RGV 'ಕೊಂಡಾ' ತೆಲಂಗಾಣ ರಾಜಕೀಯದಲ್ಲಿ ಹಲ್ಚಲ್

'ಕೊಂಡಾ' ಚಿತ್ರ ಯಾರ ಜೀವನಾಧಾರಿತ ಚಿತ್ರ?

ಹಿಂದೆ 'ಪೆರಿಟಾಲ ರವಿ' ಜೀವನದ ನೈಜ ಘಟನೆಗಳನ್ನು ಆಧರಿಸಿ 'ರಕ್ತಚರಿತ್ರ-1, 2' ಮಾಡಿದ ಆರ್‌ಜಿವಿ ಈ ಬಾರಿ ತೆಲಂಗಾಣ ರಾಜಕಾರಣಿಗಳಾದ 'ಕೊಂಡಾ ಮುರಳಿ-ಸುರೇಖಾ' ದಂಪತಿಗಳ ಜೀವನದ ನೈಜ ಘಟನೆಗಳನ್ನು ಆಧರಿಸಿ 'ಕೊಂಡಾ' ಚಿತ್ರವನ್ನು ಬೆಳ್ಳಿತೆರೆಗೆ ತರಲು ಹೊರಟಿದ್ದಾರೆ. ''ನಾನು ಸಿನಿಮಾ ತೆಗೆಯುತ್ತಿಲ್ಲ ಬದಲಿಗೆ ತೆಲಂಗಾಣದ ರಕ್ತ ಚರಿತ್ರೆ ಹೇಳುತ್ತಿದ್ದೇನೆ'' ಎಂದು ಟೀಸರ್‌ನಲ್ಲಿ ಹೇಳಿದ್ದಾರೆ ರಾಮ್ ಗೋಪಾಲ್ ವರ್ಮಾ.

ನಕ್ಸಲ್ ಹಿನ್ನಲೆಯ ಕಥಾವಸ್ತು

RGV ಇತ್ತೀಚೆಗೆ 'ಕೊಂಡಾ ಮುರಳಿ-ಸುರೇಖಾ' ದಂಪತಿಗಳ ಮೇಲೆ ಒಂದು ಚಿತ್ರವನ್ನು ಘೋಷಿಸಿದ್ದಾರೆ. ಎನ್‍ಕೌಂಟರ್‌ನಲ್ಲಿ ಕೊಲೆಯಾದ ನಕ್ಸಲೈಟ್ ಆರ್‌ಕೆ ಅಲಿಯಾಸ್ ರಾಮಕೃಷ್ಣ ಮತ್ತು ಕೊಂಡಾ ಮುರಳಿ ನಡುವಿನ ವಿಶೇಷ ಸಂಬಂಧದ ಬಗ್ಗೆ ಹೇಳಲು ಹೊರಟಿದ್ದೇನೆ ಎಂದು ವರ್ಮಾ ಅಂತ ಹೇಳಿದ್ದಾರೆ. 'ತಾನು ಮಾಡುತ್ತಿರುವುದು ಚಲನಚಿತ್ರವಲ್ಲ, ನಂಬಲಾಗದ ನೈಜ ಜೀವನ ಆಧಾರಿತ ತೆಲಂಗಾಣದ ರಕ್ತಸಿಕ್ತ ಇತಿಹಾಸ' ಎಂದು ಅವರು ಮಾಡಲಿರುವ ಚಿತ್ರದ ಹಿನ್ನಲೆಯ ಸುಳಿವು ನೀಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಇತ್ತೀಚೆಗೆ 'ಕೊಂಡಾ' ಪೋಸ್ಟರ್ ಪೋಸ್ಟರ್ ಅನ್ನು ಬಿಡುಗಡೆ ಮಾಡಲಾಗಿದೆ.

ವಾರಂಗಲ್ ರಾಜಕೀಯದ ಮೇಲೆ ಕೊಂಡಾ ದಂಪತಿಗಳ ಹಿಡಿತ

"ಈ ಚಿತ್ರವು 80 ರ ದಶಕದ ನಕ್ಸಲ್ ಹಿನ್ನೆಲೆಯಲ್ಲಿದೆ 'ಪಿರಿಯಾಡಿಕ್ ಲ್ ಲವ್ ಸ್ಟೋರಿ" ಎಂದು ವರ್ಮಾ ಟ್ವಿಟರ್ ನಲ್ಲಿ ಹೇಳಿಕೊಂಡಿದ್ದಾರೆ. ಈ ಚಿತ್ರ ಘೋಷಣೆಯಾಗುತ್ತಿದ್ದಂತೆ ತೆಲಂಗಾಣದಲ್ಲಿ ಅದರಲ್ಲೂ ವಿಶೇಷವಾಗಿ ಕೊಂಡಾ ದಂಪತಿಗಳ ಒಂದು ಕಾಲದ ಭದ್ರಕೋಟೆಯಾಗಿದ್ದ ವಾರಂಗಲ್ ಜಿಲ್ಲೆಯಲ್ಲಿ ಇದು ಸಂಚಲನವನ್ನು ಉಂಟು ಮಾಡಿದೆ. ಕೆಲವು ವರ್ಷಗಳ ಹಿಂದಿನವರೆಗೂ ವಾರಂಗಲ್ ರಾಜಕೀಯದಲ್ಲಿ ಶಕ್ತಿ ಕೇಂದ್ರವಾಗಿದ್ದ ಕೊಂಡಾ ಸುರೇಖಾ-ಮುರಳಿ ದಂಪತಿಗೆ ಸಂಬಂಧಿಸಿದ ಪ್ರಮುಖ ಸಂಗತಿಗಳನ್ನು ಸಂಗ್ರಹಿಸಿರುವ ವರ್ಮಾ, ಈ ಚಿತ್ರದ ಮೂಲಕ ತೆಲಂಗಾಣ ರಾಜಕೀಯ ಹಿನ್ನೆಲೆಯ ಚಿತ್ರ ನಿರ್ಮಾಣಕ್ಕೆ ಕೈಹಾಕಿದ್ದಾರೆ.

ಭೂಮಾಲಿಕರ ರಾಕ್ಷಸತ್ವದ ಕತೆ

80 ಮತ್ತು 90 ರ ದಶಕದ ಭೂಮಾಲೀಕರ ರಾಕ್ಷಸತ್ವವನ್ನು 'ಕೊಂಡಾ' ಚಿತ್ರದ ಮೂಲಕ ತೆರೆಯ ಮೇಲೆ ತೋರಿಸಲು ಹೊರಟಿರುವುದಾಗಿ RGV ಹೇಳಿಕೊಂಡಿದ್ದಾರೆ. ಇದರೊಂದಿಗೆ, ರಾಜಕಾರಣಿಗಳಾಗಿ ತಮ್ಮ ಛಾಪು ಮೂಡಿಸಿರುವ ಈ ದಂಪತಿಗಳನ್ನು ಸಿನಿಮಾದಲ್ಲಿ ಹೇಗೆ ತೋರಿಸಬಹುದು ಎಂಬ ಬಗ್ಗೆ ಸಾರ್ವತ್ರಿಕ ಚರ್ಚೆ ನಡೆಯುತ್ತಿದೆ. ಚಿತ್ರದಲ್ಲಿ ಆದಿತ್ ಅರುಣ್ ಮತ್ತು ಇರಾ ಮೋರೆ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.