ಟಾಲಿವುಡ್‌ನಲ್ಲಿ ಕಿರಿಯ ಕಲಾವಿದರು, ಟೆಕ್ನಿಷಿಯನ್‌ಗಳು ಭಿಕ್ಷುಕರಿಗಿಂತ ಕಡೆ: ಮೇಕಾ ರಾಮಕೃಷ್ಣ ಬೇಸರ

ದೊಡ್ಡವರು ಸಣ್ಣವರು ಎಂಬ ಭೇದಭಾವ

ಪ್ರೊಡಕ್ಷನ್ ಹೌಸ್ ಗಳಿಂದ ನಡೆಯುವ ಅವಮಾನಗಳಿಂದ ನೊಂದಿರುವ ಮೇಕಾ ರಾಮಕೃಷ್ಣ 'ಇಲ್ಲಿ ಮೊದಲಿನಿಂದಲೂ ನಡೆದುಕೊಂಡು ಬಂದಿದೆ. ದೊಡ್ಡವರು, ಚಿಕ್ಕವರು ಎಂಬ ಭೇದ ತೋರಿ ಸಣ್ಣ ಕಲಾವಿದರನ್ನು ಅವಮಾನಿಸುತ್ತಾರೆ' ಅಂತ ಪ್ರೊಡಕ್ಷನ್ ಹೌಸ್ ಗಳ ಅಸಲಿ ಮುಖವನ್ನು ತೆರೆದಿಡುತ್ತಾರೆ.

ನಿಜವಾಗಿ ಹೇಳಬೇಕೆಂದರೆ, ಯಾವೊಬ್ಬ ಪಾತ್ರಧಾರಿ ಕಲಾವಿದನೂ ಇಂಥ ವಿಷಯಗಳನ್ನು ಬಯಲಿಗೆಳೆಯುವ ಸಾಹಸ ಮಾಡುವುದಿಲ್ಲ. ಯಾಕೆಂದರೆ ಇದೆಲ್ಲವನ್ನು ಬಹಿರಂಗಪಡಿಸಿದರೆ ನಾಳೆ ಎಲ್ಲಿ ಪಾತ್ರವನ್ನು ಕೊಡುವುದಿಲ್ಲವೋ ಎಂಬ ಭಯದಿಂದ ಅವಮಾನಗಳನ್ನು ಸಹಿಸಿಕೊಂಡು ಬರುತ್ತಾರೆ ಹೊರತು ಅದನ್ನು ಬಹಿರಂಗಗೊಳಿಸುವುದಿಲ್ಲ. ಆದರೆ ಇಂತಹ ಅನೇಕ ಅವಮಾನಗಳನ್ನು ಸಹಿಸಿಕೊಂಡ ಮೇಕಾ ರಾಮಕೃಷ್ಣ ಪ್ರೊಡಕ್ಷನ್ ಹೌಸ್‌ಗಳಲ್ಲಿ ನಡೆಯುವ ಅರಾಜಕತೆಯನ್ನು ಮೌನ ಮುರಿದು ಬಯಲಿಗೆಳೆದಿದ್ದಾರೆ.

ಪ್ರೊಡಕ್ಷನ್ ಬಾಯ್ಸ್ ಕೂಡ ಕೀಳಾಗಿ ನೋಡುತ್ತಾರೆ

''ಇಂಡಸ್ಟ್ರಿಯಲ್ಲಿ ನನಗೆ ಬೇಸರ ತರಿಸುವ ಘಟನೆಗಳು ಸಾಕಷ್ಟಿವೆ. ಜೀವನವೇ ವ್ಯರ್ಥ ಎಂದು ಕಣ್ಣೀರು ಹಾಕಿದ ಸಂದರ್ಭಗಳೂ ಇವೆ. ನೀವು ಯಾವುದೇ ಸಿನಿಮಾ ಸೆಟ್ ಗೆ ಹೋದರು ದೊಡ್ಡವರನ್ನೆಲ್ಲಾ ಒಂದು ರೀತಿ ನಡೆಸಿಕೊಳ್ಳುತ್ತಾರೆ. ಚಿಕ್ಕ ಕಲಾವಿದರನ್ನು ಇನ್ನೊಂದು ರೀತಿ ನಡೆಸಿಕೊಳ್ಳುತ್ತಾರೆ. ಆದರೆ ತಪ್ಪಿಲ್ಲ...ದೊಡ್ಡ ಕಲಾವಿದರು ದೊಡ್ಡ ತಾರೆಯರಿಗೆ ಸಿಗಬೇಕಾದ

ಗೌರವ ಮತ್ತು ಮರ್ಯಾದೆ ಸಿಗಬೇಕು, ಸಿಗಲಿ. ಅದರ ಬಗ್ಗೆ ನನ್ನ ತಕರಾರಿಲ್ಲ. ಆದರೆ ಸಣ್ಣ ಕಲಾವಿದರನ್ನು ನಡೆಸಿಕೊಳ್ಳುವ ರೀತಿ ಇದೆಯಲ್ಲ ಅದು ಘೋರ ಅವಮಾನಕರವಾಗಿ. ಅವರನ್ನು ಕೂಡ ಕಲಾವಿದರಂತೆ ನೋಡಿ ಕನಿಷ್ಠ ಮನುಷ್ಯರಂತೆ ಅಂತಾದರೂ ನೋಡುವ ಪ್ರಯತ್ನ ಮಾಡಿ. ಸಣ್ಣ ಕಲಾವಿದರೆಂದರೆ ಪ್ರೊಡಕ್ಷನ್ ಹುಡುಗರು ಕೂಡ ಕೆಟ್ಟದಾಗಿ ನಡೆಸಿಕೊಳ್ಳುತ್ತಾರೆ. ತುಂಬಾ ನಾಚಿಕೆಗೇಡಿನ ಅನಿಸುತ್ತದೆ.. ಅವರು ನಡೆಸಿಕೊಳ್ಳುವ ರೀತಿ ನೋಡಿದರೆ ನರಕ ಅನಿಸುತ್ತದೆ"

ಭಿಕ್ಷುಕರಗಿಂತ ಕಡೆಯಾಗಿ ಟ್ರೀಟ್

ಈ ವಿಚಾರದಲ್ಲಿ ನಾನು ಸಿನಿಮಾದ ನಿರ್ಮಾಪಕ ಮೇಲೆ ಆರೋಪ ಮಾಡುವುದಿಲ್ಲ. ಅವರು ಎಲ್ಲವನ್ನೂ ವ್ಯವಸ್ಥಿತವಾಗಿ ಒದಗಿಸಿಕೊಟ್ಟಿರುತ್ತಾರೆ. ಆದರೆ ಈ ಪ್ರೊಡಕ್ಷನ್ ಬಾಯ್ಸ್ ಮಾತ್ರ ಭಿಕ್ಷುಕರಗಿಂತ ಕಡೆಯಾಗಿ ಜೂನಿಯರ್ ಆರ್ಟಿಸ್ಟ್ ಗಳನ್ನು ನೋಡುತ್ತಾರೆ. ಎಷ್ಟು ಸಲ ಇದನ್ನೆಲ್ಲಾ ನೋಡಿ ಕೋಪವನ್ನು ಕಂಟ್ರೋಲ್ ಮಾಡಿಕೊಳ್ಳಲಾಗದೆ ಅಲ್ಲಿಯೇ ಪ್ರತಿಭಟಿಸಿದ್ದು ಇದೆ. ಇಷ್ಟೆಲ್ಲಾ ಗಲಾಟೆ ಯಾಕೆ ಅಂತ ಹೇಳಿ ನಾನೇ ಮನೆಯಿಂದ ಈಗ ಊಟ ತೆಗೆದುಕೊಂಡು ಹೋಗುತ್ತೇನೆ.

ಊಟಕ್ಕೂ ನಾಲ್ಕಾರು ಕ್ಯಾಟಗರಿ ಇದೆ

ಬಹುತೇಕ ನಿರ್ಮಾಪಕರು ಮಾಡುತ್ತಿರುವುದು ಹೀಗೆ ಇದೆ. ಆಹಾರ ನೀಡುವ ವಿಚಾರದಲ್ಲಿ ಕೂಡ ನಾಲ್ಕು ವಿಭಾಗಗಳೂ ಇವೆ. ಅಪ್ಪಿತಪ್ಪಿಯೂ ನಮಗೆ ನಿಯೋಜಿಸಿದ ಜಾಗದ ಬದಲು ಮುಂದಿನ ಜಾಗಕ್ಕೆ ಹೋದರೆ ಅವರನ್ನು ಕೆಟ್ಟದಾಗಿ ಕಾಣುತ್ತಾರೆ. ಪೋಷಕ ಕಲಾವಿದರು ಹಾಗೂ ಜೂನಿಯರ್ ಆರ್ಟಿಸ್ಟ್ ಗಳಿಗೆ ಪ್ರತ್ಯೇಕ ಟೆಂಟ್ ಹಾಕಲಾಗುತ್ತಿದೆ. ಅವರು ಅದರಲ್ಲಿ ಇರಬೇಕು.. ಅವರು ಅದರಲ್ಲಿ ತಿನ್ನಬೇಕು. ನಿರ್ಮಾಪಕರು, ಹೀರೋಗಳು, ಹೀರೋಯಿನ್ ಗಳಿಗೆ ಒಂದೆಡೆ. ಇನ್ನೊಂದೆಡೆ ನಿರ್ದೇಶಕ ಮತ್ತು ಇತರ ಸೀನಿಯರ್ ಟೆಕ್ನಿಷನ್‌ಗಳು, ಇನ್ನೊಂದೆಡೆ ಪೋಷಕ ನಟರು ಇನ್ನೊಂದೆಡೆ ಸೆಕೆಂಡ್ ಗ್ರೇಡ್ ಟೆಕ್ನಿಷನ್ ಗಳು ಎರಡನೇ ದರ್ಜೆಯ ಪೋಷಕ ಕಲಾವಿದರಿಗೆ ಮೀಸಲು. ಈ ನಾಲ್ಕನೆಯ ಜಾಗದಲ್ಲಿ ಅವರನ್ನು ಕೆಟ್ಟದಾಗಿ ನಡೆಸಿಕೊಳ್ಳಲಾಗಿದೆ. ಎಷ್ಟು ಸಲ ಇಂಥ ವಿಚಾರಗಳು ನಿರ್ಮಾಪಕರ ಗಮನಕ್ಕೆ ಬಂದರೂ ಪ್ರತಿಕ್ರಿಯಿಸುವುದಿಲ್ಲ

ಕುಡಿಯಲು ಟಾಯ್ಲೆಟ್ ನೀರು ಕೊಡುತ್ತಾರೆ

ಜೂನಿಯರ್ ಆರ್ಟಿಸ್ಟ್ , ಸೆಕೆಂಡ್ ಗ್ರೇಡ್ ಟೆಕ್ನಿಷಿಯನ್ ಗಳ ಜೊತೆ ಪ್ರೊಡಕ್ಷನ್ ಹುಡುಗರು ತುಂಬಾ ಕೆಟ್ಟದಾಗಿ ವರ್ತಿಸುತ್ತಾರೆ. ಅವರು ತಮ್ಮ ಸ್ವಂತ ಮನೆಯಿಂದ ತಂದ ಹಣದಲ್ಲಿ ಇವರಿಗೆಲ್ಲ ಊಟ ಹಾಕುವಂತೆ ವರ್ತಿಸುತ್ತಾರೆ. ಎಷ್ಟೋ ಜನರು ಇವರ ವರ್ತನೆಗಳಿಂದ ಕಣ್ಣೀರು ಹಾಕಿಕೊಂಡಿದ್ದು ಇದೆ. ಎಷ್ಟು ಸಲ ಎಷ್ಟು ವಿಕೃತವಾಗಿ ವರ್ತಿಸುತ್ತಾರೆ ಎಂದರೆ ನೀವು ವಾಟರ್ ಕೇಳಿದರೆ

ಟಾಯ್ಲೆಟ್ ನೀರನ್ನು ಹಿಡಿದು ತಂದುಕೊಡುತ್ತಾರೆ. ಆದರೂ ಅನೇಕರು ಇದನ್ನೆಲ್ಲಾ ಸಹಿಸಿಕೊಂಡು ಬರುತ್ತಾರೆ. ಏಕೆಂದರೆ ಇವರಿಗೆಲ್ಲಾ ಬದುಕಲಿಕ್ಕೆ ಬೇರೆ ದಾರಿಗಳು ಇಲ್ಲ.ಇದನ್ನೇ ನಂಬಿಕೊಂಡು ಜೀವನ ನಡೆಸುತ್ತಿರುವ ಕಾರಣಕ್ಕೆ ಇದೆಲ್ಲಾ ಸಹಿಸಿಕೊಳ್ಳುತ್ತಿದ್ದಾರೆ" ಎಂದು ವಿಷಾದದಿಂದ ಹೇಳುತ್ತಾರೆ ರಾಮಕೃಷ್ಣ.