ಮಹೇಶ್ ಬಾಬು ಚಿತ್ರಮಂದಿರದಲ್ಲಿ ಕಾಂತಾರ ಹವಾ; ತೆಲುಗು ಬುಕಿಂಗ್ ಹೇಗಿದೆ, ಮೊದಲ ದಿನ ಎಷ್ಟು ಕೋಟಿ?

ಎಎಂಬಿ ಚಿತ್ರಮಂದಿರದಲ್ಲಿ ಕಾಂತಾರ ಸೋಲ್ಡ್ ಔಟ್

ಹೈದರಾಬಾದ್‌ನ ಗಚ್ಚಿಬೌಲಿಯಲ್ಲಿರುವ ಮಹೇಶ್ ಬಾಬು ಒಡೆತನದ ಎಎಂಬಿ ಸಿನಿಮಾಸ್ ಚಿತ್ರಮಂದಿರದಲ್ಲಿ ಕಾಂತಾರ ಚಿತ್ರದ ಮೊದಲ ದಿನದ 6 ಪ್ರದರ್ಶನಗಳು ಸಹ ಸೋಲ್ಡ್ ಔಟ್ ಆಗಿವೆ. ನಗರದ ಪ್ರತಿಷ್ಠಿತ ಮಲ್ಟಿಪ್ಲೆಕ್ಸ್ ಚಿತ್ರಮಂದಿರಗಳಲ್ಲಿ ಒಂದಾಗಿರುವ ಈ ಎಎಂಬಿಯಲ್ಲಿ ಟಿಕೆಟ್ ದರ ತುಸು ದುಬಾರಿಯೇ. ಕಾಂತಾರ ಚಿತ್ರಕ್ಕೂ ಸಹ ಈ ಚಿತ್ರಮಂದಿರದಲ್ಲಿ 350 ಹಾಗೂ 295 ರೂಪಾಯಿಗಳ ದುಬಾರಿ ಟಿಕೆಟ್ ದರವೇ ಇತ್ತು. ಆದರೂ ಸಹ ಕಾಂತಾರ ಚಿತ್ರದ ಟಿಕೆಟ್ ಸಂಪೂರ್ಣ ಸೋಲ್ಡ್ ಔಟ್ ಆಗಿವೆ. ಈ ಮೂಲಕ ಕೆಜಿಎಫ್ ಚಾಪ್ಟರ್ 2 ಬಳಿಕ ಮತ್ತೊಂದು ಕನ್ನಡದಿಂದ ತೆಲುಗಿಗೆ ಡಬ್ ಆದ ಚಿತ್ರದ ಟಿಕೆಟ್‌ಗಳು ಈ ಚಿತ್ರಮಂದಿರದಲ್ಲಿ ಮೊದಲ ದಿನದ ಎಲ್ಲಾ ಪ್ರದರ್ಶನಗಳಲ್ಲಿಯೂ ಸೋಲ್ಡ್ ಔಟ್ ಆಗಿದೆ.

ಹೈದರಾಬಾದ್‌ನ ಬಹುತೇಕ ಮಲ್ಟಿಪ್ಲೆಕ್ಸ್ ಸೋಲ್ಡ್ ಔಟ್

ಎಎಂಬಿ ಸಿನಿಮಾಸ್ ಮಾತ್ರವಲ್ಲದೆ ಹೈದರಾಬಾದ್ ನಗರದ ಪ್ರಮುಖ ಮಲ್ಟಿಫ್ಲೆಕ್ಸ್ ಚಿತ್ರಮಂದಿರಗಳಾದ ಪಿವಿಆರ್, ಐನಾಕ್ಸ್ ಹಾಗೂ ಸಿನಿಪೊಲಿಸ್ ಪ್ರದರ್ಶನಗಳೂ ಕೂಡ ಸೋಲ್ಡ್ ಔಟ್ ಆಗುತ್ತಿವೆ. ಗಚ್ಚಿಬೌಲಿ, ಪಂಜಗುಟ್ಟ, ಅಮೀರ್ ಪೇಟ್, ಮಲ್ಲಾಪುರ್, ಮಾದಾಪುರ, ನಿಜಾಂಪೇಟೆ ಹಾಗೂ ಮುಂತಾದ ಏರಿಯಾಗಳಲ್ಲಿ ಕಾಂತಾರ ಟಿಕೆಟ್ ನಿಜಕ್ಕೂ ಅತ್ಯದ್ಬುತವಾಗಿ ಸೋಲ್ಡ್ ಔಟ್ ಆಗಿವೆ.

ತೆಲುಗು ರಾಜ್ಯಗಳ ಇತರೆ ನಗರಗಳಲ್ಲಿ ಅದ್ಭುತ ರೆಸ್ಪಾನ್ಸ್

ಆಂಧ್ರಪ್ರದೇಶ ಹಾಗೂ ತೆಲಂಗಾಣ ರಾಜ್ಯಗಳ ಉಳಿದ ಪ್ರಮುಖ ನಗರಗಳಾದ ವಿಶಾಖಪಟ್ಟಣದ ಕಿನ್ನೆರ,ಶಾರದಾ ಹಾಗೂ ಐನಾಕ್ಸ್ ಚಿತ್ರಮಂದಿರಗಳಲ್ಲಿ ಕಾಂತಾರ ತೆಲುಗು ಚಿತ್ರದ ಟಿಕೆಟ್ ಸೋಲ್ಡ್ ಔಟ್ ಆಗಿವೆ. ತಿರುಪತಿ ಚಿತ್ರಮಂದಿರಗಳಲ್ಲಿಯೂ ಸಹ ಕಾಂತಾರ ಚಿತ್ರದ ಟಿಕೆಟ್ ವೇಗವಾಗಿ ಮಾರಾಟವಾಗುತ್ತಿವೆ. ಚಿತ್ತೂರು ಜಿಲ್ಲೆಯ ಚಿತ್ರಮಂದಿರಗಳಲ್ಲಿ ಕಾಂತಾರ ಚಿತ್ರದ ಬುಕ್ಕಿಂಗ್ ಸಾಮಾನ್ಯವಾಗಿದೆ. ಗುಂಟೂರು ನಗರದಲ್ಲಿ ಕಾಂತಾರ ಬುಕಿಂಗ್ ಜೋರಾಗಿದೆ. ವಾರಂಗಲ್ ನಗರದಲ್ಲಿಯೂ ಕಾಂತಾರ ಒಳ್ಳೆಯ ಬುಕಿಂಗ್ ಕಂಡಿದೆ.

ಮೊದಲ ದಿನವೇ 1.5 ಕೋಟಿ ಗಳಿಕೆ ಪಕ್ಕಾ ಎನ್ನುತ್ತಿದ್ದಾರೆ ಬಾಕ್ಸ್ ಆಫೀಸ್ ಪಂಡಿತರು

ಇನ್ನು ಕಾಂತಾರ ತೆಲುಗು ಅವತರಣಿಕೆ ಆಂಧ್ರಪ್ರದೇಶ ಹಾಗೂ ತೆಲಂಗಾಣ ರಾಜ್ಯಗಳಲ್ಲಿ ಒಟ್ಟು 305ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆಗೊಂಡಿದೆ. ಸದ್ಯ ಕಾಂತಾರ ಚಿತ್ರಕ್ಕಿರುವ ವಿಮರ್ಶೆ ಹಾಗೂ ಬುಕಿಂಗ್ ನೋಡಿದರೆ ಕಾಂತಾರ ತೆಲುಗು ಅವತರಣಿಕೆ ಮೊದಲನೇ ದಿನ ನಿರಾಯಾಸವಾಗಿ 1.5 ಕೋಟಿ ಗಳಿಕೆ ಮಾಡಲಿದೆ ಎಂದು ಬಾಕ್ಸ್ ಆಫೀಸ್ ಟ್ರ್ಯಾಕರ್ಸ್ ತಿಳಿಸಿದ್ದಾರೆ.