'ಲೈಗರ್' ಸೋಲಿನಿಂದ ನಂಬಿದವರು ದೂರಾದರು: ಚಿರಂಜೀವಿ ಎದುರು ಪುರಿ ಜಗನ್ನಾಥ್ ಭಾವುಕ

'ಲೈಗರ್' ಸೋಲಿನ ಬಗ್ಗೆ ಪುರಿ ಮಾತು

''ಯಶಸ್ಸು ಬಂದರೆ ಬಹಳ ಎನರ್ಜಿ ಬರುತ್ತದೆ. ಸಿನಿಮಾ ಫೇಲ್ ಆದರೆ ಇದ್ದ ಎನರ್ಜಿಯೂ ಹೊರಟು ಹೋಗುತ್ತದೆ. ಯಶಸ್ಸು ಬಂದಾಗ, ನಾವೇ ಬುದ್ಧಿವಂತರು ಎನಿಸುತ್ತದೆ. ಸಿನಿಮಾ ಸೋತರೆ ನಮಗಿಂತ ಯಾರೂ ದಡ್ಡರಿಲ್ಲ ಎನಿಸುತ್ತದೆ. ಸಿನಿಮಾ ಸೋತಾಗ ನಂಬಿದವರು ಸಹ ಕೈಬಿಟ್ಟು ಹೋಗುತ್ತಾರೆ. ಎಲ್ಲವೂ ತಲೆಕೆಳಗಾಗುತ್ತದೆ. ಬೇರೆ-ಬೇರೆ ರೀತಿಯ ಸಮಸ್ಯೆಗಳು ಬರುತ್ತವೆ. ಆ ಸಮಯದಲ್ಲಿ ಧೈರ್ಯವಾಗಿ ಇರಬೇಕೆಂದರೆ ಖಂಡಿತ ಶಕ್ತಿ ಬೇಕು'' ಎಂದಿದ್ದಾರೆ ಪುರಿ ಜಗನ್ನಾಥ್.

ಗಾಯ ಮಾಯುವ ಸಮಯ ಹೆಚ್ಚಿರಬಾರದು: ಪುರಿ

''ಯಾವುದಾದರೂ ಗಾಯ ಆದಾಗ ಅದು ವಾಸಿಯಾಗುವ ಸಮಯ ಇರುತ್ತದಲ್ಲ. ಅದು ಕಡಿಮೆ ಇರಬೇಕು. ಏನಾದರೂ ಆಗಬಹುದು, ನಷ್ಟ ಆಗಬಹುದು, ಯುದ್ಧಗಳೇ ನಡೆಯಬಹುದು ಏನೇ ಆದರೂ ಅದರ ನೋವು ವಾಸಿಯಾಗುವ ಸಮಯ ಒಂದು ತಿಂಗಳಿಗಿಂತಲೂ ಹೆಚ್ಚಿಗೆ ಇರಬಾರದು. ನಾನು ಇದನ್ನು ನಂಬುತ್ತೇನೆ. ನಾನು ಈಗ ಅದೇ ಪ್ರಯತ್ನದಲ್ಲಿದ್ದೇನೆ'' ಎಂದಿದ್ದಾರೆ ಪುರಿ ಜಗನ್ನಾಥ್.

'ಮೂರು ವರ್ಷ ಎಂಜಾಯ್ ಮಾಡಿದೆ, ಮೂರು ವರ್ಷ ಅಳಲಾಗದು'

''ಮೂರು ವರ್ಷಗಳ ಕಾಲ 'ಲೈಗರ್' ಸಿನಿಮಾದ ಮೇಲೆ ಕೆಲಸ ಮಾಡಿದೆ. ಈ ಸಮಯದಲ್ಲಿ ನಾನು ಸಾಕಷ್ಟು ಎಂಜಾಯ್ ಮಾಡಿದೆ. ಒಳ್ಳೆಯ ಕಲಾವಿದರೊಟ್ಟಿಗೆ ಕೆಲಸ ಮಾಡಿದೆ. ಮೈಕ್ ಟೈಸನ್ ಜೊತೆ ಕೆಲಸ ಮಾಡಿದೆ. ಒಳ್ಳೆಯ ಸೆಟ್‌ಗಳನ್ನು ಹಾಕಿದೆವು, ಚಿತ್ರೀಕರಿಸಿದೆವು ಮೂರು ವರ್ಷ ಅದನ್ನು ಎಂಜಾಯ್ ಮಾಡಿದೆವು. ಆದರೆ ಸಿನಿಮಾ ಓಡಲಿಲ್ಲ. ಅದು ನಮ್ಮ ಕೈಯಲ್ಲಿಲ್ಲ. ಹಾಗೆಂದು ಮೂರು ವರ್ಷ ಅಳಲು ಸಾಧ್ಯವಿಲ್ಲ. ಬೇಗ ಅದರಿಂದ ಹೊರಗೆ ಬರಬೇಕು ಅಷ್ಟೆ'' ಎಂದಿದ್ದಾರೆ.

ಪುರಿಗೆ ಬುದ್ಧಿವಾದ ಹೇಳಿದ ಚಿರಂಜೀವಿ

ಚಿರಂಜೀವಿ ಸಹ ಪುರಿ ಜಗನ್ನಾಥ್‌ಗೆ ಬುದ್ಧಿವಾದ ಹೇಳಿದ್ದು, ''ನೀನೊಬ್ಬ ಅದ್ಭುತವಾದ ತಂತ್ರಜ್ಞ, ನಿನಗೆ ಒಳ್ಳೆಯ ಸಿನಿಮಾ ಮಾಡಲು ಗೊತ್ತು. ಸೋಲಿಗೆ ಹೆದರಬೇಡ. ನಾನು 'ಆಚಾರ್ಯ' ಸಿನಿಮಾ ಸೋತಾಗ ಕುಗ್ಗಲಿಲ್ಲ. ಏಪ್ರಿಲ್‌ನಲ್ಲಿ ಸಿನಿಮಾ ಬಿಡುಗಡೆ ಆಯ್ತು, ಮೇ ತಿಂಗಳಲ್ಲಿ ನಾನು ಪತ್ನಿಯೊಟ್ಟಿಗೆ ಪ್ರವಾಸಕ್ಕೆ ಹೋದೆ. ಮರಳಿ ಬಂದೆ, ಹೊಸ ಸಿನಿಮಾದ ಮೇಲೆ ಇನ್ನೂ ಹೆಚ್ಚು ಕೆಲಸ ಮಾಡಿದೆ. ತಪ್ಪುಗಳನ್ನು ಸರಿಪಡಿಸಿಕೊಂಡು ಮುನ್ನುಗ್ಗಿ 'ಗಾಡ್ ಫಾದರ್' ಮಾಡಿದೆ ಹಿಟ್ ಆಗಿದೆ. ನೀನೂ ಸಹ ನಿಲ್ಲಬೇಡ, ಯಾವುದನ್ನೂ ಮನಸ್ಸಿಗೆ ತೆಗೆದುಕೊಳ್ಳಬೇಡ'' ಎಂದಿದ್ದಾರೆ ಚಿರಂಜೀವಿ.