Yashoda Trailer: ಸರೋಗಸಿ ಥ್ರಿಲ್ಲರ್ 'ಯಶೋದಾ': ಬಾಡಿಗೆ ತಾಯಿಯಾದ ಸಮಂತಾ!

ಸರೋಗಸಿ ಹಗರಣದ ಕಥೆ

ಭಾರತದಲ್ಲಿ ಕೆಲ ವರ್ಷಗಳಿಂದ ಸರೋಗಸಿ ವಿಧಾನದಲ್ಲಿ ಮಕ್ಕಳು ಪಡೆಯುವ ವಿಚಾರ ಭಾರೀ ಸದ್ದು ಮಾಡ್ತಿದೆ. ಸಾಕಷ್ಟು ಸೆಲೆಬ್ರೆಟಿಗಳು ಇದೇ ವಿಧಾನದಲ್ಲಿ ಮುದ್ದಾದ ಮಕ್ಕಳಿಗೆ ಅಪ್ಪ, ಅಮ್ಮ ಆಗಿದ್ದಾರೆ. ಇತ್ತೀಚೆಗೆ ನಟಿ ನಯನತಾರಾ ಹಾಗೂ ನಿರ್ದೇಶಕ ವಿಘ್ನೇಶ್ ಶಿವನ್ ದಂಪತಿ ಬಾಡಿಗೆ ತಾಯ್ತನ ವಿಧಾನದಲ್ಲಿ ಅವಳಿ ಮಕ್ಕಳನ್ನು ಪಡೆದಿದ್ದಾರೆ. 'ಯಶೋದಾ' ಚಿತ್ರದಲ್ಲೂ ಇದೇ ಸರೋಗಸಿ ವಿಚಾರದ ಬಗ್ಗೆ ಚರ್ಚಿಸಲಾಗಿದೆ. ದಿನದಿಂದ ದಿನಕ್ಕೆ ಇದು ಹೇಗೆ ದೊಡ್ಡ ಹಗರಣವಾಗಿದೆ ಎನ್ನುವ ಕಥೆಯನ್ನು ಚಿತ್ರದಲ್ಲಿ ಹೇಳಲಾಗಿದೆ.

"ಹಿಂಸೆ ಕೊಟ್ಟ ಚೈತು.. ಅದಕ್ಕೆ ಡಿವೋರ್ಸ್": ಅತ್ತೆ ಬಳಿ ನೋವು ತೋಡಿಕೊಂಡ ಸಮಂತಾ?

ಬಾಡಿಗೆ ತಾಯಿಯಾಗಿ ಸಮಂತಾ ನಟನೆ

ಚಿತ್ರದಲ್ಲಿ ಬಡ ಯುವತಿಯಾಗಿರುವ 'ಯಶೋದಾ' ಹಣಕ್ಕಾಗಿ ಬೇರೆಯವರ ಮಗುವನ್ನು ಹೊತ್ತು ಹೆರಲು ಒಪ್ಪಿಕೊಳ್ಳುತ್ತಾಳೆ. ಅಂದರೆ ಸರೋಗಸಿ ಪದ್ದತಿಯಲ್ಲಿ ಮಗು ಹೆತ್ತು ಕೊಡಲು ಒಪ್ಪಿಕೊಳ್ಳುತ್ತಾಳೆ. ಈ ಹಾದಿಯಲ್ಲಿ ಆಕೆ ಏನೆಲ್ಲಾ ಸಮಸ್ಯೆಗೆ ಸಿಲುಕುತ್ತಾಳೆ, ಅದರಿಂದ ಹೊರಬರಲು ನಡೆಸುವ ಹೋರಾಟ ಎಂಥದ್ದು ಎನ್ನುವುದನ್ನು ಚಿತ್ರದಲ್ಲಿ ಎಳೆ ಎಳೆಯಾಗಿ ಬಿಚ್ಚಿಡಲಾಗಿದೆ. ಸರೋಗಸಿ ರಾಕೆಟ್ ವಿರುದ್ಧ ಇನ್ನು ಭರ್ಜರಿ ಆಕ್ಷನ್ ಸೀಕ್ವೆನ್ಸ್‌ನಲ್ಲೂ ಸ್ಯಾಮ್ ಅಬ್ಬರಿಸಿದ್ದಾರೆ.

ಕನ್ನಡ ವರ್ಷನ್‌ಗೆ ರಕ್ಷಿತ್ ಶೆಟ್ಟಿ ಬೆಂಬಲ

ಹರಿ ಶಂಕರ್ ಹಾಗೂ ಹರೀಶ್ ನಾರಾಯಣ್ ಸೇರಿ 'ಯಶೋದಾ' ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಎಂ. ಸುಕುಮಾರ್ ಛಾಯಾಗ್ರಹಣ, ಮಣಿಶರ್ಮ ಸಂಗೀತ ಚಿತ್ರಕ್ಕಿದೆ. ಕನ್ನಡದಲ್ಲಿ ರಕ್ಷಿತ್ ಶೆಟ್ಟಿ ಟ್ರೈಲರ್ ಲಾಂಚ್ ಮಾಡಿದ್ರೆ, ಬಾಲಿವುಡ್‌ನಲ್ಲಿ ವರುಣ್ ಧವನ್ ಶೇರ್ ಮಾಡಿದ್ದಾರೆ. ವಿಜಯ್ ದೇವರಕೊಂಡ ತೆಲುಗು ವರ್ಷನ್ ಹಾಗೂ ದುಲ್ಕರ್ ಸಲ್ಮಾನ್ ಮಲಯಾಳಂ ಟ್ರೈಲರ್ ರಿಲೀಸ್ ಮಾಡಿದ್ದಾರೆ. ಇನ್ನು ಸೂರ್ಯ ತಮಿಳು 'ಯಶೋದಾ' ಟ್ರೈಲರ್ ರಿಲೀಸ್ ಮಾಡಿ ತಂಡಕ್ಕೆ ಶುಭ ಕೋರಿದ್ದಾರೆ.

'ಯಶೋದಾ' ಟ್ರೈಲರ್ ಸೂಪರ್ ಹಿಟ್

ಮೊದಲ ನೋಟದಲ್ಲೇ 'ಯಶೋದಾ' ಟ್ರೈಲರ್ ಸಿನಿರಸಿಕರ ಗಮನ ಸೆಳೆದಿದೆ. ಸರೋಗಸಿ ಕಾನ್ಸೆಪ್ಟ್ ಚೆನ್ನಾಗಿದೆ. ಸಿನಿಮಾ ಡೈಲಾಗ್ಸ್ ಕುತೂಹಲ ಕೆರಳಿಸುವಂತಿದೆ. ಉನ್ನಿ ಮುಕುಂದನ್, ವರಲಕ್ಷ್ಮಿ ಶರತ್‌ಕುಮಾರ್, ರಾವು ರಮೇಶ್, ಮುರಳಿ ಶರ್ಮಾ, ಸಂಪತ್ ರಾಜ್ ಸೇರಿದಂತೆ ದೊಡ್ಡ ತಾರಾಗಣ ಚಿತ್ರದಲ್ಲಿದೆ. ಸಿನಿಮಾ ಮೇಕಿಂಗ್ ಕೂಡ ಸೊಗಸಾಗಿದೆ. ನವೆಂಬರ್ 11ಕ್ಕೆ 'ಯಶೋದಾ' ಸಿನಿಮಾ ತೆರೆಗೆ ಬರಲಿದೆ.