಲು ಒತ್ತಾಯ

ರಾಕುಲ್ ಪ್ರೀತ್ ಸಿಂಗ್ ಅಂಥಹಾ ನಟಿಯರನ್ನು ಎನ್‌ಸಿಬಿ ಅಧಿಕಾರಿಗಳು ಬಂಧಿಸಿ ಚೆನ್ನಾಗಿ 'ಡ್ರಿಲ್' ಮಾಡಿದರೆ ಎಲ್ಲಾ ವಿಷಯಗಳು ಹೊರಗೆ ಬರುತ್ತವೆ. ತೆಲಂಗಾಣ ಸರ್ಕಾರವು ನನಗೆ ಸೂಕ್ತ ಭದ್ರತೆ ಒದಗಿಸಿದರೆ ನಾನು ಎಲ್ಲರ ಹೆಸರನ್ನೂ ಬಹಿರಂಗಗೊಳಿಸುತ್ತೇನೆ, ಪೊಲೀಸರಿಗೆ ಪಟ್ಟಿ ಕೊಡುತ್ತೇನೆ ಎಂದಿದ್ದಾರೆ ಶ್ರೀರೆಡ್ಡಿ.

ಬಿಜೆಪಿಯನ್ನು ಹೊಗಳಿದ ಶ್ರೀರೆಡ್ಡಿ

ಇನ್ನು ತಮ್ಮ ದೀರ್ಘ ವಿಡಿಯೋದಲ್ಲಿ ಬಿಜೆಪಿಯನ್ನು ಹೊಗಳಿರುವ ಶ್ರೀರೆಡ್ಡಿ, ಸುಶಾಂತ್ ಸಿಂಗ್ ಪ್ರಕರಣದಲ್ಲಿ ಬಿಜೆಪಿ ಉತ್ತಮ ಕಾರ್ಯ ಮಾಡುತ್ತಿದೆ ಎಂದಿದ್ದಾರೆ. ಇಲ್ಲಿಯೂ ಸಹ ಎನ್‌ಸಿಬಿ ಅಧಿಕಾರಿಗಳು ಗಟ್ಟಿಯಾದ ತನಿಖೆ ಮಾಡಿ ತಪ್ಪಿತಸ್ಥರಿಗೆ ಶಿಕ್ಷೆ ವಿಧಿಸಬೇಕು ಎಂದಿರುವ ಶ್ರೀರೆಡ್ಡಿ, 'ಜೈ ಬಿಜೆಪಿ' ಎನ್ನುವ ಮೂಲಕ ವಿಡಿಯೋ ಮುಗಿಸಿದ್ದಾರೆ.